माघ ७ गते ढोरपाटन

मोहन वैद्य नेतृत्वको क्रान्तिकारी कम्युनिष्ट पार्टी नेपालले बागलुङको बडिगाड गाउँपालिकाको स्वास्थ्य शाखा प्रमुख विपेन्द्र प्रताव केसी लाई मोसो दलेको छ।
आइतबार घर देखि कार्यालय तर्फ गइराखेको अवस्थामा क्रान्तिकारी कम्युनिष्ट पार्टी नेपाल, बागलुङ कमिटीले स्वास्थ्य शाखा प्रमुख केसीलाई मोसो दलेको हो।
म्याद गुज्रेको औषधि खुवाएर बडिगाडका स्थानीयको जीवनमाथि नै खेलबाड गरेको भन्दै कारबाहीस्वरूप कालोमोसो दलेको जिल्ला इन्चार्ज अजनवीले हस्ताक्षर गरेको विज्ञप्तीमा लेखिएको छ ।
जिल्ला इन्चार्ज अजनवी र संयोजक प्रविणद्वारा जारी विज्ञप्तिमा ‘बडिगाड गाउँपालिका अध्यक्ष र स्वास्थ्य शाखा प्रमुखको मिलेमतोमा म्याद सकिएको औषधि खरिद गरी कमिशनको खेलमा विद्यार्थीको स्वास्थ्यमा खेलवाड गरेकोले कारबाही गरिएको लेखिएको छ ।
गाउँपालिका अध्यक्ष र कर्मचारीको सेटिङमा आर्थिक दुरुपयोग गरी जनताको स्वास्थ्यमाथि खेलबाड गरिएको भन्दै कारबाही गरिएको सो पार्टीले जनाएको छ।
कारबाही पत्र सार्वजनिक गर्दै क्रान्तिकारी पार्टीले आर्थिक चलखेल सत्ताको दुरुपयोग गरी थप लुटतन्त्र मच्चाउँदै जाने र जनताको आवाजलाई दमन गर्ने कुनै पनि षड्यन्त्र मान्य नहुने भन्दै आगामी दिनमा त्यस्ता गतिविधि नगर्न चेतावनी दिएको छ।

माघ ६ गते

निसीखोला गाउँपालिका र कर्मफ्लाइट्स फाउन्डेसन नेपाल, पोखराको संयुक्त आयोजनामा  निसीखोलाका शिक्षकहरूलाई  ४ दिवशीय सूचना  प्रविधि सीप विकास आईसीटी  तालिमको सफलता पुर्बक आज एक कार्यक्रमका बीच समापन भएको छ ।
उक्त कार्यशालाले  निसीखोला गापा  भित्रका १६ वटा विद्यालयका  मावि र आबि  २४ कम्प्युटर र विज्ञान तथा प्रविधि शिक्षाका शिक्षकहरूलाई कम्प्युटर को प्रयोग सम्बन्धी अभिमुखीकरण गर्नु को साथै आईएसआईएस एकीकृत शैक्षिक व्यवस्थापन सूचना प्रणाली तालिम निसीखोला गाउँपालिकाको हलमा विभिन्न विद्यालयका ३३ जना शिक्षकहरूको सहभागीता भएको थियो।

बाग्लुङको निसीखोला–२ स्थित श्रीरत्न राज्यलक्ष्मी माविमा आयोजित कार्यक्रमको अध्यक्षता गापा सामाजिक विकास समितिका संयोजक तथा वडा नं १ का अध्यक्ष श्री चन्द्र सिंह रामजालीले गर्नु भयो भने  शिक्षा  विभाग प्रमुख मंजु देबी सुबेदीले कार्यक्रम सञ्चालन गर्नुभएको थियो  जहाँ  प्रमुख अतिथि रहनु भएका निसीखोला गापाका प्रशासकीय अधिकृत  श्री दिलीप चन्दले यस प्रकारको तालिमले स्थानीय समुदायमा प्राविधिक साक्षरता बढाउँदै, शिक्षकहरू बीच आईसीटी सीपहरू आदान प्रदान गर्ने र बढाउने प्रतिबद्धता झल्काउने कुरा ब्यक्त गर्नु भयो 

