Home Blog

सरकारी कार्यालयको भवन निर्माण गर्न जग्गा खरिदका निम्ती आर्थिक संकलनमा उत्रियो समिति । 

बागलुङको बुर्तिबाङमा सरकारी कार्यालयको भवन निर्माणका निम्ती जग्गा व्यवस्थापन गर्न बनेको समितिले आर्थिक सङ्कलन अभियानलाई सुचारु गर्ने तयारीमा जुटेको छ ।

यहाँस्थित इलाका प्रशासन, मालपोत र नापी कार्यालय हालसम्म भाडाको घरबाट सञ्चालन रहँदै आएको अवस्थामा जसरी पनि जग्गा व्यवस्थापन गर्नुपर्ने ताकेता सृजना भएसँगै जग्गा व्यवस्थापन समितिले करिब ६ महिना लगाएर जग्गा व्यवस्थापन गरेसँगै अब उक्त जग्गा खरिद प्रकृया अगाडि बढाउनका निम्ती आर्थिक सङ्कलन अभियान सुरु गरिएको हो ।

आइतबार ढोरपाटन नगरपालिका वडा नम्बर १ को कार्यालयमा जग्गा व्यवस्थापन समितिका अध्यक्ष धन बहादुर कुवँरको अध्यक्षतामा वडाका जनप्रतिनिधि, टोल विकास संस्थाका पदाधिकारी बिच बसेको बैठकले विभिन्न स्थानमा जग्गा खरिदका निम्ती खोजिएको जग्गा मध्ये बुर्तिबाङ कर्वड हलको छेउको २२ आना जग्गा र हाल ढोरपाटन नगरपालिका कार्यालय रहेको घरको आडमा रहेको १२ आना जग्गा खरिद बिक्रीका निम्ती योग्य रहेको भन्दै उक्त जग्गा खरिदका निम्ती बजार बासिबाट आर्थिक सङ्कलन गर्ने र जग्गा खरिदका निम्ती अगाडि बढ्ने विषयमा समिति अगाडि बढेको पाइएको छ ।

गुञ्ज बहादुर भण्डारी संयोजक रहेको आर्थिक सङ्कलन समितिले अब तत्काल बजारका सबै घरधुरीबाट आर्थिक सङ्कलन गर्ने र करिब ३ करोड आर्थिक सङ्कलन गरी दुई स्थानमा जग्गा खरिद गर्ने तयारी सुरु भएको जग्गा व्यवस्थापन समिति संयोजक धन बहादुर कुवँरले बताउनु भयो ।

बजार क्षेत्रमा कार्यालय रहने स्थान आसपास र अन्यत्र स्थानमा घर जग्गा भएकालाई फरक फरक मूल्य निर्धारण गरिएको छ । ए प्लस, ए, वि प्लस, वि, सि र डि क्याटेगोरीमा वर्गीकरण गरेर घर र जग्गा भएका व्यक्तिबाट रकम सङ्कलन गर्ने तयारी अगाडि बढिसकेको जनाईएको हो ।

भवन निर्माणका निम्ती जग्गा खरिद गर्न राज्यले बजेट व्यवस्था नगर्ने र लामो समयदेखि भाडामा रहेका सरकारी कार्यालयको भवन बनाउन निरन्तर राज्यबाट दबाब सृजना भइसकेपछि विगत दुई वर्षदेखि जग्गा खरिदको विषयले प्राथमिकता पाएको थियो ।

आर्थिक सङ्कलनका निम्ती बैँक खाता खालेर प्रकृया अगाडि बढिसकेका कारण टोल विकास संस्थाका पदाधिकारी, समाजसेवी लगायत रहेको आर्थिक सङ्कलन उपसमिति समेत गठन गरिएको छ ।

मालपोत, नापी र इलाका प्रशासन कार्यालयको भवन निर्माणका निम्ती यसवर्ष जग्गा व्यवस्थापन पुरा गर्ने गरि तयारी अगाडि बढाइएको समितिका सचिव ज्ञान प्रसाद कँडेलले बताउनु भयो ।

