कृषि उत्पादन, बजारीकरण र पोषण सुधारलाई प्राथमिकतामा राख्दै वडा कार्यालयको नमुना पहल
बागलुङ । बागलुङको वडिगाड गाउँपालिका–९ ले कृषकको आयआर्जन वृद्धि, कृषि उत्पादनको प्रवर्द्धन तथा पोषण सुधारलाई लक्षित गर्दै नयाँ नमुना अभियान सुरु गरेको छ। आइतबार कृषक, स्थानीय अगुवा तथा सरोकारवालाको सहभागितामा अभिमुखीकरण तथा अन्तरक्रिया कार्यक्रम आयोजना गरी ‘लैनो भैँसी तथा हलगोरु स्याहार र किसानको कोशेली–सुत्केरी दिदीबहिनी’ कार्यक्रम औपचारिक रूपमा शुभारम्भ गरिएको हो।
कार्यक्रमलाई सम्बोधन गर्दै वडा अध्यक्ष कृष्णबहादुर के.सी. ले कृषकलाई व्यावसायिक कृषि तथा पशुपालनतर्फ आकर्षित गर्दै आर्थिक रूपमा सबल बनाउने उद्देश्यले भैँसीपालन कार्यक्रमलाई प्राथमिकतामा राखिएको बताउनुभयो। उहाँले दुध, दही, घिउ, मोही लगायत दुग्धजन्य उत्पादनमार्फत कृषकको आम्दानी बढाउने लक्ष्यसहित लैनो भैँसी र हलगोरु स्याहार कार्यक्रम अघि बढाइएको जानकारी दिनुभयो।
वडाले लैनो भैँसी र हलगोरु पाल्ने किसानलाई प्रोत्साहन रकम उपलब्ध गराउनुका साथै पशु बीमा कार्यक्रमसमेत सञ्चालन गरेको जनाएको छ। गाउँमा डेरी आमा समूह गठन गरी कार्यक्रमलाई प्रभावकारी बनाइएको छ।
चालु आर्थिक वर्षभित्र वडामा १५० वटा लैनो भैँसी पालन गर्ने लक्ष्य राखिएको छ। त्यसका लागि प्रति कृषक ७ महिनासम्म मासिक दुई लिटरका दरले घिउ डेरी समूहमार्फत खरिद गरिने व्यवस्था गरिएको छ। वडाभर २,१०० लिटर घिउ संकलन हुँदा किसानले करिब ३१ लाख रुपैयाँ आम्दानी गर्ने अपेक्षा गरिएको छ।
यस्तै, वडामा हाल ५५ परिवार हलगोरु पालनमा संलग्न रहेका छन्। उनीहरूलाई थप व्यावसायिक बनाउन प्रोत्साहन कार्यक्रम सञ्चालन गरिने वडा कार्यालयले जनाएको छ।
स्थानीय उत्पादनको प्रवर्द्धन गर्दै वडाले गाउँमै उत्पादन हुने कुखुरा, अण्डा र घिउ सुत्केरी आमालाई घरमै पुगेर करिब ४ हजार रुपैयाँ बराबरको पोषिलो कोशेली उपलब्ध गराउँदै आएको छ। यसले स्थानीय उत्पादनको खपत बढाउनुका साथै सुत्केरी आमाको पोषण सुधारमा सहयोग पुग्ने विश्वास लिइएको छ।
वडाले बेसार, खुर्सानी, सिमी लगायतका कृषि उत्पादनमा आत्मनिर्भर बन्दै बजारीकरणको चरणमा प्रवेश गरेको जनाएको छ।
कार्यक्रममा सहभागी स्थानीयवासीले किसानमैत्री कार्यक्रमको खुलेर प्रशंसा गर्दै स्थानीय सरकारले कृषकको आवश्यकता पहिचान गरी कृषि उपजको बजारीकरण र आर्थिक सशक्तीकरणमा खेलेको भूमिकालाई सकारात्मक कदमका रूपमा लिएका छन्।
कार्यक्रममा स्थानीय अगुवा प्रताप कुँवर, निवर्तमान वडा अध्यक्ष कृष्णबहादुर खत्री, पत्रकार छविलाल पाण्डे, पत्रकार कमल पौडेल, मालारानी युवा क्लबका अध्यक्ष रमेश मल्ल, दर्लिङ स्वास्थ्य चौकी प्रमुख विमला खत्री, वडिगाड गाउँपालिका पशुपन्छी विकास शाखा प्रमुख डा. आशुतोष अधिकारी, राखीचौर टोल विकास संस्थाका अध्यक्ष तथा नमुना कृषक कुस्मा घर्ती, अगुवा कृषक बलबहादुर छन्त्याल, टेकबहादुर बुढाथोकी र क्याप्टेन ध्रुव मल्ल लगायतले आफ्नो धारणा राख्नुभएको थियो।
सोही अवसरमा पोषण सहजकर्ता सृजना केसीलाई सम्मान गरिएको थियो भने टोल विकास समितिका पदाधिकारीलाई सरसफाइ सामग्री पनि वितरण गरिएको थियो।
कार्यक्रम वडा सचिव विष्णु प्रसाद अर्यालको स्वागत मन्तव्य तथा पशु विकास प्राविधिक महेस गौतमको सञ्चालनमा सम्पन्न भएको थियो।