तालिमको पहिलो भाग  तीन दिनमा कर्मफ्लाइट्सका आईटी प्रमुख तथा कम्प्युटर प्रशिक्षक सुबाश  पौडेलद्वारा तालिम प्रदान गरिएका २३ जना सहभागीसहित रत्न राज्य लक्ष्मी मावि, निसीखोला–२, बागलुङमा निसीखोला गापाका  १६ वटा विद्यालयका विज्ञान र कम्प्युटर शिक्षकका लागि आईसीटी सामग्री समेटिएको थियो। चौथो दिन तालिमको दोश्रो विषय आईएसआईएस रइमिस एकीकृत शैक्षिक व्यवस्थापन सूचना प्रणाली सम्बन्धी तालिम निसीखोला गाउँपालिकाको हलमा विभिन्न विद्यालयका ३३ जना सहभागिता मा भएको थियो  । उक्त सत्रको अभिमुखीकरण  स्थानीय शिक्षक त्रय  इन्द्रलाल रेग्मी, प्रेमराज पौडेल र सूर्य बद्र घर्तीले गरेका थिए ।

तालिम निसिखोला गापा र कर्मफ्लाइट्स फाउन्डेसन नेपालको संयुक्त प्रयासमा भएको थियो । समापन समारोहमा निसीखोला गापाका सामाजिक विकास समिति  संयोजक श्री चन्द्रसिंह राम्जालीको  अध्यक्षतामा र प्रमुख अतिथिका रुपमा निमित्त प्रमुख प्रशासकिय अधिकृत  टोपबहादुर चन्द उपस्थित थिए ।

तालिममा सहभागी प्रशिक्षार्थी शिक्षक हरूलाई प्रमाण पत्र वितरण तथा हालै सम्पन्न राष्ट्रपति रनिङ्ग शिल्डका उत्कृष्ट प्रस्तुति तथा नृत्य प्रतियोगितामा प्रथम हुन सफल विद्यालय का विद्यार्थीहरूलाई गाउपालिका शिक्षा शाखाबाट सम्मान पनि गरिएको कार्यक्रम सञ्चालक शिक्षा शाखा प्रमुख मन्जु सुवेदी ले जानकारी दिइन।

कर्मफ्लाइटस संस्थाले एडुटेक नेपाल संग को साझेदारी, गाउपालिकाको समन्वय तथा बिध्यालयहरुको समेत सह लागानीमा पालिकामा ९ वटा निमावि मा सुविधा सम्पन्न कम्प्युटर ल्याब निर्माण गरि चलायमान गराई सिकाईमा आईसीटी  को माध्यमबाट शिक्षामा रुपान्तरण र गुणस्तर वृद्धि  गर्न संस्था लागि परेको संस्थाका कार्यक्रम निर्देशक प्रेम बहादुर कुँवरले बताए।
अब अर्को यस्तै प्रकृतिको ३ दिवशीय तालिम आजकै  मिति देखि ढोरपाटन नगर पालिका अन्तर्गतका विद्यालयका शिक्षक हरुलाई पनि प्रदान गरिने  गरि सम्पूर्ण तयारी भैसकेको र तालिम श्री उत्तरगंगा माबि बुर्तिबाङ्गको कम्प्युटर प्रयोगशालामा संचालन हुने कुरासंस्थाका बाग्लुङ जिल्ला कार्यक्रम संयोजक शिक्षाप्रेमी झम बहादुर कुँवरले जानकारी दिए ।

माघ ७ गते बुर्तिबाङ 

बागलुङ जिल्ला स्तरीय १२ औँ राष्ट्रपति रनिङ शिल्ड प्रतियोगितामा ढोरपाटन नगरपालिकाको प्रतिनिधित्व गर्दे कराते विधामा ढोरपाटन नगरपालिका टिम च्याम्पियन बन्न सफल भएको छ ।

शनिबार बागलुङमा भएको राष्ट्रपति कप छनौट प्रतियोगिता अन्र्तगत विभिन्न ४ पालिकाका प्रतिस्पर्धालाई पछाडि पार्दै ढोरपाटन नगरपालिकाको टिमले कराते विधामा ६ गोल्ड, १ रजत, २ काश्य सहित टिम च्याम्पियन बन्न सफल भएको हो ।

