फागुन १२ बुर्तिबाङ
बागलुङको बडिगाड गाउँपालिका वडा नम्बर ९ मा सोमबार साँझ पिकअप जिप दुर्घटना हुँदा जिपमा सवार  दुई जना यात्रुको ज्यान जानुका साथै ४ जना घाइते भएका छन ।
बडिगाड ७ भिमगिठे देखि यात्रु लिएर वडा नम्बर १० दर्लिङतर्फ जाँदै गरेको लु ३ च ५५६९ नम्बरको जिप दुर्घटना हुँदा सवार निसीखोला गाउँपालिका ७ चोलाङ बस्ने ७५ बर्षिया खड्क बहादुर कुवँर र ढोरपाटन नगरपालिका ५ बस्ने ३५ बर्षिया जुना कँडेलको ज्यान गएको हो ।
साँझपख यात्रु लिएर जाँदै गरेको जीप सार्कीपाटा भन्ने स्थानमा पुग्दा उकालोमा समस्या देखिएपछि रोकेर ओत लगाउने क्रममा ब्याक हुँदा दुर्घटना भएको सवार यात्रुको भनाई छ । दुर्घटनामा बडिगाड ९ बस्ने ६३ बर्षिया तेज कुमारी बूढा, सोही ठाउँका ५० बर्षिया निमसरा बुढा, ५२ बर्षिय थम कुमारी पौडेल घाइते हुनुभएको छ । एक घाइतेको सनाखत हुन सकेको छैन । घाइते मध्ये तेज कुमारी बुढालाई थप उपचारका निम्ती रेफर गरिएको छ अन्य घाइतेको बुर्तिबाङ अस्पतालमा उपचार भइरहेको छ ।
दुर्घटना लगत्तै बडिगाड गाउँपालिका अध्यक्ष गण्डकी थापा, इलाका प्रहरी कार्यालय बुर्तिबाङ, भिमगिठे प्रहरी, स्थानीय बासिन्दा लगायतको सक्रियतामा उद्धार गरिएको हो । जिपमा १२ जना जती सवार रहेपनि अन्यको अवस्था सामान्य रहेको जनाइएको छ । घाइेतको उद्धार भइरहेको प्रह्रीले जनाएको छ । 

ढोरपाटन, फाल्गुन १२ –

ढोरपाटनस्थित ज्योति विकास माध्यमिक विद्यालयमा एक नयाँ, सुबिधा सम्पन्न आइसीटी कम्प्युटर ल्याबको आइतबार उद्घाटन गरिएको छ।

ग्रामीण नेपालमा डिजिटल खाडल पुर्ने उद्देश्यले गरिएको यो पहल एडुटेक नेपाल, कर्माफ्लाइट्स फाउन्डेसन र ढोरपाटन नगरपालिका बीचको सहकार्यबाट सम्भव भएको हो। दात्रि निकाय, अभिभावक, शिक्षक र समुदायका अगुवाहरूको उपस्थितिमा आयोजीत कार्यक्रममा प्रमुख अतिथि एडुटेक नेपालका संस्थापक र दाता न्युजिल्याण्ड निबासी माइक चिसोल्मले विद्यार्थी, शिक्षक र समुदायलाई ल्याब उपहार दिन पाउँदा खुशी व्यक्त गरे।

नेपालसँगको आफ्नो सम्बन्धको सम्झना गर्दै चिसोल्मले लगभग ४० वर्षअघि आइएनएफ पोखरामा आफ्नो सेवालाई सम्झिए र आफ्नो कान्छो बच्चा नेपालमा जन्मिएको र न्युजिल्याण्ड र नेपालबीचको मित्रताको लामो विरासत बोकेको भन्दै जुन १९५३ (२०१०) मा सर एडमन्ड हिलारी र तेन्जिङ नोर्गे शेर्पाको ऐतिहासिक सगरमाथा आरोहणदेखि सुरु भएको जुरा स्मरण गराए।

चिसोल्मले प्रविधि र शिक्षा गरिबी हटाउने कुञ्जी हो भन्ने कुरामा जोड दिए। संसार को धनी एलोन मस्कको उदाहरण उद्धृत गर्दै उनले कसरी सानै उमेरमा एउटा कम्प्युटरमा पहुँचले मस्कको भविष्यलाई रूपान्तरण गर्‍यो भन्ने कुरामा प्रकाश पारे। ूयो प्रयोगशाला नेपालका शहरहरू र मेरो आफ्नै देशमा पनि धेरै भन्दा राम्रो छ। यस्ता स्रोतहरू भएकाले, प्रत्येक बच्चामा प्रविधिमा अग्रणी बन्ने क्षमता छ उनले थपे।

