पौष २९ गते
बागलुङको तमानखोला गाउँपालिकाले आइतबार देखि दोश्रो गाउँसभा तथा चौथो अधिवेशन सुरु भएको छ ।
गाउँपालिका अध्यक्ष जोकलाल बुढाको अध्यक्षतामा आयोजित कार्यक्रममा गण्डकी प्रदेशका भौतिक पूर्वाधार विकास तथा यातायात व्यवस्था मन्त्री रेशम बहादुर जुग्जाली ले प्रमुख अतिथिको रुपमा कार्यक्रमको उद्घाटन गर्नुभएको थियो ।

मन्त्री जुग्जाली ले बोल्दै संघीयताको कारण सिंह दरबारको अधिकार गाउँगाउँमा आइपुगेका कारण सुगम देखि दुर्गम सम्मका नागरिकले सेवा सुविधा संगै विकासको आभाष गर्न पाएको बताउनु भयो ।

तमानखोला गाउँपालिका जिल्लाकै दुर्गम हुँदै गर्दा पनि स्थानीय तहपछि धेरै विकास भइसकेको बताउँदै तमानखोला को विकासमा आफूहरूले समेत पहल गर्ने र बुर्तिबाङ, तमान हुँदै म्याग्दी जोड्ने सडकलाई व्यवस्थित गराउन आफुहरुले काम गरेको बताउनु भयो ।

गाउँसभाको विषयमा गाउँपालिका अध्यक्ष एवम सभा अध्यक्ष जोकलाल बुढाले विभिन्न ३ वटा प्रस्ताव पेश गर्नुभएको थियो । सभाले उक्त विषयमाथि व्यापक छलफल गरि पारित गर्ने उदेश्य सहित आगामी माघ ४ गतेका लागी सभा सारिएको हो ।

गाउँपालिका उपाध्यक्ष हिराकुमारी छन्त्यालले संशोधित बजेट तथा रकमान्तर बजेट वक्तव्य प्रस्तुत गर्नुभएको थियो प्रतिवेदन अनुसार दुई करोड २४ लाख ९० हजार थप संशोधित बजेट ल्याइएको जनाइएको छ । यस आर्थिक वर्षको पौष मसान्त सम्म चालु तर्फ ६ करोड ४२ लाख १० हजार ३४४ कुल ३०. ११ प्रतिशत र पुँजीगत तर्फ ६४ लाख २२ हजार ६ सय कुल ७.०८ प्रतिशत खर्च भइ हालसम्म ७ करोड ३२ लाख कुल २४ प्रतिशत बजेट खर्च भएको बताउनु भयो ।

त्यस्तै सभामा वडा नं.१ र २ को सिमाना र बस्ती नमिलेका कारण दुई वटा वडालाई ३ वटामा पुर्याउने गरि सभाबाट पास गरेर प्रकृया अगाडि बढाउने विषयमा समेत छलफल हुने भएको छ । जसमा साविक बोङगादोभान गाविसको वडा नं.५ र ६ को भूगोल बस्ती नमिलेका कारण एक वडा थप गर्नका निम्ति प्रकृया अगाडि बढाउने र वडा नं. १ र २ लाई ३ वटा वडा बनाउने विषयमा छलफल हुने भएको छ ।
सभामा पास भएपछि प्रदेश सभामा पठाउने र प्रदेशबाट पास भएपछि संघिय सरकारबाट पुनर संरचना अगाडी बढ्ने भएका कारण त्यसका निम्ति प्रकृया अगाडि बढाउने विषयमा छलफल हुने सभाका अध्यक्ष जोकलाल बुढाले बताउनु भयो ।
विभिन्न ३ वटा प्रस्ताव सभामा पेश गरिएको थियो जसमध्ये तमानखोला गाउँपालिकाको आर्थिक बर्ष २०८०÷०८१ को बजेट तथा कार्यक्रम संशोधन तथा रकमान्तरण सम्वन्धमा ,वडा नं. १ र २ को वडा सिमाना सम्बन्धमा र हालसम्मका निर्णय र खर्च अनुमोदन सम्बन्धमा प्रस्ताव पेश गरिएको हो । आजको प्रस्तावलाई थप छलफल गरि माघ ४ गतेको सभाबाट अगाडि बढिने अध्यक्ष जोकलाल बुढाले बताउनु भयो ।कार्यक्रम गाउँपालिका प्रमुख प्रशासकीय अधिकृत ईश्वरलाल शाक्यले सञ्चालन गर्नुभएको थियो ।

