जेठ २ गते बुर्तिबाङ

बागलुङको तमानखोला गाउँपालिका ३ मा परापूर्व कालमा निर्मित जीर्ण अवस्थामा रहेको आर्दश गाउँ पञ्चायत घरलाई पुनः निर्माण गरी सामुदायिक भवनको रुपमा नयाँ भवन बनाइएको छ ।

२०१५ सालतिर विभिन्न ६ गाविसका जनताले जनश्रमदान गरी निर्माण गरिएको उक्त भवन जीर्ण भएपछि त्यसलाई भत्काएर सामुदायिक भवनको रुपमा पुनः निर्माण गरिएको तमानखोला गाउँपालिका ३ का अध्यक्ष झक बहादुर बुढाले बताउनु भयो । तमानखोला गाउँपालिकाको आर्थिक बर्ष २०८०÷०८१ को दश लाख बजेट विनियोजन गरेर निर्माण सुरु गरिएको उक्त भवन दुई तलाकै पुरानो आर्दश गाउँ पञ्चायतकै डिजाइनमा बन्ने छ ।

भवन निर्माण सम्पन्न पश्चात माथिल्लो तलामा सामुदायिक पुस्तकालय (ई लाइब्रेरी बनाउने भुँई तलामा तत्काललाई वडा कार्यालय निर्माणाधीन अवस्थामा रहेका कारण वडा कार्यालय सञ्चालन गरिने र वडा कार्यालय निर्माण सम्पन्न पश्चात वडाले संरक्षण गर्ने गरी पाहुना घर अथवा पर्यटकीय सूचना घर बनाउने गरी लक्ष्य लिइएको वडा अध्यक्ष बुढाले बताउनु भयो ।

गाउँ पञ्चायत घरको रुपमा रहेको तमानको उक्त घरबाट त्यस समयका पञ्चायत प्रमुखले साविक धवलागिरी अञ्चलमै नागरिकलाई राम्रो सँग जिम्मेवारी बहन गरेका कारण आर्दश गाउँ पञ्चायतको रुपमा मान्यता दिइएको पाइन्छ । साविक तमान, लाम्मेला, खुँगा, लुकुरवन, नर्जा र खुङ्खानी गरी ६ गाउँका नागरिकलाई सेवा दिइने गरिन्थ्यो ।

ठुलो एरियामा शासन चल्ने गरी ६ गाउँका जनताले २०१५ सालतिर भवन निर्माण गरेका थिए । उक्त पञ्चायत भवनबाट पहिलो पञ्च प्रधान थम बहादुर शेरचन, दीर्घ नारायण शेरचन, क्याप्टेन भक्त बहादुर बुढाथोकी, ,धन बहादुर गौचन, र बालनरसिंह भट्टचनले सेवा दिइएको पाइन्छ ।

, क्याप्टेन भक्त बहादुर बुढाथोकी र बालनरसिंह भट्टचनले दुई कार्यकाल सम्म सेवा दिनुभएको त्यहाँका बूढापाका बताउँछन । आगामी असार मसान्त सम्म निर्माण सम्पन्न गरिने भवनको काम अन्तिम चरणमा छ ।

पुराना सामाग्रि लाई समेत प्रयोग गरी निर्माण थालिएको भवन स्थानीय ढुँगा माटो र काठकै प्रयोगबाट बन्दै गरेको हो ।

बैशाख ३१ गते बुर्तिबाङ

गत बैशाख २५ गतेदेखि सुरु भएको ट्राफिक सप्ताह कार्यक्रम बुर्तिबाङमा सोमबार दीप प्रज्वलन गर्दे समापन गरिएको छ ।

अस्थाई ट्राफिक प्रहरी कार्यालय बुर्तिबाङको आयोजनामा विभिन्न कार्यक्रमको आयोजना गर्दे सुरुवात गरिएको अभियानको सोमबार साँझ दीप प्रज्वलन गर्दे समापन गरिएको हो ।

बजारमा रयाली सहित सचेतना मूलक कार्यक्रम, चालकको स्वास्थ्य परिक्षण, सवारी चेकजाँच, विद्यार्थीलाई ट्राफिक सचेतना मूलक कार्यक्रम र यात्रुलाई समेत ट्राफिक सचेतना कार्यक्रमको आयोजना गर्दे सप्ताह व्यापी अभियान समापन गरिएको हो । आइतबार बुर्तिबाङ बसपार्कमा चालकको स्वास्थ्य परिक्षण गरिएको थियो ।