एडुटेक नेपालका सीईओ अशोक डल्लीले अभिभावक र शिक्षकहरूलाई शिक्षालाई रूपान्तरण गर्न प्रयोगशालालाई सक्रिय रूपमा प्रयोग गर्न प्रोत्साहित गरे। कम्प्युटर प्रयोगशाला प्राप्त गर्नु मात्र पर्याप्त छैन। बालबालिकाको सिकाइमा वास्तविक प्रभाव पार्न यसलाई उचित रूपमा प्रयोग गर्नुपर्छू, उनले अभिभावकहरूलाई विद्यालय भ्रमण गर्न र आधुनिक शिक्षा उपकरणहरूसँग संलग्न हुन आग्रह गर्दै भने।

यस परियोजनाको एक प्रमुख साझेदार कर्मफ्लाइट्स फाउन्डेसनले नेपालभरका ग्रामीण विद्यालयहरूमा आईसीटी प्रयोगशालाहरू स्थापना गर्न महत्वपूर्ण भूमिका खेलेको छ। कर्मफ्लाइट्सका राष्ट्रिय निर्देशक प्रेम बहादुर कुँवरले प्रयोगशाला कुशलतापूर्वक स्थापना गरेकोमा विद्यालयको प्रशंसा गरे र शिक्षामा प्रविधिलाई एकीकृत गर्ने महत्त्वमा जोड दिए। ूहामी प्रविधिलाई बेवास्ता गर्न सक्दैनौंस शिक्षालाई रूपान्तरण गर्न र जीवनको गुणस्तर सुधार गर्न हामीले यसलाई अँगाल्नुपर्छ कुँवरले भने।

ढोरपाटन नगरपालिका वडा नम्बर ७ का पूर्व अध्यक्ष दीपक थापा, ढोरपाटन शिकार आरक्ष संरक्षण अधिकृत पशुपति अधिकारी र ढोरपाटन तिब्बती शरणार्थी शिविरका अध्यक्ष रिन्चिन ताशी लगायत धेरै विशिष्ट अतिथिहरूले कार्यक्रममा बोल्दै आधुनिक शिक्षामा डिजिटल साक्षरताको महत्त्वलाई जोड दिए।
ढोरपाटन उपत्यकामा बसोबास गर्ने तिब्बती शरणार्थी बालबालिकाहरूलाई शिक्षा प्रदान गर्न बि स २०१७ सालमा श्री ज्योति विकास विद्यालय स्थापना गरिएको थियो। यो आईसीटी प्रयोगशाला जम्मा १४ लाख मध्ये ढोरपाटन नगरपालिकाले कुल लागतको एक तिहाइ र एडुटेक नेपाल र कर्मफ्लाइट्सले बाँकी दुई तिहाइ म्याचिङ्ग कोष प्रयासबाट सम्भव भएको हो।

प्रयोगशाला २१ वटा कम्प्युटर र अफ लाइन एआई सफ्टवयर सहित शैक्षिक सामग्रीहरूको विशाल संग्रहले सुसज्जित छ। यो प्रकार को पहल कदमी ले ग्रामीण नेपालमा शिक्षामा क्रान्तिकारी परिवर्तन ल्याउने, विद्यार्थीहरूलाई २१औ सताप्दीको विश्वनागरिक बनाउन कोशेढुंगा साबित हुने कुरा अपेक्षा गरिएको छ।

फागुन ११ गते बुर्तिबाङ

साइन रेसुङ्गा विकास बैँक बुर्तिबाङ शाखाले संस्थाको १७ औँ वार्षिकोत्सवका अवसरमा निसीखोला गाउँपालिका १ देविस्थानमा रहेको देविस्थान माध्यमिक विद्यालयलाई आइतबार विभिन्न सामाग्री हस्तान्तरण गरेको छ ।

संस्थाको संस्थागत सामाजिक उत्तरदायित्व रुपरुप विद्यालयमा अध्ययनरत विद्यार्थीलाई लक्षित गर्दे शैक्षिक तथा खेलकुदका सामाग्री उपलब्ध गराइएको बैँकका शाखा प्रबन्धक प्रेमनाथ पौडेलले बताउनु भयो ।

