बुर्तिबाङ जेठ १० गते

बागलुङको तमानखोला गाउँपालिका ३ तमानमा रहेको तमान बालगृहलाई लायन्स क्लब अफ काठमाण्डौ म्याग्दी र लायन्स क्लब अफ तमानखोला द्धारा १ लाख १५ हजार रुपैयाँ बराबरको खाध्यान्ह र स्टेसनरी उपलब्ध गराइएको छ ।

बिहीबार एक कार्यक्रमका विच बालगृहमा बसेर अध्ययनरत बालबालिकालाई सहयोग पुग्ने गरी दाल चामल लगायतका खाध्यान्ह सामाग्री र कपी कलम लगायतका स्टेसनरी सामाग्री उपलब्ध गराइएको तमानखोला गाउँपालिका ३ का अध्यक्ष झक बहादुर बुढाले बताउनु भयो ।

तमानखोला गाउँपालिका ३ घर भई हाल काठमान्डौ बस्दै आउनु भएका लायन्स क्लब अफ काठमान्डौ म्याग्दीका पूर्व अध्यक्ष तथा सिनियर एडभाइजर शंकर गौचनद्वारा परिवार मार्फत संलकन गरिएको उक्त रकम लायन्स क्लब मार्फत बालगृहलाई उपलब्ध गराउनु भएको हो ।

तमानखोला गाउँपालिका अध्यक्ष जोकलाल बुढाको सक्रियतामा सुरुवात गरिएको बालगृहमा हाल तमानखोला गाउँपालिका भरका अभिभावक विहीन बालबालिका बस्दै आएका छन । बालगृह व्यवस्थापन समिति मार्फत उनिहरुलाई निःशुल्क रुपमा खान बस्न साथै कक्षा १ देखि १२ सम्मको पठन पाठनको व्यवस्था गरिँदै आएको हो ।

विभिन्न सामाजिक संस्थाको सक्रियतामा बालगृहलाई स्टेसनरी र खाध्यान्ह उपलब्ध गराइँदै आएको पाइएको छ ।

आयोजित कार्यक्रममा तमानखोला गाउँपालिका उपाध्यक्ष हिराकुमारी छन्त्याल, वडा नं. ३ का अध्यक्ष झक बहादुर बूढा समाजसेवी तथा लायन्स शंकर गौचन, लायन्स क्लब काठमान्डौ म्याग्दीका पदाधिकारी, लायन्स क्लब अफ तमानखोलाका पदाधिकारी, लगायतको उपस्थिति रहेको थियो ।

जेठ ८ गते बुर्तिबाङ

 जेठ ८ गते बुर्तिबाङ बागलुङको निसीखोला गाउँपालिका २ देउरालीमा रहेको अर्नाकोट माध्यमिक विद्यालयका विद्यार्थीलाई नेपाल सरकारले उपलब्ध गराउँदै आएको छात्रवृत्ति वितरण सँगै ३५० जना विद्यार्थीलाई पोशाक, झोला र स्टशेनरीका सामाग्री उपलब्ध गराइएको छ ।

 आइतबार एक कार्यक्रमका बिच कर्मफ्लाईटस् फाउन्डेसन पोखराका कार्यक्रम निर्देशक प्रेम बहादुर कुवँरको विशेष उपश्थितीमा विद्यार्थीका निम्ति संस्थाको तर्फदेखि पोशाक, झोला र स्टशेनरीका सामाग्री उपलब्ध गराइएको विद्यालयका प्रधानाध्यापक ईश्वर सिर्पालीले बताउनु भयो । 

विगत लामो समयदेखि शैक्षिक र भौतिक क्षेत्रमा लगानी  गर्दे आइरहेको कर्मफ्लाईटस् फाउन्डेसन पोखराले यसवर्ष पनि विद्यार्थीको सहज पठन पाठन र आवश्यक पोसाक र झोला उपलब्ध गराएको कार्यक्रम निर्देशक प्रेम बहादुर कुवँरको भनाई छ ।