प्रतियोगितामा छात्र तर्फ ४२ केजी मा मिजन बूढा, ५२ केजी तर्फ विजय भण्डारी, ६२ केजी तर्फ इन्साफ पुन, छात्रा तर्फ ४५ केजी तर्फ थममाया बराइली, ५० केजी तर्फ सोफिया पुन, ५५ केजी तर्फ नेहा स्मिथ छनौट हुनुभएको थियो । त्यस्तै रजत पदक तर्फ द्धिर्तिय मा छात्रा तर्फ ४० केजी तौलमा हेमकुमारी श्रीपाली,   तिर्तीय स्थानमा ४७ केजी तौलमा छात्र कास्य पदक प्राप्त गर्नेमा संगम घर्ती हुनुभएको छ ।

५७ केजी कास्य पदक प्राप्त गर्नेमा  अस्मित पुन  रहनुभएको प्रशिक्षक तथा नेपाल सितोरियो कराते संघ ढोरपाटन नगरपालिका अध्यक्ष  चित्र बहादुर पुनले बताउनु भयो ।

माघ ६ गते 

नेपाल सुनचाँदी महासंघ इकाई ढोरपाटन बुर्तिबाङले हाल कायम हुँदै आएको ज्याला दरमा वृद्धि गर्ने निर्णय गरेको छ । समितिका अध्यक्ष बोम बहादुर सुनारको अध्यक्षतामा बसेको बैठकले बढ्दो महँगी र अस्वस्थ प्रतिस्पर्धालाई ख्याल गर्दे समितिले निर्धारण गरेको ज्यालादरलाई कायम राख्दै सबै व्यवसायीले ज्यालादरमा एकरूपता कायम राख्ने निर्णय गरिएको समितिका सचिव  सोम बहादुर पौवीले बताउनु भयो । 

काठमाण्डौमा पाइने सुनको मूल्यमा दुई हजार पाँच सय रुपैयाँ वृद्धि गरेर कारोबार गर्ने र सबैको दरभाउ एकै किसिमको बनाउने गरि मिथुन पौवी संयोजक रहेको ३ सदस्य अनुगमन समितिको समेत गठन गरिएको छ । ज्यालामा सुनचाँदीको तौल अनुसार वृद्धि हुने जनाइएको हो । 

बिहीबार बसेको समितिको बैठकले विभिन्न विषयमा छलफल गर्दे बजारमा हरेक सामानको मूल्य वृद्धि हुँदै गर्दा सुनचाँदी व्यवसायीको ज्यालादर लामो समयदेखि एकै किसिमको रहेको भन्दै सुनचाँदीका विभिन्न गरगहना निर्माणमा ज्यालादर वृद्धि गर्ने निर्णय समेत भएको अध्यक्ष बोम बहादुर सुनारले बताउनु भयो ।  समितिले बेरुवा रिङ्ग सादा रिङ्गमा आधा तोलाको १ लाल जर्ति र १ तोलामा २ लाल जर्ति ज्याला रु ५०० बेरुवा अंगुठिमा पनि आधा तोला १ लाल र १ तोलामा २ लाल ज्याला ५०० बेरुवा बाला सादा बालामा १ तोलाको २ लाल र क्रमश तौल अनुसारको जर्ति बढेर जाने ज्याला ५०० सादा सिक्रीमा क्रमश १।२।३।४।५ को जर्ति ५।८।१०।१२।१५ लालको ज्याला १००० तोकिएको निर्णय गरेको छ

 माघ ६ गते ढोरपाटन

बागलुङको निसीखोला गाउँपालिका वडा नं. १ बाट उमेर नपुग्दै बाल विवाह गरेको आरोपमा प्रहरीले एक जोडी बेहुला बेहुली सहित चार जनालाई पक्राउ गरेको छ ।