साना बालबालिकालाई खेल्दै पढ्दै गर्ने वातावरण सृजना गर्नका निम्ती आफूहरूले कुर्ची, ढिकीच्याउँ लगायत विभिन्न १२ प्रकारका खेलकुद सामाग्री उपलब्ध गराइएको पौडेलले बताउनु भयो ।

विद्यालय व्यवस्थापन समिति अध्यक्ष भरत पुन, आर्थिक संयोजक खिम बहादुर कार्की विद्यालयका प्रधानाध्यापक झक बहादुर क्षेत्री लगायत शिक्षकको उपश्थितीमा सामाग्री हस्तान्तरण गरिएको हो । 

फागुन १० गते बुर्तिबाङ

बागलुङको बुर्तिबाङमा नेपाली सेनाको आयोजनामा शनिबार सञ्चालित एकीकृत स्वास्थ्य शिविरमा पश्चिम बागलुङका ८ सय १९ जना नागरिकले सेवा लिएका छन ।

नेपाली सेनाको २३ नम्बर बाहिनी अड्डाको नेतृत्व, श्रीमेहर गणको संयोजन प्रभु बैँकको सहयोगमा बुर्तिबाङ प्रादेशिक अस्पतालमा सञ्चालित शिविरमा चिकित्सक सेवा, स्त्री तथा प्रसुती सेवा, हाड तथा जोर्नी सेवा, दन्त सेवा, बालरोग, छाला रोग, प्रयोगशाला, एक्सरे सेवा उपलब्ध गराइएको हो ।

शिविरमा बालरोग तर्फ १२० जना, हाडजोर्नी २६० जना, छाला तर्फ १२०,आयूवेदिक ४० जना र गाइनो तर्फ २०० जना दन्त रोग तर्फ ७९ जना नागरिकले सेवा प्राप्त गरेको नेपाली सेनाको २३ नम्बर बाहिनी अड्डाले जनाएको छ ।

शिविरको उद्‌घाटन सत्रको कार्यक्रमलाई प्रमुख अतिथिको रुपमा सम्बोधन गर्दे नेपाली सेनाको २३ नम्बर बाहिनीपति सायक रथी जगत बहादुर पौडेलले नेपाली सेनाले विभिन्न सामाजिक कार्यसँगै नागरिकको स्वास्थ्यसँग जोडिएर निःशुल्क शिविर आयोजना गरिरहेको जनाउँदै दुर्गम क्षेत्रमा आर्थिक र चेतनाको अभावका कारण उपचारबाट बञ्चित भएका नागरिकलाई सहज भएको बताउनु भयो ।

कार्यक्रममा ढोरपाटन नगरपालिका कार्यवाहक मेयर धन बहादुर कायतले बोल्दै नेपालीमा आहारविहारमा ध्यान नदिने, व्याम नगर्ने जस्ता समस्याका कारण नसर्ने रोगको मात्रा वृद्धि हुँदै गएको बताउँदै खानपानमा ध्यान दिन सके धेरै रोगबाट बच्न सकिने बताउँदै नेपाली सेनाले गरेको शिविरबाट यहाँका धेरै नागरिकले सेवा प्राप्त गरेको बताउनु भयो ।

कार्यक्रममा गणपति श्रीमेहर गणका प्रमुख सेनानी धन राना मगर लगायत विभिन्न सङ्घसंस्थाका प्रमुख तथा प्रतिनिधिको आतिथ्यता रहेको थियो । शिविरमा ७३ जना ज्येष्ठ नागरिक, बालबालीका १२४, महिला ५९१ र पुरुष २२८ जना नागरिकको सहभागिता रहेको हो ।

शिविरलाई सफल पार्न सरकारी तथा सामाजिक विभिन्न सङ्घसंस्थाको सहभागिता रहेको थियो । शिविरबाट निःशुल्क रुपमा सेवा प्राप्त गरेसँगै आर्थिक अभाव र चेतनाको अभावका कारण रोग लुकाएर बस्दै आइरहेका नागरिकलाई निः शुल्क शिविरले धेरै राहत भएको पाइएको छ । यस्ता प्रकारका शिविर आगामी दिनमा पनि गर्न सके नागरिकलाई सहज हुने स्थानीयको भनाइ छ । 

फागुन ९ गते बुर्तिबाङ
बागलुको निसीखोला गाउँपालिका वडा नम्बर २ कोे आयोजनामा सुरु भएको बृहत निः शुल्क स्वास्थ्य शिविर शुक्रबार सम्पन्न भएको छ ।