 त्यस्तै स्थानीय अर्नाकोट कृषि सहकारी संस्थाले समेत विद्यालयलाई इस्मार्ट टिभी उपलब्ध गराएको हो । विद्यालयमा विभिन्न सहयोगी दाताबाट आइरहने साथ र सहयोगले विद्यालयको भौतिक र शैक्षिक गुणस्तर वृद्धिमा सहयोग पुग्ने प्रधानाध्यापक ईश्वर सिर्पालीले बताउनु भयो । 

आइतबार नै कर्मफ्लाईटस् फाउन्डेसन पोखराको सहजिकरणमा अर्नाकोट देउरालीमा २ सय २० जना आँखाका विरामको आँखा चेकजाँच तथा सामान्य उपचार र चस्मा विरण गरिएको थियो ।

जेठ ८ गते बुर्तिबाङ

बागलुङको तमानखोला गाउँपालिका २ सिल्गुमका आगलागी पिडित परिवारलाई राहत हस्तान्तरण गरिएको छ । 

फुर्से बराहताल सामाजिक संस्थाको सक्रियतामा संकलन भएको कुल ४ लाख ४२ हजार बराबरको रकम सोमबार एक कार्यक्रमका बिच आगलागीबाट पीडितलाई हस्तान्तरण गरिएको हो । 

गत बैशाख १४ गते वनमा लागेको आगो अनियन्त्रित भई गाउँमा पस्दा एक जनाको घटना स्थलमै मृत्यु भएको थियो दुई जना घाईते र अन्य परिवारको घरगोठ जलेर नष्ट भएको थियो । 

आगलागी पीडित घाईते प्रेम बहादुर घर्ती र ज्ञान बहादुर बुढाको परिवारलाई १ लाख ५८ हजारका दरले ३ लाख १७ हजार ४ सय ५६ रुपैयाँ र आगलागीमा परि ज्यान गुमाएका देवसिंह बिक को परिवारलाई ७५ हजार रुपैयाँ हस्तान्तरण गरिएको हो । आगलागीबाट घाईते दुई जनाको कृतिपुर अस्पतालमा उपचार भएको थियो । दुवैजना नियमित स्वास्थ्य परीक्षणमा हुनुहुन्छ ।

तमानखोला गाउँपालिका उपाध्यक्ष हिराकुमारी छन्त्यालको विशेष उपश्थितीमा भएको राहत वितरण कार्यक्रममा उपाध्यक्ष छन्त्यालले बोल्दै फुर्से बराहताल सामाजिक संस्थाले समस्यामा परेका पीडित परिवारको आलो घाउमा मल्हम लगाउने काम गरेको बताउँदै यस्ता सामाजिक क्षेत्रमा अझै सक्रिय भएर लाग्न आग्रह गर्नुभयो । 

स्थानीय युवाहरूको सक्रियतामा सञ्चालित अभियानबाट धेरै सहयोग भएको बताउँदै यस्तो अभियानले पीडितलाई राहत हुने बताउनु भयो संस्थाले स्वदेश तथा विदेशमा रहेका सामाजिक अगुवा, संस्था लगायतबाट संकलन गरिएको रकम पीडितलाई घरमै पुगेर हस्तान्तरण गरेको थियो ।

 आगलागीबाट घरमा क्षेती पुगेको राम बहादुर बिकलाई पच्चीस हजार, र तमानखोला गाउँपालिका १ स्थित केस बहादुर अर्गेजाको छोरी क्यान्सर पीडित हिमानी अर्गेजाको उपचारका निम्ति २५ हजार रुपैयाँ हस्तान्तरण गरिएको कृष्ण खत्रीले बताउनु भयो । 

बुर्तिबाङ जेठ ४ गते

बागलुङको तमानखोला गाउँपालिका कार्यपालिका सदस्य हिक्मत जक्तपुरी ले आफूले अध्ययन गरेको एक सामुदायिक विद्यालयमा पैतिस हजार रुपैयाँ बराबरको स्टेसनरी सहित विभिन्न सामाग्री हस्तान्तरण गर्नुभएको छ ।

तमानखोला गाउँपालिका १ पहिरामा रहेको भुमे प्राथमिक विद्यालयमा अध्ययनरत ११ विद्यार्थीलाई स्टेसनरी सहित अन्य सामाग्री उपलब्ध गराउनु भएको हो ।