गत बिहीबार बाल विवाह गरेको आरोपमा विवाह मण्डपबाट बेहुला बेहुली सहित चार जनालाई पक्राउ गरिएको जिल्ला प्रहरी कार्यालय बागलुङका प्रहरी नायब उपरीक्षक डीएसपी एवम् सूचना अधिकारी मदन केसीले जानकारी दिए । ‘विवाह भइरहेको स्थानमा झगडा भएको भन्ने सूचनाका आधारमा इलाका प्रहरी कार्यालय बुर्तिबाङबाट प्रहरी त्यहाँ पुगेको थियो,’ विवाह भइरहेको स्थानमा पुग्दै गर्दा बालविवाह भएको पाइएपछि प्रहरीले दुलाहा दुलही सहित चार जनालाई पक्राउ गरि जिल्ला प्रहरी कार्यालय बागलुङ पठाएको हो । दुलाहा कक्षा ७ मा र दुलही कक्षा ९ मा अध्ययन गर्दे आइरहेका थिए । बेहुला र बेहुलीको उमेरमा शंका लागेपछि उनीहरूका अभिभावकसहित चार जनालाई पक्राउ गरेका हौँ केसीले भन्नु भयो ।’ पक्राउ परेका बेहुला बेहुलीको उमेर २० वर्षभन्दा कम रहेको प्रारम्भिक अनुसन्धानबाट खुलेको छ । पक्राउ परेका उनीहरूविरुद्ध जिल्ला अदालत बागलुङबाट चार दिनको म्याद थप गरी अनुसन्धान भइरहेको छ । पश्चिम बागलुङमा अधिकांश बाल विवाह हुँदै गर्दा प्रहरीले पक्राउ गरेको यो घटना पहिलो हो । मुलुकी अपराध संहिता २०७४ मा विवाह गर्ने व्यक्तिको उमेर २० वर्ष नपुगी कसैले विवाह गर्न वा गराउन नपाउने उल्लेख छ । सोही बमोजिमको कसूर गर्ने विवाह गर्ने र गराउने व्यक्तिलाई तीन वर्षसम्म कैद र तीस हजार रुपैयाँसम्म जरिवाना हुने उल्लेख छ । कम उमेरमा विवाह भएको प्रमाणित भए विवाह स्वतः बदर हुनेछ ।

माघ ६ गते
जिल्लास्तरीय राष्ट्रपति रनिङ शिल्ड प्रतियोगिताको छात्रा भलिबल बडिगाड गाउँपालिकाले जितेको छ । शनिबार भएको फाइनल खेलमा बागलुङ नगरपालिकालाई सोझो सेटमा पराजित गरेर बडिगाड महिला भलिबलतर्फ च्याम्पियन बनेको हो । बडिगाडले बागलुङ नगरपालिकालाई २५–१६ र २५–१५ को सेटमा पराजित गरेको भलिबल संयोजक किसोर छन्त्यालले जानकारी दिए ।फागुन दोश्रो साता हुने गण्डकी प्रदेशस्तरीय प्रतियोगितामा बागलुङबाट उनीहरुले खेल्नेछन् ।

छात्रतर्फको भलिबल भने आइतबार मात्रै फाइनल हुने बताइएको छ । शनिबार सबै खेल नसकिएपनि जिल्लास्तरीय राष्ट्रपति रनिङ शिल्डको उपाधि बागलुङ नगरपालिकाले जित्ने पक्का(पक्की भएको छ ।

एथलेटिक्सतर्फ बागलुङ नगरपालिकाले १४ स्वर्ण ५ रजत र ५ कास्य जितेको छ । त्यसबाहेक उसुतर्फ ७ स्वर्ण र ३ रजत तथा भलिबल तर्फको १ रजत पदक हात पारिसकेको छ ।

कुल ६६ स्वर्ण पदकमा काठेखोला र निसीखोलाले समान ४र४ स्वर्ण, जैमिनीले ३ स्वर्ण र गलकोटले १ स्वर्ण पदक हात पारिसकेका छन् ।छात्रछात्राको कबड्डी, तेक्वान्दो र करााते तथा छात्र भबिलल प्रतियोगिताको पदक आइनसकेको खेलकुाद बिकास समितिका अध्यक्ष कुमार खड्काले बताए ।