दुर्गम कुदुम गाउँमा पुल बनेपछि स्थानीय खुसी ।

 साउन ३ गते बुर्तिबाङ

बागलुङको ढोरपाटन नगरपालिका ६ को भौगोलिक रूपले दुर्गम रहेको कुदुम गाउँमा झोलुङ्गे पुल बने संगै स्थानीय नागरिक खुसी भएका छन ।

पुर्खादेखि काठको साँघुबाट एक गाउँ देखि अर्को गाउँसम्म वारपार गर्दे आइरहेका स्थानीय बासिन्दाले गाउँमा यति छिटै झोलुङ्गे पुल बन्ला भन्ने कल्पना समेत नगरेकोमा गण्डकी प्रदेश सभा सदस्य माननीय दोर्ण कुमार कुवँरले यहाँका जनताको समस्या र आवश्यकतालाई सम्बोधन गरिदिएकोमा धन्यबाद मात्र दिएनन् फुल मालाले समेत भव्य सम्मान गरेका हुन ।

“ढोरपाटन नगरपालिका ६ का वडा सदस्य ज्ञान बहादुर भण्डारीले बोल्दै भन्नुभयो माननीयले जनअपेक्षा बमोजिम काम गरिदिनुभएको छ काठको साँघु तर्दा बर्सातको समयमा निकै जोखिम थियो ।

स्कुले बालबालिकालाई स्कुल आउजाउ गर्न पनि कठिन थियो अहिले पुल बनेपछि सबैलाई हाइसन्चो भयो भण्डारीले भन्नुभयो । ” कुल ७६ मिटर लम्बाइ रहेको उक्त पुलबाट भण्डारी गाउँ र कुदुम गाउँका नागरिकले यात्रा गर्न पाउने छन ।

ढोरपाटन नगरपालिका ६ का अध्यक्ष उमेश कुमार बुढाको अध्यक्षतामा आयोजित कार्यक्रममा प्रमुख अतिथिको रुपमा रहनु भएको सांसद दोर्ण कुमार कुवँरले बोल्दै सुगम देखि दुर्गम सम्म आफूले विकास गर्ने बताउँदै जनताको समस्या, आवश्यकता र महत्व आफ्नो पहिलो प्राथमिकता रहेको बताउनु भयो ।

कार्यक्रममा गण्डकी प्रदेश सभा सांसद दिलमाया पौवीले समेत अब महिलाको हक अधिकार र आयआर्जन सँग जोडिने कार्यक्रमलाई पनि जोड्दै जाने बताउनु भयो ।

कार्यक्रममा स्वास्थ्य कर्मी केशव थापा, लगायतको मन्तव्य रहेको थियो । कार्यक्रम हिक्मत भण्डारीले सञ्चालन गर्नुभएको हो ।

गाजा खेतीलाई वैधानिक बनाउन पहल गछौँ: सांसद कुँवर ।

 साउन ३ गते बुर्तिबाङ

गण्डकी प्रदेश सभा सदस्य माननीय दोर्ण कुमार कुँवरले नागरिकको आर्थिक आर्जनको राम्रो माध्यम रहेको गाँजा खेतीको व्यवसायिक उत्पादनका निम्ती आफूहरूले निरन्तर पहल गर्ने बताउनु भएको छ ।

बुधबार बागलुङको निसीखोला गाउँपालिका ६ मा ऐतिहासिक साउने सक्रान्ती ठाम राम मेलामा प्रमुख अतिथिको रुपमा रहनु भएको सांसद कुवँरले गाँजाको उत्पादनबाट त्यसको दानाबाट मनग्य आम्दानी गर्न सकिने र डाँठ, बोक्राबाट विभिन्न सामाग्री उत्पादन गर्न सकिने भएका कारण गण्डकी प्रदेश सरकारले समेत आवश्यक कार्यविधि बनाई रहेका कारण त्यसका निम्ती आफूहरूले निरन्तर पहल गर्ने बताउनु भयो ।