 जनप्रतिनिधि हुँदै गर्दा राज्यबाट प्राप्त हुने सेवा सुविधाको दश प्रतिशत रकम सामाजिक क्षेत्रमा लगानी गर्ने प्रतिबद्धता अनुरूप गत बर्ष समेत सोही विद्यालयका जेहेन्ददार विद्यार्थीलाई सुइटर लगायतका सामाग्री हस्तान्तरण गर्नुभएका जक्तपुरीले यस बर्ष पनि ११ जना अति जेहेन्ददार विद्यार्थीका निम्ति झोला, राङकोट, र एक बर्ष सम्म पुग्ने स्टेसनरीका सामाग्री उपलब्ध गराएको बताउनु भयो ।

आफ्नो हजुरबुबा संस्थापक अध्यक्ष समेत रहेको उक्त विद्यालयमा अध्ययनरत जेहनदार विद्यार्थीको पठन पाठनमा सहजता होस भन्ने हेतुले आफूले उक्त सामाग्री उपलब्ध गराएको बताउँदै विद्यालयले आयोजना गर्ने अतिरिक्त कृयाकलापमा उत्कृष्ट हुने विद्यार्थीलाई लक्षित गर्दे केही थान स्टेसनरी विद्यालयलाई हस्तान्तरण गरिएको हो । 

जेठ ४ गते बुर्तिबाङ

गण्डकी प्रदेश सभाका सांसद माननीय दोर्ण कुमार कुवँर र दिलमाया पौवीले आफ्नो निर्वाचन क्षेत्रका ३ वटै पालिकामा पुगेर नागरिक सँग संवाद  गर्नुभएको छ ।

आगामी बजेट कार्यक्रम आउँदै गर्दा निर्वाचन क्षेत्रका जनताको समस्या, माग र आवश्यकतालाई बुझ्न निर्वाचन क्षेत्रमा पसेका सांसदहरुले ढोरपाटन नगरपालिका, निसीखोला गाउँपालिका र तमानखोला गाउँपालिकामा पुगेर त्यहाँका जनप्रतिनिधि, राजनैतिक दलका प्रतिनिधि, स्थानीय बासिन्दा सँग राय सुझाव संकलन गर्दे आगामी योजनाको विषयमा छलफल गरिएको हो ।

नागरिकले महत्वपूर्ण आवश्यकता रहेका विकास निर्माणलाई पहिलो प्राथमिकता दिनुपर्ने सुझाब दिएका हुन ।

नागरिकले राखेका सुझाव सल्लाह र महत्वपूर्ण आवश्यकतालाई आफूहरूले प्राथमिकता दिएर अगाडि बढ्ने बताउँदै महत्वपूर्ण योजनालाई प्राथमिकता दिएर वडाबाटै योजनाको छनौट गर्न र पालिका मार्फत आफूहरू सँग पठाउन सुझाव दिँदै प्राथमिकताको आधारमा आफूहरूले बजेट व्यवस्थापनमा ध्यान दिइने माननीय दोर्ण कुमार कुवँरले बताउनु भयो ।

कार्यक्रममा माननीय दिलमाया पौवीले महिला, बालबालिका लक्षित र अन्य विकास निर्माणका काममा आफूहरूले हातेमालो गरेर अगाडि बढ्ने बताउँदै महत्वपूर्ण योजनालाई र आवश्यकतालाई प्राथमिकता दिइने बताउनु भयो ।

बागलुङको निसीखोला गाउँपालिकाको वडा नं. ३ बोहोरागाउँमा  शुक्रबार देखि दुई दिने निःशुल्क स्वास्थ्य शिविर सुरु भएको भएको छ ।

निसीखोला गाउँपालिका र कर्मफ्लाईटस् फाउन्डेसन पोखराको संयुक्त आयोजनामा शिविर सुरु भएको हो । शिविरको पहिलो दिन पालिका भरका एक हजार चारसय ५१ जना नागरिकको स्वास्थ्य चेकजाँच तथा उपचार गरिएको छ ।