शुक्रबार रिभरहेड बोर्डिङ स्कुलका विद्यार्थीलाई सचेतना मूलक कार्यक्रम गरिएको ट्राफिक प्रहरी पेम नारायण पौडेलले बताउनु भयो ।

अन्य दिनमा सचेतना मूलक कार्यक्रम, सवारी जाँच लगायतका गतिविधि गरिएको थियो ।

समापन सत्रको कार्यक्रम इलाका प्रहरी कार्यालय बुर्तिबाङका प्रमुख राजकुमार बिकको अध्यक्षता, ढोरपाटन नगरपालिका १ का अध्यक्ष वान बहादुर छन्त्यालको प्रमुख आतिथ्यता मा यातायात व्यवसायी, सवारी चालक, यात्रु लगायतको उपश्थितीमा सामूहिक दीप प्रज्वलन गर्दे कार्यक्रमको समापन गरिएको हो । गण्डकी प्रदेशका ११ जिल्लामा ट्राफिक सप्ताह कार्यक्रम सञ्चालन गरिएको पाइएको छ ।

बुर्तिबाङ बैशाख ३० गते
लायन्स क्लब अफ ढोरपाटनको आयोजनामा विभिन्न विद्यालयमा विद्यार्थीको आँखा तथा दाँतको परिक्षण एवम् उपचार शिविर सुरु गरिएको छ ।
विद्यार्थीको आँखा तथा दाँतमा समस्या देखिने र समयमा उपचार नगरे त्यसले ठुलो समस्या निम्त्याउन सक्ने भएका कारण सचेतना सँगै उपचार शिविर सुरु गरिएको हो ।

 आइतबार बुर्तिबाङ स्थित रिभरहेड इनटरनेशनल एकेडेमीमा ३५० विद्यार्थी र शिक्षकको निशुल्क रुपमा ओपिडी आँखा तथा दन्त परिक्षण गरिएको हो ।
दृष्टि विशेषज्ञ रुद्र बहादुर खत्री र दन्त चिकित्सक भावना अधिकारीको उपस्थिति मा बोर्डिङमा अध्ययनरत विद्यार्थी र केही शिक्षकको गरी ३५० जनाको परिक्षण गरिएको हो । परिक्षण गरिएका मध्ये ७० जना विद्यार्थीमा आँखाको समस्या रहेको पाइएको छ ।

जसमध्ये १७ जनामा दूर दृष्टिको समस्या रहेको, १० जना अदूर दृष्टि, ३ जना अल्छी आँखा, ४ जनामा डेडो, १ जनाको आँखा हल्लने समस्या र १ जनामा मोतिया बिन्दुको समस्या रहेको दृष्टि विशेषज्ञ रुद्र बहादुर खत्रीले बताउनु भयो ।

त्यस्तै ४० जना विद्यार्थीमा दाँतको समस्या रहेको पाइएको थियो । जसमध्ये १५ जनाको दाँत निकालिएको, अन्यलाई औषधी उपलब्ध गराइएको हो ।

शिविर सञ्चालन सँगै अभिभावक, तथा विद्यार्थी खुसी भएका छन । निशुल्क रुपमा उपचार तथा परामर्श दिइएका कारण लायन्स क्लबले निकै राम्रो काम गर्दे आइरहेको विद्यालयका प्रिन्सिपल विकास प्रधानले बताउनु भयो । 

लायन्स क्लब अफ ढोरपाटनका अध्यक्ष राम प्रसाद आर्चाय ले बोल्दै समाज सेवा सँग नजिक रहँदै आएको यस क्लबले विद्यार्थीमा रहेको समस्यालाई सम्बोधन गर्न र अभिभावकले ध्यान दिन नसकेको अवस्थामा सानो समस्या पनि भोलिका दिनमा ठुलो रूप लिन सक्ने र विद्यार्थीको भविष्यमा नै समस्या सृजना हुन सक्ने अवस्थालाई मध्यनजर राख्दै यस्ता शिविर कार्यक्रमको आयोजना गरिएको बताउनु भयो ।

 निशुल्क रुपमा सञ्चालन भएको शिविरमा दृष्टि विशेषज्ञ रुद्र बहादुर खत्री र दन्त चिकित्सक भावना अधिकारीको सहयोग रहेको छ । औपचारिक कार्यक्रम लायन्स क्लब अफ ढोरपाटन शन २०२४÷०२५ का अध्यक्ष छविलाल पाण्डेले सञ्चालन गर्नुभएको हो । 