बागलुङको निसी भल्कोट, बडिगार्ड लगायत विभिन्न स्थान गाँजा उत्पादन क्षेत्रका निम्ती राम्रो ठाउँ भएको बताउँदै निश्‍चत क्षेत्र तोकेर गाँजा खेती उत्पादन वृद्धिमा अगाडि बढ्न पहल गरिने बताउनु भयो । साँसद कुवँरले थप बोल्दै निसी भल्कोट कला संस्कृति र भेषभुषामा अगाडि रहेको बताउँदै यहाँको कला संस्कृतिको जर्गेनामा स्थानीय समुदाय संगै आफूहरूले समेत पहल गर्ने बताउँदै यहाँको भुमे पुजा, माघी मेला, ठाम राम मेला ऐतिहासिक संस्कृतिको रुपमा रहेको बताउनु भयो ।

फरक प्रसंगमा बोल्दै साँसद कुवँरले जनताको समस्या र आवश्यकतालाई मध्यनगर गर्दे आफूहरूले क्रमिक रुपमा विकास गर्दे आइरहेको बताउँदै जनताको समस्यामा आफुहरु सँधै हातेमालो गरेर विकास निर्माण अगाडि बढ्ने बताउनु भयो । स्थानीयले उठाउँदै आएको ढोरपाटन सिकार आरक्षलाई बनाउने भन्ने विषयमा जनताको मुद्धा, जनताको आवाज र जनताको जनजिविका भन्दा बाहिर गएर आफूले कहिल्यै निर्णय नगर्ने बताउनु भयो ।

सांसद कुवँरले कसैले भ्रम छर्दैमा आफूहरू जनता भन्दा बाहिर गएर कुनै निर्णय गर्न नसक्ने प्रस्ट पार्नुभयो । उत्तर गँगा जलाशय युक्त आयोजना निर्माणमा नागरिकको धैरै चासो र चिन्तन रहेको बताउँदै उत्तर गँगा जलाशय प्रोजेक्ट राष्ट्रिय गौरवको आयोजनाको रुपमा रहेको र अहिले इआईए वातावरणीय मूल्याङ्कनको प्रकृयामा रहेको बताउँदै जलाशय युक्त आयोजना जुन कुनै हालतमा चाँडै बन्ने बताउँदै संघ र प्रदेशले समेत प्राथमिकता दिएर अगाडी बढेको बताउनु भयो । यसलाई अझै गतिका साथ अगाडि बढाउन आफूहरू सक्रिय पूर्वक लागिरहेको बताउनु भयो ।

त्यस्तै कार्यक्रममा विशिष्ठ अतिथी गण्डकी प्रदेश सांसद दिलमाया पौवीले बोल्दै निसी भल्कोटमा मगर दलित समुदायले मनाउँदै आएको ऐतिहासिक कला संस्कृति सहितको मेलाको उत्तिकै महत्व रहेको बताउँदै यसको संरक्षण र जर्गेना गर्ने विषयमा आफूहरू सचेत रहेको बताउनु भयो । सबै जातजाती मिलेर यस्ता महत्वपूर्ण कला संस्कृतिको जर्गेना गर्नुपर्ने बताउँदै यहाँको विकास र निकासमा आफुहरुले नागरिक संग सम्मोन्य गरेर अगाडि बढिने बताउनु भयो ।

कार्यक्रममा विशिष्ट अतिथिको रुपमा रहनुभएका निसीखोला गाउँपालिका अध्यक्ष सुर्य बहादुर घर्तिले बोल्दै निसीखोला बाईसे चौविसे राज्य हुँदै गर्दादेखि मगर समुदायले पुर्खाेँ पुर्खादेखि साउने सक्रान्ती पर्व मनाउँदै आएको र आफूहरूले यहाँको कला र संस्कृति जर्गेना गर्नका निम्ती यस्ता महत्वपूर्ण कार्यक्रम गर्दे आएको बताउनु भयो ।