पौष ६ गते
बागलुङको तमानखोला गाउँपालिकाको कार्यालयमा लगाइएको ताला प्रहरीले फुटाएको छ । बागलुङ बजारमा बन्दै गरेको विपी स्मृति भवनका लागि गाउँपालिकाले १४ लाख रकम विनियोजन गरेपछि असहमति जनाउँदै पालिकाका जनप्रतिनिधिहरुले लगाएको ताला शुक्रबार प्रहरीले फुटाएको हो ।
यता, जनप्रतिनिधिले लगाएर ताला प्रहरी प्रशासन लगाएर फुटाएको भन्दै नेकपा माओवादी केन्द्र, नेकपा एमाले र राष्ट्रिय जनमोर्चाले संयुक्त आन्दोलनका कार्यक्रम घोषणा गरेका छन । शनिबार विज्ञप्ति जारी गर्दै उनीहरूले आन्दोलनका कार्यक्रम घोषणा गरेको हुन ।
विज्ञप्तीमा लेखिए अनुसार ‘विरोधको कार्यक्रमपछि स्थानीय सरकार प्रमुखले राजनीतिक सहमतिको पहल गर्नुको सट्टा जिल्ला प्रशासन कार्यालयको गैरजिम्मेवारी आदेशको आधारमा प्रहरी परिचालन गरी ताला तोडेको कारण हामी थप शान्तिपूर्ण आन्दोलनका कार्यक्रमहरु गर्न बाध्य भएका छौं, ’ संयुक्त प्रेस विज्ञप्तिमा भनिएको छ , ‘बजेट नसच्चाएसम्म हामी निरन्तर आन्दोलनमा रहनेछौं । उक्त आन्दोनलको कार्यक्रममा कुनै अप्रिय गतिविधि हुन गएमा जिल्ला प्रशासन र स्थानीय सरकार प्रमुख स्वयम जिम्मेवार हुनपर्नेछ ।’

माघ ४ गते बसेको गाउँसभाको बैठकबाट विपी स्मृति भवनका लागि १४ लाख रुपैयाँ बजेट विनियोजन गरिएपछि तमानखोला गाउँपालिकामा माओवादी केन्द्रबाट निर्वाचित ११ जना जनप्रतिनिधिले कार्यालयमा तालाबन्दी गरेका थिए ।

माघ ६ गते शनिबार

गण्डकी प्रदेश सभा सदस्य माननीय दोर्ण कुमार कुवँरले आदीबासी जनताजति समुदायको हक अधिकार स्थापित गर्न र नेतृत्वमा पुग्नका निम्ति सक्रियताका साथ लाग्नुपर्ने बताउनु भएको छ ।

नेपाली कांग्रेस निकट नेपाल लोकतन्त्रवादी आदीबासी जनजाती महासंघ ढोरपाटन नगर अधिवेशनको शनिबार बुर्तिबाङमा आयोजित कार्यक्रमलाई उद्घाटन सहित सम्वोधन गर्दे साँसद कुवँरले आदीबासी जनजाति समुदायको हक अधिकार संगै राजनैतिक क्षेत्रबाट नेतृत्वको विकास गर्न अगाडि बढ्नुपर्ने बताउँदै अधिवेशनबाट सक्रिय टिमको नेतृत्व चयन गर्न सुझाव दिनुभएको हो ।

सांसद कुवँरले फरक प्रसङ्गमा बोल्दै निसी भुजी तमान सहित पश्चिम बागलुङको विकास र समृद्धिका निम्ति आफूहरूले प्रदेश सरकारमा रहेर जनअपेक्षा बमोजिम काम गर्ने प्रयत्नका साथ अगाडि बढिएको बताउँदै सबैको पहुँच र अपनत्व हुने गरि विकास र समृद्धिमा अगाडी बढिने बताउनु भयो ।

बन्दसत्रबाट सुरु भएको अधिवेशनले अने थापा अध्यक्ष रहेको १० सदस्य ढोरपाटन नगर निकट नेपाल लोकतन्त्रवादी आदीबासी जनजाति महासंघ गठन गरिएको छ । समितिको उपाध्यक्षमा नर कुमारी छन्त्याल र टेक बहादुर पुन, सचिव वीरेन्द्र बुढाथोकी र टोप बहादुर पुन, सहसचिव याम बहादुर बूढा र दिल कुमारी घर्ती, सदस्यहरूमा मनिमला पुन, सोम बहादुर घर्ती, बुद्ध कुमारी कुमाल चयन हुनुभएको छ ।