बैशाख ३० गते 

बागलुङको ढोरपाटन नगरपालिका २ टारिखेत स्थित नयाँ शहर आयोजना कार्यालय मार्फत निर्माण भइरहेको सडक ढलानको क्रममा कम गुणस्तरको बालुवा राख्न खोजिएपछि ढोरपाटन नगरपालिका २ का वडा अध्यक्ष भेक बहादुर खत्रीले उक्त मेटेरियल्स सडकमै पोखिदिएका छन ।

शनिबार साँझ सडक ढलानका लागि लगिएको बालुवा माटो सहित कम गुणस्तरको भएपछि नयाँ शहर आयोजनाका प्राविधिकले प्रयोग नगर्न आग्रह गरेका थिए । यस भन्दा पहिले समेत सोही सडकमा कम गुणस्तरको सामाग्री राख्न खोजिएपछि पटक पटक राख्दै आएकोमा निर्माण कम्पनीले बेवास्ता गर्दे गएको पाइएको छ ।

नयाँ शहर आयोजना मार्फत ढोरपाटन नगरपालिका २ टारीखेतमा सडक ढलानको काम गरिरहेको सिर्जना कन्जक्सुम जेभी काठमाण्डौले निर्माणको जिम्मा पाएको थियो । कुल पचास लाख लागतमा ठेक्का सम्झौता भएको उक्त सडक दुई सय मिटर चौडा ढलानको काम भइरहेको नयाँ शहर आयोजनाका सव इन्जिनियर सूचित सुवेदीले बताए ।

निर्माण कम्पनीले पटक पटक कम गुणस्तरको बालुवा राखेर सडक ढलान गर्न खोजेको भन्दै वडा अध्यक्ष खत्रीले बालुवा सडकमै जेसिवी को सहायताले पोखिदिएका हुन । आफ्नो गाउँ टोलमा हुने भौतिक संरचनामा स्थानीय नागरिकले समेत ध्यान दिन र मनोमानी गरेमा खबरदारी गर्न समेत आग्रह गरेका छन ।

गत वैशाख १४ गते गाउँ नजिकैको जंगलमा लागेको आगो निभाउने क्रममा तमानखोला गाउँपालिका–२ सिल्गुमका ४८ वर्षीय देवसिंह कामीको मृत्यु भयो । सोही ठाउँका ३१ वर्षीय ज्ञानबहादुर बुढा मगर र ३३ वर्षीय प्रेमबहादुर घर्ती मगर घाइते हुनुभयो । घाइते बुढा मगर र घर्ती मगर अहिले पनि अस्पतालमै उपचाररत हुनुहुन्छ ।

आगलागीमा परि मृत्यु हुनु भएका देवसिंहको पारिवारीक अवस्था निकै कमजोर छ । ज्याला मजदुरी गरि परिवारको लालनपालनमा गर्दै आउनु भएका कामीको मृत्युले यतिबेला उहाँको परिवार विछिप्त छ ।

समस्यामा परेको कामी परिवारलाई तमानखोला गाउँपालिकाले मलम लगाउने प्रयास गरि रहेको छ । देवसिंहको मृत्यु भएको केही दिनमै गाउँपालिकाले घरमै पुगेर एक लाख रुपैयाँ राहत उपलब्ध गराएको थियो छन् । घाइते दुवै जनाको उपचारका लागि ७५÷७५ हजार सहयोग गरेको छ ।

मृतक कामीको आर्थिक अवस्था कमजोर भएको हुँदा गाउँपालिकाले उहाँका कान्छा छोरा टोप बहादुर विकलाई कक्षा १२ कक्षासम्म बालगृहमा राखेर पढाउने भएको छ । टोपबहादुरले अहिले कक्षा ९ मा पढ्नुहुन्छ । देवसिंहको परिवारमा दुई छोरा, दुई छोरीसहित श्रीमती हुनुहुन्छ । जेठो छोरा र छोरीले केही वर्ष अगाडिनै पढाई छोडेका थिए । कान्छि छोरी अझै विद्यालय जान थाल्नु भएको छैन ।

गाउँपालिकाले तीन वर्षदेखि वडा नम्बर ३ तमान गाउँमा बालगृह संचालन गरेर अनाथ तथा बेसराहा बालबालिकाको पालनपोषण र पढाउने काम गर्दै आएको छ । अर्थिक वर्ष कमजोर भई पढ्नबाट वञ्चित भएका बालबालिकालाई पनि गाउँपालिकाले बालगृहमा आश्रय लिई पढाउने जिम्म लिएको छ ।