कार्यक्रममा ठाम राम बनाएर एक आपसमा खुसियाली साटासाट गरेर यो महान पर्व मनाउने र पितृको सम्झनामा विभिन्न परिकार बनाएर चढाउने र हर्षउल्लसका साथ पर्व मनाउँदै आएको बताउनु भयो । कार्यक्रममा जनप्रतिनिधी, समाजसेवी, लगाएतको आतिथ्यता एवम् शुभकामना मन्तव्य रहेको थियो ।

रिग युवा क्लबको आयोजनामा सुरु भएको कार्यक्रम विभिन्न खेलकुद एवम् साँस्कृर्तिक कार्यक्रम सहित सञ्चालन हुने छ । क्लब अध्यक्ष भुवातसिंह घर्तिको अध्यक्षतामा आयोजित कार्यक्रम सचिब अनुप बुढाको सञ्चालमा सम्पन्न भएको थियो ।

ढोरपाटनका प्रमुख प्रशासकीय अधिकृत विष्णु प्रसाद ज्ञवालीको बिदाइ ।

 

साउन १ गते बुर्तिबाङ

ढोरपाटन नगरपालिकाका प्रमुख प्रशासकीय अधिकृत विष्णु प्रसाद ज्ञवालीलाई मङ्गलबार बिदाई गरिएको छ ।

२०७९ असोज ५ गते ढोरपाटन नगरपालिकामा प्रमुख प्रशासकीय अधिकृतको रुपमा आउनु भएका ज्ञवालीको अर्थ मन्त्रालय अन्तरगत महालेखा नियन्त्रकको कार्यालयमा सरुवा भएसँगै नगरपालिकाले मङ्गलबार एक कार्यक्रमका बिच बिदाई गरेको हो ।

दुई महिना पहिलेनै सरुवाको पत्र आएपनि नगरपालिकामा आर्थिक वर्षको अन्त्य तर्फ रहँदै गर्दा प्रमुख प्रशासकीय अधिकृत बिहिन हुने अवस्था आएपछि गत आर्थिक वर्षको कार्यसम्पादन सकेर सरुवा हुनुभएको हो ।

बिदाई कार्यक्रममा बोल्दै ढोरपाटन नगरपालिका कार्यवाहक मेयर धन बहादुर कायत ले बोल्दै प्रमुख प्रशासकीय अधिकृत विष्णु प्रसाद ज्ञवाली एक कुशल व्यक्ति रहेको बताउँदै उहाँ आएपछि नगरपालिकाको प्रशासनिक व्यवस्थापन धेरै राम्रो हुँदै गएको बताउँदै यहाँबाट सरुवा भएर गएपनि आगामी कार्यकालको सफलताको कामना व्यक्त गर्नू भयो ।

२२ महिना सम्म ढोरपाटन नगरपालिकामा प्रमुख प्रशासकीय अधिकृतको जिम्मेवारी सम्हालेका ज्ञवालीले कर्मचारी व्यवस्थापन देखि आफ्नो जिम्मेवारी कुशलता पूर्वक सम्पन्न गरेको स्थानीय नागरिकको भनाई छ । मङ्गलबार नै नगरपालिकामा कार्यरत इन्जिनियर सन्तोष पौडेललाई बिदाई गरिएको छ ।

ज्ञवालीको सरुवा सँगै प्रमुख प्रशासकीय अधिकृत विहीन  नगरपालिका 

ढोरपाटन नगरपालिकामा प्रमुख प्रशासकीय अधिकृत विष्णु प्रसाद ज्ञवालीको सरुवा भएसँगै नगरपालिका प्रमुख प्रशासकीय अधिकृत विहीन बनेको छ ।

हाललाई सिनियर तहको कर्मचारी नभएका कारण निमित्तको भरमा शिक्षा शाखा प्रमुख गणेश रावललाई जिम्मेवारी दिने तयारी रहेको बुझिएको छ । प्रमुख प्रशासकिय अधिकृतको व्यवस्था हुने झण्डै एक महिना लाग्ने सक्ने बताइएको हो । 

