ढोरपाटन नगरपालिकामा नगरस्तरीय बाल क्लब नेटवर्क गठन गरिएको छ। टिडिएच जर्मनको आर्थिक सहयोग तथा बिवाइसी बागलुङको विकास साझेदारीमा सञ्चालित ‘दिगो पर्यटन प्रवर्द्धन परियोजना’ अन्तर्गत करिना भण्डारीको अध्यक्षतामा १७ सदस्यीय ढोरपाटन नगरपालिका स्तरीय बाल क्लब नेटवर्क गठन गरिएको हो।
नवगठित समितिको उपाध्यक्षमा यमुना बिक, सचिवमा दिपिका रसाइली, सहसचिवमा बिक्की बेस छन्त्याल तथा कोषाध्यक्षमा अमिशा बिक चयन हुनुभएको छ। समितिका अन्य सदस्यहरूमा नगरभित्रका विभिन्न विद्यालय तथा बाल क्लबका प्रतिनिधिहरू रहेका छन्।
नवनिर्वाचित नेटवर्कले बाल अधिकारको संरक्षण र प्रवर्द्धन, बालमैत्री व्यवहार तथा वातावरण निर्माण, समाजमा विद्यमान बालविवाह, छुवाछुत, लैङ्गिक विभेद लगायतका सामाजिक कुरीतिहरूको अन्त्यका लागि सचेतनामूलक अभियान सञ्चालन गर्ने प्रतिबद्धता जनाएको छ। साथै वातावरण संरक्षण, दिगो पर्यटन प्रवर्द्धन तथा स्थानीय समुदायमा सकारात्मक परिवर्तनका लागि बालबालिकाको सक्रिय सहभागिता र नेतृत्वदायी भूमिका सुनिश्चित गर्दै अघि बढ्ने जनाएको छ।
कार्यक्रममा दिगो पर्यटन प्रवर्द्धन परियोजनाका कार्यक्रम निर्देशक उत्तम अर्याल, अनुगमन तथा मूल्याङ्कन अधिकृत विष्णु पौडेल, उद्यम विकास अधिकृत टेकबहादुर विक लगायतको उपस्थिति रहेको थियो।
कार्यक्रमको सहजीकरण सामाजिक परिचालन अधिकृत ओम शिर्पालीले गर्नुभएको थियो। उहाँका अनुसार बालबालिकाको क्षमता अभिवृद्धि गर्दै उनीहरूको नेतृत्व विकास, अधिकारको सुनिश्चितता तथा सामाजिक रूपान्तरणमा सक्रिय सहभागिता बढाउने उद्देश्यले नगरस्तरीय बाल क्लब नेटवर्क गठन गरिएको हो।