बुबाको मृत्युपछि पारिवारको नाजुक अवस्थाका कारण पढ्नबाट वञ्चित हुने अवस्थामा पुगेका टोपबहादुर पालिकाले आफ्नो सम्पूर्ण जिम्मा लिएपछि खुसी हुनु भएको छ । अब आफूलाई कक्षा १२ सम्म पढ्नलाई कुनै समस्या नहुने उहाँ बताउनुहुन्छ ।

“बाबाले अरुको ज्याला मजदुरी गरेर हामीहरुलाई पाल्नु भएको थियो, जसोतसो पढाउँदै आउनु भएको थियो, उहाँको मृत्यु भएपछि अब पढ्न नपाउने भएँ भन्ने चिन्ता लागेको थियो, तर गाउँपालिकाले मेरो लागि ठूलो योगदान गर्ने भयो” विकले भन्नुभयो – “मैले मेहनत गरेर पढ्नु पर्छ, बाबाले देखेको सपना पुरा गर्ने र्छु, पढ्न नपाइएला कि भन्ने डरबाट मुक्त भएँ ।”

गाउँपालिकाले तमानगाउँमा घर भाडामा लिएर बालगृह संचालन गरेको छ । बालगृहमा कक्षा १ देखि ९ सम्म अध्ययन गर्ने २९ जना बालबालिका रहेका छन् । गाउँपालिका अध्यक्ष जोकलाल बुढा मगरले आर्थिक अभावमा अब कुनै पनि बालबालिकाले पढ्नबाट वञ्चित हुनु नपर्ने बताउनुभयो ।

स्थानीय सरकार नागरिकको सुख दुःखमा साथ दिने सरकार भएको हुँदा कोही पनि शिक्षादिक्षा र भोको पेट बस्न नपर्ने उहाँको भनाइ छ । बालबालिकालाई पालनपोषण गर्ने, १२ सम्म पढाउने र विभिन्न किसिमका सिपमुलक तालिम दिने र रोजगारीको व्यवस्थासमेत मिलाउने अध्यक्ष बुढा मगर बताउनुहुन्छ । गाउँपालिकाले ‘तमानखोला विकास कोष’ निर्माण गरेर बालगृह संचालन गरेको उहाँ बताउनुहुन्छ ।

बालगृहमा बस्ने बालबालिकाले स्थानीय धन गौ ज्योति माध्यमिक विद्यालयमा अध्ययन गरि रहेका छन् । बालबालिकाहरुको पढाईमा निरन्तर सुधार हुँदै गइरहेको विद्यालयले जनाएको छ । बालगृह संचालनमा आएपछि धेरै बालबालिका शिक्षाको पहुँचमा आएको भन्दै सेवा पनि गुणस्तरीय दिने गरि काम गरि रहेको अध्यक्ष बुढा मगरको भनाइ छ ।

“खासगरी आमाबाबा गुमाएर बेसहारा बनेका बालबालिकालाई पालिकाले अभिभावकत्व गरि उनीहरुको पालनपोषण र दिशक्षादिक्षा दिने कामको थालनी गरेका छौँ यसले धेरैलाई राहत मिलेको छ” अध्यक्ष बुढा मगरले भन्नुभयो – “बालगृहमा बस्न थालेपछि बालबालिकाको पढाईमा पनि धेै सुधार भएको छ, उहाँहरुलाई यहाँ आश्रय मात्रै दिने होइन, असल र दक्ष नागरि बनाउने हाम्रो जिम्मेवारी हो, सोही अनुसार काम गरि रहेका छौँ ।”

बागलुङ बैशाख २८ गते 

बागलुङको तमानखोला गाउँपालिका ४ लाम्मेलामा गतराति घरमा आगलागी हुँदा दुई घर पूर्ण रुपमा जलेर नष्ट भएको छ । घरमा मानिस नभएको समयमा शुक्रबार बिहान करिब ३ बजेको समयमा दुई घरमा एकैपटक आगो दन्किरहेको अवस्थामा स्थानीयले देखेपछि नियन्त्रणको प्रयास गरेका थिए तर आगोले घर पूर्ण रुपमा जलेको पाइएको छ ।

वडा नं. ४ का अध्यक्ष छ प्रसाद श्रीपालीका अनुसार तमानखोला ४ स्थित भाटी गाउँका जेनु सिर्पाली र दिले सिर्पालीको सँगै जोडिएका दुई घर पूर्ण रुपमा जलेर नष्ट भएको हो ।