नवगठित समितिले ३ जना सदस्य मनोनित गर्ने भएको निर्वाचन मण्डलका सदस्य पुरन पाण्डेले बताउनु भयो । आयोजित कार्यक्रमको उद्घाटन सत्रको कार्यक्रम नेपाली कांग्रेस ढोरपाटन नगर वडा नं. १ का सभापति वान बहादुर छन्त्यालको अध्यक्षता, नेपाली कांग्रेस जिल्ला सदस्य शैलेश घर्ति, समाजसेवी हर्क बहादुर गुरुङ, नेपाली कांग्रेस क्षेत्रीय सदस्य ढालेन्द्र छन्त्याल, नेपाल विद्यार्थी मगर संघ केन्द्रिय सदस्य गगन पुन वडा नं. १ उपसभापति भक्त बहादुर वि.क., वडा नं. २ सभापति जित बहादुर कुवँर लगायतको आतिथ्यता एवं शुभकामना मन्तव्य रहेको थियो ।

अधिवेशनलाई सफल पार्न निर्वाचन मण्डलमा संयोजक निम बहादुर जिसी संयोजक सहित पुरन पाण्डे, गीता घिमिरे र मधुमाया गुरुङ रहेको समितिले सहमतिमा समिति गठन कार्यक्रमलाई पूर्णता दिएको हो । 

बुर्तिबाङ माघ ५ गते
दश नमुना शहर अन्र्तगत रहेको बुर्तिबाङ नयाँ शहर आयोजना कार्यालयमा कार्यालय प्रमुख विहीन बन्दा सेवा प्रवाहमा समस्या देखिएको छ ।
कार्यालय प्रमुख अभिषेक अधिकारी दुई महिना पहिले सरुवा भई गएपछि हालसम्म कार्यालय प्रमुख कार्यालयमा नआउँदा भुक्तानी प्रकृया देखि धेरै काम अलपत्र रहेको पाइएको छ । आयोजनाको आर्थिक बर्स २०८०÷०८१ अन्र्तगत कुल ५० प्रतिशत हाराहारीमा काम सम्पन्न भइसक्दा समेत कार्यालयले कुनै पनि भुक्तानी दिन सकिरहेको छैन ।

कार्यालय प्रमुखको रुपमा राम कृष्ण गिरीलाई विभागबाट खटाए पनि हालसम्म कार्यालयमा उपस्थित नहुँदा कार्यसम्पादनमा समस्या भइरहेको नयाँ शहर आयोजना कार्यालय बुर्तिबाङका सूचना अधिकारी कोमल शाहले बताए ।

गिरीलाई विभागले पठाए पनि जिम्मेवारीमा आउन आलटाल गरिरहेको बताइएको छ । शाहका अनुसार आयोजना प्रमुख गिरीले मन्त्रालयबाट पत्र बुझिसकेको तर संघीय कार्यान्वयन इकाईले रमना दिएपछि यसै महिना कार्यालयमा आउने बताए । यस बर्स कुल आठ करोड बजेट नयाँ शहर आयोजनाका निम्ति विनियोजन भएकोमा विभिन्न ७ वटा ठेक्का मार्फत निर्माणको काम सुरु भइरहेको छ ।

५ वटा योजनाको काम सृजना एण्ड कुञ्जम जेभिले जिम्मा पाएको छ एकवटा योजनाको काम श्रीमान निर्माण सेवा हेटौँडाले प्राप्त गरेको हो र अर्का योजनाको समेत काम ठेक्का सम्झौता भइसकेको र अब निर्माणको चरणमा रहेको जनाइएको छ । हालसम्म ६ वटा योजनाको कामका लागी ठेक्का सम्झौता भई मूल्यांकन समेत भइसकेको छ । अधिकांश योजनाको काम चलिरहँदा बुर्तिबाङ घम्चिनमा सडकको ५० लाखको काम सम्पन्न भएको बताइएको छ ।