जसमध्ये ६ सय ६५ जनाको आँखाको चेकजाँच गर्दा ३२ जनाको मोतिया बिन्दुको शल्यक्रिया गर्नुपर्ने भएको हो ।त्यस्तै महिला सम्बन्धी रोग र अन्य समस्याको चेकजाँच तथा उपचार गराउनेको संख्या ७८६ जना रहेको पाइएको छ । निसीखोला गाउँपालिका अध्यक्ष सूर्य बहादुर घर्तीले बिहान उद्घाटन गर्दे शिविरको शुभारम्भ गर्नुभयो ।

अध्यक्ष घर्तीले बोल्दै निसीखोला गाउँपालिकाले स्वास्थ्य क्षेत्रमा राम्रो लगानी गरिरहेको बताउनु भयो । सबै नागरिकको स्वास्थ्य बीमा कार्यक्रम देखि लिएर प्रत्यक बर्ष यस्ता शिविरको आयोजना गरिएको बताउँदै मानिस स्वास्थ्य भएमा मात्र प्रगति हुने बताउँदै सबैलाई स्वास्थ्य राख्न र आर्थिक अभावकै कारण वा चेतना अभावका कारण रोग लुकाएर बस्नुपर्ने बाध्यताको अन्त्य गर्नका निम्ति शिविरको आयोजना गरिएको बताउनु भयो ।

शिविरमा निसीखोला गाउँपालिका अन्तरगत  ७ वटै वडाबाट नागरिकको उल्लेखनीय सहभागिता रहेको र भोलि सम्म करिब दुई हजार नागरिकले सेवा लिने अपेक्षा रहेको वडा नं. ३ का अध्यक्ष तथा शिविर संयोजक रमेश विक्रम शाहीले बताउनु भयो । शिविरमा बरिष्ठ डाक्टरबाट स्वास्थ्य परिक्षण तथा वरिष्ठ आँखा रोग विशेषज्ञबाट आँखा परिक्षण साथै मोतिया बिन्दुको शल्यक्रिया गर्नुपर्ने बिरामीका निम्ति जेठ २९,३० र ३१ गते शल्यक्रिया हुने भएको हो ।

शिविरमा आँखा रोग विशेषज्ञहरूद्वारा आँखा जाँच ,आवश्यक पर्नेलाई चस्मा वितरण र मोतिया बिन्दुको शल्यक्रिया गर्ने, वरिष्ठ फिजिसियन द्धारा स्वास्थ्य परिक्षण, महिला तथा प्रसुती रोग , सामान्य चिकित्सा तथा पेट, हाडजोर्नी तथा नसा सम्बन्धी विशेषज्ञ उपचार सेवा साथै भिडियो एक्सरे, एसीजी, दिशा, पिसाब, ब्लड, सुगर जाँच लगायतका सेवा नागरिकले प्राप्त गरिरहेका छन ।

शिविरमा खटिनुभएका डा. रचना सुवेदीका अनुसार अधिकांश महिलामा सेतो पानी बग्ने, पाठेघरको समस्या रहेको बताउँदै अझैपनि रोग लुकाएर बस्ने चलन गाउँमा प्रबल देखिएको बताउनु भयो ।

शिविरमा निसीखोला गाउँपालिका र कर्मफ्लाईटस् फाउन्डेसन पोखराको संयुक्त आयोजनामा सञ्चालन भइरहेको छ । यस्तो शिविरबाट यहाँका नागरिकले प्रत्यक्ष सेवा प्राप्त गरिरहेको कर्मफ्लाईटस् फाउन्डेसन कार्यक्रम निर्देशक प्रेम बहादुर कुवँरले बताउनु भयो । शिविरमा हिमालय आँखा अस्पताल, आई केयर, बुर्तिबाङ स्वास्थ्य केन्द्र, धवलागिरी अस्पताल, पर्वत अस्पतालको प्राविधिक सहयोग रहेको छ ।

त्यस्तै प्रभा माध्यमिक विद्यालय, स्थानीय समाजसेवी , स्थानीय स्वास्थ्य कर्मीको सहयोग रहेको पाइएको छ । शिविरमा बढि मात्रामा ज्येष्ठ नागरिक र महिलाको सहभागिता रहेको छ ।

शिविरमा सहभागि नागरिकले यस्तो महत्वपूर्ण शिविर सञ्चालन हुँदै गर्दा पैसा खर्च नगरी घर छेउबाटै उपचार सुविधा पाउँदा आफूहरू खुसी भएको बताएका छन ।