पौष २८ गते

 गण्डकी प्रदेश सरकारका भौतिक पूर्वाधार विकास तथा यातायात व्यवस्था मन्त्री रेशम बहादुर जुग्जाली ले वर्तमान सरकारले छोटो समयमै देशको विकास र समृद्धिमा गति लिन सफल भएको बताउनु भएको छ । 

शनिबार बागलुङको ढोरपाटन स्थित बुर्तिबाङ ढोरपाटन यातायात सेवा प्रा.ली. को सातौँ साधारण सभा एवम् चौँठो अधिवेशन को सन्दर्भमा प्रमुख अतिथिको रुपमा रहनु भएका मन्त्री जुग्जाली ले वर्तमान सरकारले कयौँ नीतिगत भ्रष्टाचार भएपनि संस्थागत भ्रष्टाचारको अन्त्य गर्दे आइरहेको बताउँदै देशलाई समृद्ध बनाउने अभियानमा सरकारले महत्वपूर्ण भूमिका खेल्ने बताउनु भयो ।
लामो समयदेखि ऋणमा रहेको आयल निगम, वायुसेवा निगम जनक शिक्षा सामाग्री केन्द्र पहिलो पटक नाफामा गएको बताउँदै भ्रष्टाचारको अन्त्य भएमा देशको विकासले गति लिन धेरै समय नलाग्ने बताउनु भयो ।
संघीयताको कार्यान्वयन सँगै देशको विकास र समृद्धिले गति लिएको बताउँदै पहुँचको भरमा हुने विकास आजका दिनमा दुर्गम क्षेत्रमा समेत पुग्दै गएको बताउनु भयो ।
यातायात व्यवसायीले राखेको मागका विषयमा बोल्दै मन्त्री जुग्जाली ले अब ट्याक्सी व्यवसायीको समस्या क्रमिक रुपमा सम्बोधन हुँदै गएको बताउँदै एकै प्रदेशका अन्तर जिल्लामा रुट पारमित रहेकोमा अव प्रदेशभरि रुट पारमित आवश्यक नपर्ने गरि नियमावली बनाइएको र चाँडै कार्यान्वयन गरिने बताउनु भयो ।
व्यवसायीका पनी समस्या छन उपभोक्ताका पनि समस्या छन दुबै पक्षका समस्या सम्बोधन हुने गरि आफूले काम गर्नुपर्ने बताउँदै ट्याक्सी व्यवसायीले समेत व्यवसाय संगै सेवामुखी भावसँग पनी जोडिन आग्रह गर्नुभयो । 

कार्यक्रमका अवसरमा तमानखोला गाउँपालिका अध्यक्ष जोकलाल बुढा, निसीखोला गाउँपालिका उपप्रमुख प्रेम बहादुर घर्ति, नेकपा माओबादी केन्द्र गण्डकी प्रदेश कमिटी उपाध्यक्ष ज्ञामनाथ गैरे, उद्योग वाणिज्य संघ ढोरपाटन अध्यक्ष धालेन्द्र छन्त्याल, इलाका प्रशासन कार्यालय बुर्तिबाङ प्रमुख लोक बहादुर कुवँर, संस्थाका महासचिव नर बहादुर क्षेत्री लगायतको आतिथ्यता एवम् शुभकामना मन्तव्य रहेको थियो ।
उद्घाटन सत्रको कार्यक्रम संस्थाका अध्यक्ष विनोद भण्डारीको अध्यक्षता, गुञ्ज बहादुर भण्डारीको स्वागत, नरिश्वर घिमिरेको सञ्चालमा कार्यक्रम सम्पन्न भएको हो । त्यस्तै चौँठो अधिवेशन बन्द सत्रको कार्यक्रम अहिले सुरु भएको छ । 