नागरिकको सहजताका लागी निसीखोला गाउँपालिकाले नगर बस सञ्चालनमा ल्याउने ।

फाईल फोटो

साउन १ गते बुर्तिबाङ

बागलुङको निसीखोला गाउँपालिकाले नगर बस सञ्चालनमा ल्याउने भएको छ । पालिकाको सोमबार सम्पन्न भएको आर्थिक बर्ष २०८१÷०८२ को १४ औँ गाउँसभाबाट बस खरिद गर्ने विषयलाई सदनबाट पारित गर्दे बस सञ्चालनमा ल्याउने गरी ८० लाख बजेट विनियोजन गरिएको गाउँपालिका अध्यक्ष सूर्य बहादुर घर्तिले बताउनु भयो ।

निसीखोला गाउँपालिका अन्तरगत ७ वटै वडाका नागरिकलाई पायक पर्ने गरि दैनिक रुपमा बस सञ्चालनमा ल्याउने गरी बजेट विनियोजन गरिएको र बस सञ्चालनमा आएपछि निसीखोला गाँउपालिका अन्तरगतका विपन्न असहाय, आर्थिक रुपमा कमजोर रहेका नागरिकका निम्ती सहज र आर्थिक रुपमा राहत मिल्ने अपेक्षा लिइएको अध्यक्ष घर्तिको भनाई छ ।

“सभाबाट बजेट विनियोजन गरिएको छ कार्यबिधी बनाएर चाँडै सञ्चालनमा ल्याउने छौँ मध्ये पहाडी लोकमार्गले आधिकांश वडा छोएका कारण सबै वडाका नागरिकले सेवा प्राप्त गर्न सक्ने अध्यक्ष घर्तिको भनाई छ ।

निसीखोला गाउँपालिकाका नागरिकलाई पालिका सदरमुकाम आउन जान तथा प्रशासनिक कार्यका निम्ती बुर्तिबाङ बजार सम्म आउन जानका निम्ती समेत सहज हुने र अन्य सवारीमा भन्दा बसमा यात्रा गर्दा आर्थिक भार समेत कम पर्ने अपेक्षा गरिएको बताइएको छ ।

ढोरपाटन नगरपालिकाको १५ औँ नगरसभा विहीबार सकियो ।

बुर्तिबाङ असार २७ गते बिहीबार

ढोरपाटन नगरपालिकाको १५ औँ नगरसभा विहीबार सम्पन्न भएको छ ।

गत असार ७ गते आर्थिक बर्ष २०८१÷०८२ को निती कार्यक्रम र बजेट लिएको नगरपालिकाले विहीबार आर्थिक विधेयक माथिको प्रस्तावलाई पारित गर्दे नगरसभा सम्पन्न गरेको हो । ढोरपाटन नगरपालिका कार्यवाहक मेयर धन बहादुर कायतको अध्यक्षतामा आयोजित नगरसभामा लेखा समिति सदस्य गोपाल महतले प्रस्तुत गर्नुभएको आर्थिक विवरण माथि सभामा छलफल भई सभाबाट पास गरेसँगै सभा सम्पन्न गरिएको हो ।

आर्थिक प्रतिवेदन अनुसार पछिल्लो आर्थिक वर्षमा नगरपालिकामा बेरुजु रकम विगतको तुलनामा घट्दै गएको, आन्तरिक कर्मचारी बढि राखिएका कारण विकास बजेटको भार पाँच देखि छ करोड सम्म कर्मचारी व्यवस्थापनमा खर्च भएको पाइएको छ ।