दुई परिवारका सबै सदस्य खेतिपातीको निम्ती गाउँ नजिकैको हल्ले खर्क बारीमा रहेको अवस्थामा रातको समयमा आगलागी हुँदा घर सहित घरभित्र राखिएको सम्पूर्ण सामान जलेर नष्ट भएको जनाइएको छ । लाम्मेलाका अधिकांस घर परिवार खेतिपातीको निम्ती घुम्ती बसाइ गर्ने गर्दछन् ।

घटनाको प्रकृति हेर्दा आगलागी कसैले लगाइदिएको हुन सक्ने आशंका गरिएको वडा अध्यक्ष छ प्रसाद श्रीपालीले बताउनु भयो । घटनाको विषयमा जानकारी प्राप्त भएसँगै तमानखोला गाउँपालिका अध्यक्ष जोकलाल बूढा सहित अनुसन्धानका निम्ति बोङ्गादोभान प्रहरी चौकीको टोली घटना स्थलमा जाँदै गरेको बताइएको छ । 

मानिस नभएको समयमा रातमा एकै पटक दुई घर जल्दै गर्दा कसैले घरमा आगो लगाइदिएको हुन सक्ने आशंका गरिएको स्थानीयले जनाएका छन ।

बैशाख २५
ईन्फिनिटी लघुवित्त वित्तिय संस्थाको आयोजनामा बुर्तिबाङमा सोमबार केन्द्र प्रमुख गोष्ठी तथा वित्तिय साक्षरता र एक दिने व्यवसायिक बाख्रा पालन तालीम सम्पन्न भएको छ ।
ईन्फिनिटी लघुवित्त वित्तिय संस्था बुर्तिबाङ शाखाको आयोजनामा आयोजित कार्यक्रममा केन्द्र नम्बर २१ का सदस्य केसरी घर्ती मगरको अध्यक्षतामा आयोजित कार्यक्रममा इलाका प्रहरी कार्यालय बुर्तिबाङका प्रमुख प्रहरी निरीक्षक राजकुमार बिकको विशेष आतिथ्यता रहेको थियो । कार्यक्रमका अवसरमा महिला दिदी बहिनीलाई आत्मनिर्भर बनाउन र सृजनशील भई स्वरोजगार बन्ने अभिप्राय स्वरुप व्यवसायीक बाख्रा पालन तालिम दिइएको थियो ।

विभिन्न समुहका महिला सदस्यहरूको सहभागिता रहेको कार्यक्रममा संस्थाका केन्द्रिय कार्यालयका कर्मचारी कृष्ण प्रसाद पौडेलले सहजिकरण गर्नुभएको हो ।

कार्यक्रममा संस्थाको तर्फदेखि अनुगमन तथा निरीक्षण कार्यालय अमुवा रूपन्देहीका कार्यालय प्रमुख बिशेश्वर विष्टको आतिथ्यता रहेको थियो । कार्यक्रम संस्थाका बुर्तिबाङ शाखा प्रमुख हेमशंकर न्यौपानेले सञ्चालन गर्नुभएको थियो । 

प्रकाश अधिकारी ।

बागलुङको दुर्गम क्षेत्र तमानखोला-१, स्याउला स्थित श्री बुद्ध आधारभूत विद्यालयमा पाहार ट्रस नेपालले स्थलगत अध्ययन गरेको छ । शिक्षा, स्वास्थ्य,खानेपानी तथा सरसफाइको माध्यमबाट ग्रामिण समुदायको जीवन स्तर उकास्न महत्वपूर्ण भूमिका खेलको पाहार ट्रस नेपालमा विद्यालयले ८ कोठे अत्याधुनिक विद्यालय भवन निमार्णाथ प्रस्ताव पेस गरेको थियो ।

विद्यालयले भूकम्प प्रतिरोधात्मक तथा अत्याधुनिक ८ कोठे भवन बनाउने प्रस्ताव पेस गरेपछि ट्रसको इन्जिनियरसहितको एक टोलिले सोमबार विद्यालयको निरीक्षण तथा स्थलगत अध्ययन गरेको हो । निरीक्षणपछि पहार ट्रसका प्रोजेक्ट म्यानेजर एवम् ईन्जिनियर टेकराज राना मगरले भौगोलिक विकटता भएपनि स्याउला गाउँ निकै सुन्दर रहेकोे बताउनु भयो । ईन्जिनियर मगरले विद्यालयमा ८ कोठे भवन आवस्यकता रहेको पुष्ठि गर्नुभयो । ईन्जिनियर मगरले भन्नु भयो,” तपाईंहरुलाई विद्यालय भवनको अति आवश्यक रहेछ । विद्यालयप्रति समुदायको सक्रियता र चासो देखेर खुसी लागेको छ । प्रोजेक्ट सफल बनाउन प्रारम्भिक कार्यहरु सुरु गरौं, बाकी भवन निमार्णको प्रक्रिया, सर्त र जिम्मेबारीबारे अर्को छलफल गरौंला । ” ईन्जिनियर मगरको उक्त भनाइले उपस्थित अभिभावकहरु खुसीले ताली बजाए ।