हिलारी तेन्जिङ च्योटी न्यूजिल्यान्ड र वि।पी, कोईराला लायन्स सेन्टर फर अप्थाल्मिक स्टडीडको प्राविधिक सहयोगमा फागुन ८ र ९ गते दुई दिनका लागी शिविरमा ३०८ जना आँखाका विरामीको चेकजाँच उपचार तथा ५५६ जनाको स्त्रीरोग, जनरल लगाएतका सेवा प्रवाह गरी कुल ८६३ जनाको चेकजाँच तथा उपचार गरिएको हो ।

शिविरमा महिलारोग, हाडजोर्नी, भिडियो एक्सरे, ल्याब, मेडिसिन तथा आँखाको चेकजाँच तथा उपचार गरिएको जनाइएको छ ।
शिविरमा निसीखोला गाउँपालिका तथा आसपासका नागरिकले निः शुल्क रुपमा स्वास्थ्य सेवा प्राप्त गरेको निसीखोला २ का अध्यक्ष कुविर विश्वकर्माले बताउनु भयो । कान्छीबजारमा सञ्चालित शिविरमा निसीखोला गाउँपालिका २ का अध्यक्ष कुविर विश्वकर्माको अध्यक्षता, निसीखोला गाउँपालिका प्रमुख प्रशासकिय अधिकृत जिवन पुन लगाएतको आतिथ्यता रहेको शिविरमा , प्रध्यापक डा.आनन्द शर्मा, डा. राजेश पौडेल, डा. विजय ओझा सहित स्वास्थ्य कर्मीको टोलीले चेकजाँच तथा उपचार गरिरहेको हो ।
दुर्गम क्षेत्रका नागरिकको समस्यालाई मध्यनजर राख्दै आफुहरुले सहयोग गरिएको हिलारी तेन्जिङ च्योटी न्यूजिल्यान्डका प्रतिनिधी वावुराजा मर्हजनले बताउनु भयो ।

फागुन ८ गते बुर्तिबाङ
बागलुको निसीखोला गाउँपालिका वडा नम्बर २ कोे आयोजनामा बृहत निः शुल्क स्वास्थ्य शिविर बिहिबारदेखि सुरु भएको छ ।
हिलारी तेन्जिङ च्योटी न्यूजिल्यान्ड र वि.पी, कोईराला लायन्स सेन्टर फर अप्थाल्मिक स्टडीडको प्राविधिक सहयोगमा फागुन ८ र ९ गते दुई दिनका लागी शिविर सुरु भएको हो ।
शिविरमा महिलारोग, हाडजोर्नी, भिडियो एक्सरे, ल्याब, मेडिसिन तथा आँखाको चेकजाँच तथा उपचार हुने भएको हो ।
शिविर सञ्चालन हुँदै गर्दा निसीखोला गाउँपालिका तथा आसपासका नागरिकले निः शुल्क रुपमा स्वास्थ्य सेवा प्राप्त गर्ने अपेक्षा लिइएको निसीखोला २ का अध्यक्ष कुविर विश्वकर्माले बताउनु भयो ।
बिहिबार एक औपचारिक कार्यक्रम सहित सिविरको सुरुवात गरिएको हो । कान्छीबजारमा सुरु भएको शिविरमा प्रध्यापक डा. आनन्द शर्मा, डा. राजेश पौडे, डा. विजय ओझा सहित स्वास्थ्य कर्मीको टोलीले चेकजाँच तथा उपचार गरिरहेको हो ।
दुर्गम क्षेत्रका नागरिकको समस्यालाई मध्यनजर राख्दै आफुहरुले सहयोग गरिएको हिलारी तेन्जिङ च्योटी न्यूजिल्यान्डका प्रतिनिधी वावुराजा मर्हजनले बताउनु भयो । शिविर शुक्रबार सम्म सञ्चालन हुने भएको हो ।

फागुन ८ गते बुर्तिबाङ
जिल्लाको निसीखोला गाउँपालिका १ देविस्थान बजार नजिकै निसीखोलामा एक महिलाको शव फेला परेको छ । गत माघ २५ गतेदेखि हराएकी निसीखोला गाउँपालिका १ लेबाङ बस्ने ८० बर्षिय रुपी विक को शव निसीखोला स्थित पाल्लेबास भन्ने स्थानमा विद्युत कुलोको मुहानमा शव फेला परेको हो ।
देविस्थान सामाजिक सुरक्षा भत्ता बुझ्न आएकी वि।क घर नफर्किएपछि स्थानीय परिवार र प्रहरीले विभिन्न स्थानमा खोजी कार्य जारी राखेका थिए । बिहिबार स्थानीयले खोलामा शव देखेपछि प्रहरीलाई खबर गर्दा रुपी विकको शव रहेको पाइएको प्रहरीले जनाएको छ । घटनाको विषयमा अनुसन्धान भइरहेको जनाइएको हो । शवलाई पोष्ट मार्टमका निम्ती बुर्तिबाङ अस्पत्ताल ल्याइएको छ ।