आर्थिक विधेयक माथि छलफलको प्रस्ताव माथि कार्यवाहक मेयर धन बहादुर कायतले बोल्दै नगरपालिकामा स्वास्थ्य र शिक्षा तर्फ कर्मचारी कम हुँदै सबैभन्दा बढि भार कर्मचारी व्यवस्थापनमा रहेको बताउँदै यसबर्ष देखि कुनै पनि क्षेत्रमा आवश्यकता भन्दा बढि कर्मचारी भए कम गर्ने र अति आवश्यक रहेको स्थानमा थप गर्ने गरी आवश्यक तयारी गरिएको बताउँदै सबै वडामा पुगेर अनुगमन गरिने बताउनु भयो ।

कार्यवाहक मेयर कायतले आर्थिक विधेयक माथिको प्रस्तावलाई छलफलमा लिएपनि कुनैपनि नगर सदस्यले प्रतिकृया नजनाएपछि उक्त प्रस्ताव सभाबाट पारित गरिएको हो । त्यस्तै नगरसभाले विनियोजन विधेयक पास गरिसकेको थियो ।

ढिक्का बजेट लिएको पालिकाले वडा गत योजनाको सिलिङ अनुसार चाँडै तयारी पुरा गरेर रातो किताब निकाल्ने गरी आवश्यक तयारी गरिरहेको जनाइएको छ । सभाको अवसरमा चालु बर्षमा उत्कृष्ट कार्यसम्पादन गर्ने कर्मचारीलाई सम्मान गरिएको छ ।

सम्मान प्राप्त गर्नेमा प्रमुख प्रशासकीय अधिकृत विष्णु प्रसाद ज्ञवाली, सूचना अधिकारी दिपक विश्वकर्मा, सहायक लेखापाल प्रतीक घर्ति, कार्यालय सहयोगी संगिता भुसाल र बोम बहादुर कुमाललाई प्रशंसा पत्र सहित सम्मान गरिएको थियो ।

कार्यक्रममा ९ वटै वडाका अध्यक्ष, कार्यपालिका सदस्य, नगरसभा सदस्य, कर्मचारी लगाएतको उपश्थिती रहेको थियो ।

वडा नम्बर ९ का अध्यक्ष खिम बहादुर घर्तिको स्वागत, हिरालाल खनालको सञ्चालनमा सम्पन्न भएको हो । 

बागलुङको तितौरेमा घर पुरिँदा एक जनाको मृत्यु

बागलुङ नगरपालिका–७ तितौरेमा पहिरोले घर पुरिदा एक जानको मृत्यु भएको छ । विहीबार राती साढे १२ बजे घर माथिदेखि पहिरो खस्दा पुरिएर स्थानीय अन्दाजी ५५ वर्षीया खिलकुमारी शर्माको मृत्यु भएको हो ।

घरमा एक्लै बस्दै आउनु भएकी शर्माको सुतेको बेला पहिरो खस्दा पुरिएर मृत्यु भएको बागलुङ नगरपालिका–७ का अध्यक्ष मेघनाथ गैरेले जानकारी दिनुभयो ।

विहान छिमेकीले थाहा पाएपछि प्रहरी र जनप्रतिनिधिलाई खबर गरेपछि अहिले घटनास्थल तर्फ जाँदै गरेको उहाँको भनाइ छ । वर्षाका कारण बाटो बिग्रिएको हुँदा प्रहरी अझै घटनास्थलमा पुग्न नसकेको अध्यक्ष गैरे बताउनुहुन्छ ।

उहाँले भन्नुभयो – “उहाँ घरमा एक्लै बस्दै आउनु भएको थियो, राति ठूलो पानी प¥यो, घरमाथिबाट एक्कासी पहिरो झर्दा पुरिनु भएछ, विहान छिमेकीले थाहा पाएपछि बल्ल हामीले जानकारी पायौँ, अहिले प्रहरीसहित हामीहरु जाँदै छौँ, रातको समयमा हुँदा पहिरोले पु¥यो, उहाँको घर वरपर खास्सै बस्ती छैन, तत्कालै उद्धारसमेत हुन पाएन ।”