सोमबार विद्यालयमा आयोजित एक वृहत् कार्यक्रमलाई सम्बोधन गर्दै पहार ट्रस नेपालका अध्यक्ष विजुली बहादुर गुरुङले विद्यार्थीहरूलाई सुरक्षित र बालमैत्री बातावरणमा गुणस्तरिय शिक्षा प्राप्त गर्न अत्याधुनिक भवन चाहिने कुरा कसैले नकार्न नसक्ने बताउनु भयो । अध्यक्ष गुरुङले बुद्ध आधारभूत विद्यालयमा शैक्षिक गुणस्तर राम्रो भएपनि भौतिक संरचना सेवा सुविधाको अभावको कुरा निकै सुनेकाले के कस्तो रहेछ भनेर आफुहरु स्थलगत अध्ययनमा आएको बताउनुभयो ।

गुरुङले आवस्यकताका आधारमा प्रोजेक्ट गर्न सकिने बताउनुभयो । पाहार ट्रस नेपाल, स्थानीय सरकार र विद्यालयको समन्वयमा प्रोजेक्टको मोडेल तयार हुनेछ । इन्जिनियर मगरले दातृनिकाले स्वीकृत गरिसकेपछी स्थानीय पालिका र विद्यालय प्रशासनविच आर्थिक प्रतिज्ञापत्र तयार भएपछि त्रिपक्षीय सम्झौता भएमात्रै औपचारिक रुपमा प्रोजेक्ट सुरु हुने बताउनु भयो । विद्यालयमा अत्याधुनिक भवन बन्ने कुरामा आफु पूर्णरुपमा आशाबादी भएको जिसस सदस्य टेक बहादुर अर्गेजा मगरले बताउनु भयो । उहाँले आफ्नोतर्फबाट हदैसम्मको सहयोग गरिरहेको बताउनुभयो । कार्यक्रममा विद्यालयका प्रधानाध्यापक नद प्रसाद घर्ती मगरले पाहार ट्रसप्रति कृतज्ञता प्रकट गदै विद्यालय गतिविधि र आगामी योजना बारे प्रस्ट पार्नुभएको थियो ।

करिब दुई सय विद्यार्थी अध्ययनरत विद्यालयमा ११ जना शिक्षक कर्मचारी रहेका छन्। विद्यालयमा स्टिम ल्याब, कम्प्युटर ल्याब, लाइब्रेरी तथा क्यान्टिन र शौचालयको समेत अभाव रहेको छ । कार्यक्रममा जिल्ला समन्वय समिति सदस्य टेक बहादुर अर्गेजा मगर, जनप्रतिनिधि टेकलाल बिक ,विव्यस अध्यक्ष डिल बहादुर बिक, स्थानीय बुद्धिजीवी दल प्रसाद पुन लगायतका अभिभावकहरुले विद्यालयका शैक्षिक तथा भौतिक समस्याहरु सम्बोधन गरिदिन पाहार ट्रसलाई आग्रह गरेका थिए । कार्यक्रमको संचालन शिक्षक प्रकाश अधिकारीले गर्नुभएको थियो ।

कार्यक्रममा स्थानीय आमा समुहहरुले सांस्कृतिक प्रस्तुतिद्वारा स्वागत तथा अविर फूलमाला लगाएर बिदाई गरेका थिए । ट्रसले सातै प्रदेशका विभिन्न जिल्लामा करिब ३ सय बढी विद्यालय भवन निमार्ण गरिसकेको छ । विद्यालय निर्माण परियोजनाका अतिरिक्त ट्रसले सामुदायिक स्वास्थ्य चौकी, पुस्तकालय, प्रारम्भिक शिक्षा केन्द्र, खानेपानी तथा सरसफाइ आयोजना, खेलकुद सुविधाको व्यवस्था, विद्यालय छात्रावास, विद्यालय विस्तार कार्य र मर्मतसम्भारलगायत अन्य विभिन्न परियोजनाहरू पनि सञ्चालन गदै आएको छ ।