जेठ ३ गते बुर्तिबाङ
बागलुङको निसीखोलामा निशुल्क स्वास्थ्य शिविर सञ्चालन हुने भएको छ । निसीखोला गाउँपालिका र कर्मफ्लाईटस् फाउन्डेशन पोखराको संयूक्त आयोजनामा शिविर हुन लागेको निसीखोला गाउँपालिका अध्यक्ष सूर्य बहादुर घर्तीले बताउनु भयो ।
निसीखोला गाउँपालिकाका नागरिकलाई लक्षित गर्दे यहि जेठ ४ र ५ गते हुने शिविरमा बरिष्ठ डाक्टरहरुबाट स्वाथ्य परिक्षण तथा वरिष्ठ आँखा रोग विशेषज्ञबाट आंखा परिक्षण सार्थै मोतिया बिन्दुको सल्यक्रिया हुने भएको हो ।
गतबर्ष वडा नं. १ को देविस्थानमा सञ्चालन भएको शिविर यसबर्ष वडा नं. ३ को बोहोरागाउँ स्वास्थ्य चौकी र प्रभा माध्यमिक विद्यालयमा सञ्चालन गर्न लागिएको शिविर संयोजक एवम् वडा नं. ३ का अध्यक्ष रमेश विक्रम शाहीले बताउनु भयो ।
शिविरको लागी प्रचार प्रसार देखि आवस्यक तयारी भइरहेको बताउँदै सम्बन्धित समस्या भएका पालिका बासि नागरिकले शिविरमा सहभागि भई सेवा लिन सक्ने बताउनु भएको छ ।
शिविरमा आँखा रोग विशेषज्ञद्धारा आँखा जाँच ,आवस्यक पर्नेलाई चस्मा वितरण र मोतियाबिन्दुको सल्यक्रिया गर्ने, वरिष्ठ फिजिसियन द्धारा स्वास्थ्य परिक्षण, महिला तथा प्रसुती रोग , सामान्य चिकित्सा तथा पेट, हाडजोर्नी तथा नसा सम्बन्धि विशेषज्ञ उपचार सेवा साथै भिडियो एक्सरे, इसिजी, दिशा, पिसाब, ब्लड, सुगर जाँच लगाएतका सेवा नागरिकले प्राप्त गर्न सक्ने भएका हुन ।
आँखामा मोतिया बिन्दुको पहिचान भई सल्यक्रिया गर्न सिफारीस भएका विरामीको जेठ २९, ३० र ३१ गते बोहोरागाउँ स्वास्थ्य चौकीमा सल्यक्रिया गर्ने गरी आवस्यक तयारी गरिएको कर्मफ्लाईटस् फाउन्डेशन पोखराका कार्यक्रम निर्देशक प्रेम बहादुर कुवँरले बताउनु भयो । शिविरमा हिमालय आंखा अस्पत्ताल, आई केयर, बुर्तिबाङ स्वास्थ्य केन्द्र, धवलागिरी अस्पत्ताल, पर्वत अस्पत्तालको प्राविधिक सहयोग रहने भएको हो ।

बुर्तिबाङ जेठ २ गते

बागलुङको ढोरपाटन नगरपालिका ५ मस्तिमा बुधबार साँझ पिकअप जिप दुर्घटना हुँदा १८ जना घाइते भएको आशंका गरिएको छ ।

बुधबार साँझ करिब ५ बजेतिर बुर्तिबाङ देखि यात्रु लिएर छुटेको ग २ च २३१४ नम्बरको पिकअप जिप दुर्घटना हुँदा सवार चालक सहित  १८ जना यात्रु घाइते भएको आशंका गरिएको इलाका प्रहरी कार्यालय बुर्तिबाङका प्रमुख प्रहरी निरीक्षक राजकुमार बिकले बताउनु भयो । घाइतेहरूको उद्धार गरि बुर्तिबाङ स्वास्थ्य केन्द्रमा ल्याउने क्रम जारी रहेका कारण यकिन तथ्यांक उपलब्ध हुन सकेको छैन ।

