ढोरपाटन, बागलुङ, साउन २
ढोरपाटन नगरपालिकाको प्रमुख पर्यटकीय क्षेत्र नवी गाउँमा दिगो पर्यटन प्रवर्द्धन परियोजना अन्तर्गत दुई दिने सचेतना, सरसफाइ तथा वडा स्तरीय समीक्षा कार्यक्रम सफलतापूर्वक सम्पन्न भएको छ। बिवाईसी बागलुङको साझेदारीमा सञ्चालित कार्यक्रमले पर्यटन क्षेत्रको संरक्षण, वातावरणीय सचेतना र स्थानीय समुदायको सहभागिता अभिवृद्धिमा सकारात्मक सन्देश दिएको छ।
कार्यक्रमको पहिलो दिन साउन १ गते ढोरपाटन नगरपालिका–९ अन्तर्गत नवी गाउँ तथा नदीचौर आसपासका क्षेत्रमा सरसफाइ अभियान सञ्चालन गरिएको थियो। स्थानीय युवा, महिला, सरोकारवाला तथा समुदायका प्रतिनिधिहरूको उल्लेखनीय सहभागितामा सम्पन्न अभियानमार्फत पर्यटन क्षेत्रलाई स्वच्छ, सफा र वातावरणमैत्री बनाउने सन्देश प्रवाह गरिएको थियो।
दोस्रो दिन साउन २ गते आयोजना गरिएको वडा स्तरीय ‘प्रोजेक्ट फोरम’ (समीक्षा तथा छलफल) मा परियोजनाले हालसम्म सञ्चालन गरेका गतिविधि, प्राप्त उपलब्धि, सिकाइ, देखिएका चुनौती तथा आगामी कार्ययोजनाबारे विस्तृत समीक्षा गरिएको थियो।
फोरममा वडा नं. ८ का वडा अध्यक्ष भद्रमणी सुनार, वडा सचिव बिराज बिक, स्वास्थ्य इन्चार्ज दिपक थापा, स्थानीय शिक्षक, उद्यमी, समाजसेवी, युवा, महिला तथा बालबालिकाको सक्रिय सहभागिता रहेको थियो। छलफलका क्रममा ढोरपाटन क्षेत्रको दिगो फोहोर व्यवस्थापन, पर्यटनमैत्री व्यवहार, स्थानीय उद्यमशीलता विकास तथा होमस्टे व्यवस्थापनलाई थप प्रभावकारी बनाउने विषयमा विशेष जोड दिइएको थियो।
कार्यक्रममा बिवाईसी बागलुङका उद्यम विकास अधिकृत टेकबहादुर बिकले परियोजनाको प्रगति, उपलब्धि तथा आगामी योजनाबारे जानकारी गराउनुभएको थियो भने सामाजिक परिचालन अधिकृत ओम श्रीपालीले कार्यक्रमको सहजीकरण गर्नुभएको थियो।
आयोजकका अनुसार यस्ता कार्यक्रमले स्थानीय समुदायमा वातावरण संरक्षण, दिगो पर्यटन विकास र जिम्मेवार पर्यटन संस्कृतिको विकासमा महत्वपूर्ण योगदान पुग्ने विश्वास लिइएको छ।