बैसाख २५ गते बुर्तिबाङ

बागलुङको बडिगाड गाउँपालिकामा हाइड्रोजन ग्यास उत्पादन गर्ने प्रक्रिया अगाडि बढाइएको छ ।  । मंगलबार गाउँपालिकाको वडा नं २ स्थित गिरिङ्दी खोला लघु जलविद्युत सहकारी संस्था माफर्त सञ्चालित लघुजलविद्युत आयोजनाबाट हाइड्रोजन ग्यासको परिक्षण गर्दे ग्यासबाट खाना समेत पकाइएको हो । 

उक्त विधुत आयोजनाबाट शत प्रतिशत स्वच्छ ऊर्जा अर्थात् ग्रीन हाइड्रोजन उत्पादन गरिने लक्ष्य लिइएको हो । नेपालमै पहिलो पटक थालिएको यो अभ्यासबाट सहज, सरल र विदेशबाट खरिद गर्नुपर्ने एलपी ग्यास आयातलाई रोक्न सकिने गाउँपालिका अध्यक्ष गण्डकी थापाले बताउनु भयो । 

गाउँपालिकाले त्यसका लागि आवश्यक प्रक्रिया अगाडि बढाएको छ । हाइड्रोजन उत्पादनका लागि नेपाल इनर्जी फाउण्डेसन, वैकल्पिक उर्जा प्रवर्द्धन केन्द्र, ईन्भोटेक युके, ईन्भेस्टिनग्रिन लिमिटेड  लगायतका संस्थाहरूले सहजीकरण गरेका छन् । गाउँपालिका अध्यक्ष गण्डकी थापा अधिकारीले उक्त जलविद्युत परियोजना मार्फत सञ्चालित विद्युत उत्पादन पछि खेर गइरहेको पानीलाई सदुपयोग गरि हाइड्रोजन उत्पादन गरिने बताउनुभयो ।

पालिकामा  धेरै जलविद्युत छन विधुत उत्पादन पछि खेर गइरहेको पानीलाई सदुपयोग गरी ग्यास निकाल्न सकिने र उक्त ग्यास सिलिन्डर मार्फत नागरिकको घरघरमा पुग्ने गरी काम गर्ने लक्ष्य लिइएको बताउनु भयो ।
बढ्दो जलवायु परिवर्तनका बीच शतप्रतिशत स्वच्छ ऊर्जा मानिने ग्रीन हाइड्रोजनको महत्व र प्रयोग बढाउन र वैकल्पिक उर्जाको रुपमा यसको उत्पादन गर्ने योजना रहेको र त्यसका निम्ति गाउँपालिकाले आवश्यक लगानी गर्ने अध्यक्ष थापाको भनाई छ ।
जलविद्युत आयोजनामा हाइड्रोजन प्लान्ट निर्माण गरिनेछ । गाउँपालिकाका उपाध्यक्ष भिमसेन वनका अनुसार अहिले आवश्यक उपकरण, प्लान्ट ल्याउने काम हुँदैछ । योजना अनुसार काम सम्पन्न भएमा चाँडै  हाइड्रोजन उत्पादनको काम सुरु हुनेछ । सुरुवातमा गिरिङ्दी खोलाका उपभोक्ताहरूलाई चुल्हो र सिलिन्डर वितरण गरी यसको प्रयोगमा ल्याइने अध्यक्ष थापाले बताउनु भयो ।
अन्य उर्जाको तुलनामा सुरक्षित, वातावरणीय पर्यावरणलाई समेत असर नगर्ने हाइड्रोजन एलपी ग्यासको तुलनामा सस्तो हुने उहाँको भनाई छ । उत्पादित हाइड्रोजनलाई सिलिन्डर मार्फत उपभोक्ताहरूलाई वितरण गरिनेछ । मंगलबार हाइड्रोजन उत्पादन गर्ने लक्ष्यका साथ खर्बाङमा हाइड्रोजन द्धारा खाना पकाउने प्रविधि बारे प्रदर्शन गरिएको थियो  ।

हाईड्रोजनको महत्व र यसको व्यवसायिक उपयोगिता बारे जानकारी दिने उद्देश्यले परीक्षणको रुपमा काठमाण्डौबाट ल्याइएको हाइड्रोजनबाट खाना पकाएर नमुना प्रदर्शन गरिएको हो । उक्त कार्यक्रममा सहभागि भएका नागरिकले सहज र सस्तो मूल्यमा ग्यास पाइने भएपछि आर्थिक रुपमा निकै राहत हुने बताएका थिए । 