मध्यपहाडी लोकमार्गको बागलुङ खण्ड गल्कोटमा अवरुद्ध

असार २६ बागलुङ

अविरल वर्षाका कारण सडक माथिबाट आएको लेदो सहितको पहिरो खस्दा मध्यपहाडी लोकमार्गको बागलुङ खण्ड अवरुद्ध भएको छ । बागलुङको गलकोट नगरपालिका–१ दुदिलाभाटी झाँक्रीस्थानमा सडक माथिदेखि पहिरो खस्दा बाटो अवरुद्ध भएको हो ।

सडकमा लेदोसहितको पहिरो आउँदा गए रातीदेखि नै सडक अवरुद्ध भएको जिल्ला प्रहारी कार्यालय बागलुङका प्रहरी नायब उपरिक्षक विजय यादवले जानकारी दिए । पहिरो हटाएर सडक खुलाउने प्रयास भइरहे पनि केही समय लाग्ने उनले बताए ।

लोकमार्ग अवरुद्ध हुँदा पश्चिम बागलुङसहित पूर्वी रुकुम, पश्चिम रुकुम र जाजरकोटदेखि पोखरा काठमाडौँ जाने यातायातका साधन ठप्प भएका छन् । पहिरोकै कारण काठामाडौँदेखि आएका रात्री बससमेत बाटोमै रोकिँदा यात्रु अलपत्र परेका छन् ।  वर्षा निरन्तर भएका कारण सडक सुचारु गर्न कठिनाई भएको छ ।

पहिरोकै कारण कालिगण्डकी करिडोर पनि ५ दिन देखी अवरुद्ध भएको छ । बागलुङ नगरपालिका—१० भकुण्डे दब्ल्याङको पहिरोका कारण करिडोरसँगै दक्षिण बागलुङ जोड्ने अन्य सडक पनि अवरुद्ध भएका छन् ।

ढोरपाटन सिकार आरक्षको राजश्वमा बृद्धि ।

बुर्तिबाङ असार २४ गते

ढोरपाटन सिकार आरक्षमा पछिल्लो समय राजश्व सङ्कलनमा वृद्धि हुँदै गएको छ । विशेष गरी विदेशी पर्यटकले सिकार गर्दे आइरहेको ढोरपाटन शिकार आरक्षमा प्रत्यक बर्ष सिकार खेल्ने पर्यटकको सँखया वृद्धि हुँदै जानु र सिकार टेन्डरको मूल्य वृद्धि हुँदै जाँदा राजश्वमा वृद्धि हुन थालेको हो । ढोरपाटन सिकार आरक्ष बागलुङ, म्याग्दी र रुकुम जिल्लामा पर्दछ ।

दुई सिजनमा हन्टिङको निम्ती टेन्डर आव्हान गरेर उक्त क्षेत्रमा नाउर र झारलको सिकार गर्ने गरिन्छ । बैशाख र असोज महिनामा सिकार याम सुरु हुँदै गर्दा नाउर र झारलको सिकार भएको हो । विशेष गरी ८ वटा कम्पनी दर्ता भई उक्त कम्पनी मार्फत सिकारीले टेन्डर मार्फत सिकार खेल्ने गरेका हुन । विदेशीका निम्ती सिकार शोखिनको पाटो हुँदै गर्दा निश्चित कोटा खुलाएर सिकार आरक्ष भित्र रहेका बन्य जन्तुको सिकार हुँदै आएको छ ।

गत आर्थिक बर्षमा कुल ३ करोड ४८ लाख राजश्व सङ्कलन गरेको सिकार आरक्ष कार्यालयले आर्थिक बर्ष २०८०÷०८१ मा राजश्व वृद्धि गर्न सफल भएको हो । चालु आर्थिक बर्षमा कुल ४ करोड २६ लाख ८८ हजार सिकारबाट , पर्यटक प्रवेश शुल्कबाट बाट १३ लाख ,काठ दाउरा र नदीजन्य पदार्थको पुर्जीबाट २० लाख ९३ हजार र सिकारी ल्यान्ड हुँदै गर्दा हेली कप्टर अवतरण शुल्क ५७ हजार गरी कुल ४ करोड ६२ लाख ३० हजार राजश्व सङ्कलन हुन सफल भएको ढोरपाटन सिकार आरक्ष कार्यालयका सूचना अधिकृत मन्दिप पँगेनीले बताउनु भयो ।