त्यस्तै ढोरपाटन ३ पुर्काट मा सडकको २५ लाखको काम सकिएको छ । नयाँ शहर आयोजना कुत्थाप्लामा पार्क निर्माणको काम अन्तिम चरणमा रहेको हो । अन्य आयोजनाको काम पनि भइरहेको छ तर गत वर्षको सहित हालसम्म सम्पन्न गरिएका योजनाबाट चार करोड भुक्तानी दिन बाँकी रहेको शाहले बताए ।
गतबर्ष को कार्यक्रम अन्र्तगत असोज महिनामा निर्माण सकिएको कामको समेत हालसम्म भुक्तानी प्राप्त गर्न बाँकी रहेको जेनिशा निर्माण सेवाका प्रमुख दीपक अदैले बताउनु भयो । कार्यालय प्रमुख नभएकै कारण सेवा प्रवाहमा समस्या भएको अदैको भनाई छ । कार्यालयले यसवर्ष सडक, पार्क, सभाहल जस्ता आयोजनामा बजेट विनियोजन गरेको हो । आर्थिक वर्ष २०६७ ÷६८ देखि सरकारले व्यवस्थित शहर बनाउने भन्दै मध्य पहाडी लोकमार्गका विभिन्न १० स्थान छनौट गरेको थियो जसमध्ये बुर्तिबाङ पनि रहेको छ ।
१२ बर्स बित्दै गर्दा कार्यालयले जनअपेक्षा बमोजिम काम गर्न नसकिरहेको सर्वसाधारणको गुनासो छ । आयोजनाले हालसम्म जग्गा खरिद, सडक निर्माण, बसर्पाक, निर्माण, आफ्नै कार्यालय भवन निर्माण पार्क घेराबार, सभाहल निर्माण, सौर्य बत्ती जडान, ढल व्यवस्थापन जस्ता काम गरेपनि दिगो लक्ष्य सहितको गुणस्तरीय काम हुन नसकेको पाइएको छ । अधिकांश निर्माण थालिएका योजना बिचमा अलपत्र अवस्थामा रहेका छन ।

विभिन्न स्थानमा सडक ढलान बसपार्क निर्माण थालिएपनि क्रमागत रुपमा काम हुन नसक्दा अलपत्र छन भने बढि प्रभावकारी ठाँउ मा जग्गा खरिद गर्न नसक्दा प्रशासनिक कार्यालय व्यवस्थापनमा समस्या देखिएको छ । स्थानीय सरकार र नयाँ शहर आयोजना बिच समन्वय हुन नसक्नु, कार्यालय प्रमुख नियमित कार्यालयमा नरहनु र स्थानीयको खबरदारी समेत नहुनुका कारण पनि अपेक्षाकृत उपलब्धीमा गिरावट देखिएको स्थानिय टोल विकास संस्थाका अध्यक्ष सरन पाण्डेले बताए ।

नयाँ सहरका रूपमा निर्दिष्ट क्षेत्रमा कालोपत्रे सडक निर्माण, व्यवस्थित विद्युतिकरण, खानेपानी, ढल निकासी लगायतको प्रबन्ध, उद्यान, खेल मैदान, मनोरञ्जन स्थल, हाट बजार लगायतको निर्माण कार्य व्यवस्थित हुनु पर्ने भनिए पनि अझैसम्म धेरै पूर्वाधार निर्माण हुन सकेको छैन । बसोबासलाई व्यवस्थित गर्ने, बसाइँ सरी तराईका जिल्ला तथा ठूला शहरहरूमा जानेहरूलाई रोक्न यस आयोजना सञ्चालन गरिएको थियो ।एक लाख जनसंख्या अट्ने बस्ती बस्न योग्य पूर्वाधार सहितको संरचना निर्माण गर्ने भनिएपनि त्यसको प्रभावकारिता भने कम देखिएको पाइन्छ ।

सरकारले मध्ये पहाडी लोकमार्ग पर्ने बागलुङको बुर्तिबाङ, पाँचथरको फिदिम, तेह्रथुमको वसन्तपुर, सिन्धुलीको खुर्कोट, धादिङको बैरेनी गल्छी, अछामको साँफेबगर, तनहुँको डुम्रे, रुकुमको चौरजहारी, दैलेखको राकम कर्णाली, बैतडीको पाटनलाई मध्य पहाडी राजमार्गअन्तर्गतका १० नयाँ शहर निर्माण गर्ने लक्ष्य राखेको हो सरकारले पछिल्लो समय अन्य क्षेत्रमा समेत नयाँ शहर निर्माण गर्ने लक्ष्य लिएको हो ।