सालझण्डी देखि ढोरपाटन जोड्ने सडक खण्ड अन्तरगत बागलुङको बुर्तिबाङ देखि ढोरपाटन सम्मको सडक निर्माणको काम समयमै नभएको भन्दै आयोजनाको कार्यालयमा डेलिगेसन जाने निर्णय भएको छ ।
ढोरपाटन नगरपालिकाको  टिम सहित यहाँ स्थित क्रियाशील राजनैतिक दलको टोली आगामी जेठ ४ गते सडक आयोजनाको कार्यालयमा धर्ना दिने तयारी सहित डेलिगेसन जाने विषयमा निर्णय भएको ढोरपाटन नगरपालिका कार्यवाहक मेयर धन बहादुर कायत ( कल्याण)ले बताउनु भयो ।
२०७८ कात्तिक ५ गते ठेक्का सम्झौता भई बुर्तिबाङ–ढोरपाटन जोड्ने सडक अन्तरगत ३० महिनामा स्टान्डर्ड ग्राभेलिङ सहितको काम सम्पन्न गर्ने लक्ष्य लिएको निर्माण कम्पनीले सम्झौता अवधि सकिँदा सम्म पनि ३० प्रतिशत काम नसकेपछि स्थानीय बासिन्दा आक्रोशित बन्दै गएका हुन ।
पर्यटकीय दृष्टिकोणले प्रचुर सम्भावना बोकेको ढोरपाटन क्षेत्र बुर्तिबाङ बजार देखि उपत्यका सम्म जम्मा ३२ किलोमिटर सडक छ ।
निर्माण कम्पनीले २२ किलोमिटर सडक फराकिलो र ग्राभेलिङ गर्ने जिम्मा पाएपनि निर्धारित समयमा काम नहुँदा त्यहाँका स्थानीय नागरिक सँगै ढोरपाटन पुग्ने आन्तरिक तथा बाह्य पर्यटकले सडक सास्ती भोग्दै आएका हुन ।

उक्त सडक आयोजना निर्माणको जिम्मा संकर माली निर्माण कम्पनी मार्फत ओम बुद्ध जेभी बसुन्धाराले पाएको थियो । उक्त सम्पनीले समेत अर्का तेश्रो पक्षलाई कामको जिम्मा दिएको पाइएको छ ।

आफूहरूले आयोजना कार्यालय र निर्माण कम्पनीलाई पटक पटक आग्रह र सम्मोन्य गर्दा समेत सडक निर्माणको काम निकै सुस्त भएपछि जेठ ४ गते आयोजनाको कार्यालय र काठमाण्डौ स्थित सडक विभाग, अर्थ मन्त्रालय लगायतका निकायमा पुगेर ध्यानाकर्षण गराउने तयारी गरिएको कार्यवाहक मेयर कायतले बताउनु भयो । 

डेलिगेसन टोलीले जेठ ४ गते शुक्रबार आयोजनाको कार्यालय सन्धिखर्क गएर ध्यानाकर्षण गराउने र काठमाण्डौमा पुगेर समेत ध्यानाकर्षण गराउने गरि छलफल भएको बताउँदै उक्त अभियानमा ढोरपाटन नगरपालिका जनप्रतिनिधि, प्रदेश र संघका रहेका यस क्षेत्रबाट निर्वाचित माननीय  र यहाँ क्रियाशील राजनैतिक दललाई सँगै लिएर जाने कार्यक्रम तय गरिएको बताउनु भयो ।
बुर्तिबाङ आयोजित अन्तरकृया कार्यक्रममा बोल्ने सहभागीहरूले निर्माण कम्पनीको लापरबाहीले गर्दा समयमा काम नभएको र अझै म्याद थप गर्दा सोही कम्पनीले काम गर्न नसक्ने बताउँदै त्यसको विषयमा गम्भिर ध्यानाकर्षण र खबरदारी आवश्यक रहेको बताएका छन ।
कार्यक्रममा नेकपा एमालेका टंक प्रसाद पौडेल, स्थानीय अशोक बिक, राम बहादुर घर्ती, गुञ्ज बहादुर भण्डारी, ज्ञान प्रसाद कँडेल, कुशल बिक , कार्यपालिका सदस्य दिलिप बिक वडा अध्यक्ष धन बहादुर अदै, दिपेन्द्र पुन लगायतले बोल्दै सम्बन्धित निकायमा खबरदारी नगर्दा सम्म सडक निर्माणको कामले गति लिन नसक्ने बताएका थिए ।

आयोजित कार्यक्रममा  जनप्रतिनिधि, राजनैतिक दलका प्रतिनिधि, स्थानीय बासि लगायतको उपस्थिति रहेको थियो ।