बुर्तिबाङ फागुन ०८ गते

नेपाली सेनाको आयोजनामा यही फागुनको १० गते शनिबार बुर्तिबाङ प्रादेशिक अस्पतालमा विभिन्न रोगहरूको निःशुल्क रुपमा स्वास्थ्य शिविर मार्फत चेकजाँच तथा उपचार हुने भएको छ ।

पश्चिम बागलुङका ४ वटा पालिकामा रहेका स्वास्थ्य सेवाबाट बञ्चित नागरिकलाई लक्षित गर्दे शिविर आयोजना गर्न लागिएको नेपाली सेनाले जनाएको छ ।

नेपाली सेनाको श्री नं. २३ वाहिनी अड्डाको नेतृत्व, श्रीमेहर गणको संयोजकत्व र प्रभु बैँकको सहयोगमा शिविर सञ्चालन हुन लागेको श्री मेहर गणका सह सेनानी दुर्गा बहादुर थापाले बताउनु भयो ।

शिविरमा चिकित्सक सेवा, स्त्री तथा प्रसुती सेवा, हाड जोर्नी, सेवा, दन्त सेवा, बालरोग, छालारोग, प्रयोगशाला तथा एक्सरे सेवा साथै कृषि सेवा र आयुर्वेद सेवा पनि उपलब्ध गराइने आयोजकले जनाएको छ ।

बिहान ८ देखि ११ बजेसम्म निःशुल्क टिकटको व्यवस्था गरिने र ११ देखि ४ बजेसम्म चेकजाँच तथा उपचार हुने सह सेनानी दुर्गा बहादुर थापाले ढोरपाटन टाइम्सलाई बताउनु भयो ।

फागुन ६ गते बुर्तिबाङ
बागलुङ जिल्लाको तमानखोला गाउँपालिका वडा नम्बर ६ ले चालु आर्थिक बर्षमा गाउँपालिकाबाट विनीयोजन भएको बजेटका योजना फागुन मशान्त सम्म सम्पन्न गर्ने गरी काम अगाडी बढाइएको छ ।

सडक, खानेपानी, पदमार्ग लगाएतका शिर्षकमा योजना रहेको उक्त वडामा अधिकांस योजना सम्पन्न भइसकेको र केही अन्तिम चरणमा रहेका कारण फागुन मशान्त सम्म सम्पन्न गर्ने लक्ष्य रहेको वडा अध्यक्ष चित्र छन्त्यालले बताउनु भयो ।

वडाले स्थानीय नागरिकलाई पैदल यात्रामा सहजताका निम्ती विभिन्न ठाउँमा पदमार्ग निर्माण गरेको हो । बहुबर्षिय योजना अन्र्तगत विष्णु आधारभुत विद्यालय देखि किमचौर सम्म ६२२ मिटर पदमार्ग निर्माण सम्पन्न भइसकेको छ त्यस्तै नर्जा आधारभुत स्वास्थ्य केन्द्रदेखि खोपखेल्ना सम्म ६८९ मिटर भित्रिवन डिल्ली प्राथमिक विद्यालय देखि लालेविसौना सम्म ३०० मिटर र पात्ले गाउँमा ६२१ मिटर पदमार्ग निर्माण सम्पन्न भएको वडा अध्यक्ष छन्त्यालले बताउनु भयो ।

विगतमा स्थानीयलाई पैदल यात्रा गर्न निकै समस्या थियो पदमार्गले बालबालीका र स्थानीय नागरिकलाई सहज हुनेगरी नागरिकको माग अनुसार काम गरेका छौँ अध्यक्ष छन्त्यालले बताउनु भयो । वडाले विष्णु आधारभुत विद्यालय घेराबार, ठगुल्नी क्षेत्रमा गएको पहिरो टटवन्ध ग्वाविन जाली लगाउने कार्य लगाएतका योजनामा बजेट विनीयोजन गरेको थियो ।