आवाज मन्दिप पँगेनी सिकार आरक्षभित्र हाल एक हजार दुई सय ९० नाउर र ७ सय ४४ वटा झारल रहेका छन । प्रत्यक पाँच वर्षमा उक्त जनावरको गणना हुँदै आएको छ । चालु आर्थिक वर्षमा २४ वटा सम्म नाउर र १४ झारल सिकारको कोटा खुल्ला गरिएकोमा १८ झारल र ११ नाउर गरी ३० वटा जनावरको सिकार भएको अधिकृत पँगेनीले बताउनु भयो । सिकार आरक्षभित्र हाल एक हजार दुई सय ९० नाउर र ७ सय ४४ वटा झारल रहेका छन ।

प्रत्यक पाँच बर्षमा उक्त जनावरको गणना हुँदै आएको छ । चालु आर्थिक बर्षमा २४ वटा सम्म नाउर र १४ झारल सिकारको कोटा खुल्ला गरिएकोमा १९ झारल र ११ नाउर गरी ३० वटा जनावरको सिकार भएको अधिकृत पँगेनीले बताउनु भयो ।

ढोरपाटनकी मिनाको सुत्केरी पछि अवस्था जटिल बन्दै गएपछि हेली मार्फत उद्धार ।

असार २४ गते बुर्तिबाङ

सुत्केरी पछि जटिल स्वास्थ्य समस्या देखिएपछि ढोरपाटन नगरपालिका ५ की मिना बिकलाई थप उपचारका लागी हेलिकोप्टर मार्फत काठमान्डौ रिफर गरिएको छ ।

आइतबार साँझ सुत्केरी बेथा लागेपछि बुर्तिबाङ स्वास्थ्य केन्द्र आएकी २८ बर्षिया मिनाको गर्भमा रहेको बच्चा चल्न छोडेपछि स्वास्थ्य कर्मीको टिमले मृत अवस्थामा बच्चा रातिनै निकाल्न सफल भएपनि आमाको अवस्था जटिल बन्दै गएपछि थप उपचारका निम्ती काठमान्डौ पठाइएको जनस्वास्थ्य निरीक्षक केशव थापाले बताउनु भयो ।

आमाको प्रेसर अत्याधिक कम भएपछि यहाँ प्रारम्भिक उपचार गरिएको र उहाँको अवस्था जटिल हुँदै जान थालेपछि पोखराबाट हेली मगाउने तयारी गर्दे गर्दा मौसमले साथ नदिएपछि काठमाण्डौबाट हेली मगाएर सोमबार साँझ मात्रै उद्धार गरिएको बुर्तिबाङ स्वास्थ्य केन्द्रका प्रमुख नविन्द्र ढकालले बताउनु भयो । 

सोमबार बिहान देखि स्थास्थ्यमा थप जटिल समस्या आउन थालेपछि उद्धार गरिएको हो ।

ढोरपाटन नगरपालिका कार्यवाहक मेयर धन बहादुर कायत र स्वास्थ्य कर्मीको  पहल गण्डकी प्रदेश सभा सदस्य माननिय दोर्ण कुमार कुवँरको सक्रियतामा राष्ट्रपती महिला उत्थान जिविको पार्जन सुधार कार्यक्रम अन्तगत हेली मगाइएको जनाइएको छ ।


गृह मन्त्रालय मार्फत नेपाली सेनाको हेलिकप्टर मगाएर सुत्केरी महिलाको साँझपख मात्रै उद्धार गरिएको बागलुङका प्रमुख जिल्ला अधिकारी नेत्र प्रसाद सुवेदीले जानकारी दिनुभयो ।