घाइतेको हात खुट्टा र शरीरका विभिन्न भागमा चोट लागेको छ । ढोरपाटन ५ को चौर पाखापानी तर्फ जाँदै गरेको पिकअप चालकले ब्याक गर्ने क्रममा अनियन्त्रित भई सडक देखि करिब १५ मिटर तल खसेको हो ।

घाइतेको बुर्तिबाङ स्वास्थ्य केन्द्रमा उपचार सुरु भएको छ । दुर्घटना स्थलमा गण्डकी प्रदेश सभा सदस्य माननीय दोर्ण कुमार कुवँर र दिलमाया पौवी समेत पुगेर उद्धारमा खटिनु भएको छ ।

वर्षात भइरहेको र सडक चिप्लो र धेरै यात्रु रहेका कारण दुर्घटना भएको हुन सक्ने यात्रुले बताएका छन ।

 जेठ २ गते बुर्तिबाङ

गण्डकी प्रदेश सभाका सदस्य माननीय दोर्ण कुमार कुवँर र माननीय दिलमाया पौवीले आफ्नो निर्वाचन क्षेत्रमा स्थानीय नागरिक, समाजका अगुवा व्यक्ति र राजनैतिक दलका प्रतिनिधि सँग भेटघाट एवम् आगामी विकास योजनाका सन्दर्भमा सुझाब संकलन र भेटघाट कार्यक्रमलाई तिव्रता दिएका छन ।

गण्डकी प्रदेश सरकारबाट आगामी आर्थिक बर्ष २०८१÷०८२ को निती कार्यक्रम बजेट ल्याउने तयारी हुँदै गर्दा सांसद दय कुवँर र पौवीले आफ्नो निर्वाचन क्षेत्रका नागरिकको अपेक्षा, सुझाव संकलन गर्दे कस्ता योजनालाई प्राथमिकता दिने भन्ने सन्दर्भमा छलफल एवम् भेटघाट कार्यक्रमलाई तिव्रता दिइएको पाइएको हो ।

बुधबार ढोरपाटन नगरपालिकाको ढोरपाटन उपत्यकाबाट अभियानको सुरुवात गरेका सांसदहरुले १ देखि ९ सम्मका सबै वडामा पुग्ने र निसीखोला गाउँपालिका तमानखोला गाउँपालिकाका नागरिक समक्ष पनि पुग्ने गरी कार्यक्रम अगाडि बढाएका हुन । ढोरपाटन उपत्यकामा पुग्दै गर्दा अधिकांश नागरिकले सालझण्डी ढोरपाटन सडक अन्तरगत बुर्तिबाङ ढोरपाटन सडकलाई तदारुकताका साथ ध्यान दिन सुझाब दिएका हुन ।

नागरिकले सडक, खानेपानी, कृषि, पर्यटन, स्वास्थ्य र शिक्षा क्षेत्रको विकासमा आफ्नो माग र धारणा राखेका हुन । स्थानीय तह अन्तरगत वडा, पालिका, तथा प्रदेश र संघले गर्ने विकासको सन्दर्भमा जनप्रतिनिधिहरू बिच छलफल गरेर आवश्यकता र महत्वपूर्णता लाई हेरेर विकास योजनाको छनौट गर्नुपर्नेमा नागरिकको सुझाब छ ।

त्यस्तै बिहिबार निसीखोला गाउँपालिकाका नागरिक संग छलफल एव्म भेटघाट कार्यक्रम गरिएको छ । निसीखोला गाउँपालिका कार्यालयमा सर्वदलिय सर्वपक्षिय रुपमा भेटघाट एव्म छलफल भएको छ । नागरिक, राजनैतिक दल र जनप्रतिनिधीले् माननियहरुलाई आफनो सुझाब र धारणा राखेका हुन । त्यस्तै शुक्रबार तमानखोला गाउँपालिकामा कार्यक्रमको तय गरिएको जनाइएको छ ।

सांसद सहितको कार्यक्रममा स्थानीय जनप्रतिनिधिको समेत सहभागिता रहेको छ । सांसदहरुले जनताको अपेक्षा, सुझाब र आवश्यकतालाई प्राथमिकता दिएर योजनाको छनौट गर्ने र बजेटमा प्राथमिकता दिने बताएका छन ।