पौष २८ गते बुर्तिबाङ 

शनिबार बिहान ढोरपाटन नगरपालिका ५ मा भएको जिप दुर्घटनाका घाइते ९ जना मध्ये ७ जनालाई बुर्तिबाङ स्वास्थ्य केन्द्रमा उपचार पछि थप उपचारका निम्ति हेलि मार्फत पोखरा स्थित मणिपाल हस्पिटलमा लगिएको छ ।

टाउको र शरीरका विभिन्न भागमा चोट रहेका कारण घाइते मध्ये जोग नारायण गैरे, मन कुमारी गैरे, कल्पना गैरे, निरूता गैरे,कृष्ण गैरे लक्ष्मी गैरे र दिपेश गैरलाई उपचारका लागी रिफर गरिएको बुर्तिबाङ  स्वास्थ्य केन्द्रका प्रमुख डा. नविन्द्र ढकालले बताउनु भयो ।

 घाइते मध्ये बिवराज गैरे र सहचालक चित्र बहादुर घर्तिको अवस्था सामान्य रहेका कारण बुर्तिबाङ स्वास्थ्य चौकीमा उपचार गरिएको छ ।

शनिबार बुर्तिबाङ बजार देखि परिवारका सदस्य सहितको टुर ढोरपाटन जाँदै गरेको ध १ ज १९ नम्बरको जिप बिहान करिब ११ बजेको समयमा ढोरपाटन ५ प्याङखोला नजिकै बतासे डाँडामा दुर्घटना हुँदा जिप चालक ढोरपाटन ४ का २८ बर्षिया तिलक घर्ति र ढोरपाटन ४ हाल काठमाण्डौमा बस्ने बर्स २८ का संजिता अधिकारी गैरेको मृत्यु भएको थियो ।

पौष २८ बुर्तिबाङ
बागलुङको ढोरपाटन नगरपालिकामा जिप दुर्घटना हुँदा २ जनाको घटना स्थलमै मृत्यु भएको छ ।

शनिबार ढोरपाटन नगरपालिकाको वडा नं. १ बुर्तिबाङ बजार देखि प्रर्यटकिय क्षेत्र ढोरपाटन जाँदै गरेको ध १ ज १९ नम्बरको जिप बिहान करिब ११ बजेको समयमा ढोरपाटन ५ प्याङखोला नजिकै बतासे डाँडामा दुर्घटना हुँदा जिप चालक ढोरपाटन ४ का २८ बर्षिय तिलक घर्ति र ढोरपाटन ४ हाल काठमान्डौ बस्ने बर्ष २८ का संजिता अधिकारीको मृत्यु भएको प्रहरीले जनाएको छ ।
११ जना सवार जिपमा अन्य ९ जना घाइते हुनुभएको हो । घाइते हुनेमा ढोरपाटन ४  बस्ने ४८ बर्षिय जोग नारायण गैर , ३९ बर्षिय मन कुमारी गैरे, २७ बर्षिय कल्पना गैरे, ५१ बर्षिय विवराज गैरे, ४२ बर्षिय निरुता गैरे, ४५ बर्षिय कृष्ण गैरे , ३२ बर्षिय दिपेश गैरे , ४० बर्षिय लक्ष्मि गैरे र २८ बर्षिय चित्र बहादुर घर्ति मगर घाइते हुनुभएको इलाका प्रहरी कार्यालय बुर्तिबाङले जनाएको छ ।

दुर्घटनामा  सबै जना ढोरपाट नगरपालिका ४ का रहेको र चालक र सहचालक बाहेक अन्य  एकै परिवारको रहेको पाइएको छ

घाइतेको टाउको र हात खुट्टामा चोट लागेको हो । बुर्तिबाङ स्वास्थ्य चौकीमा उपचार भइरहेको र थप उपचारका निम्ती पोखरा लैजाने तयारी भइरहेको जनाइएको छ । बतासे डाँडा पार गरेर ओराले झर्दे गर्दा जिप दुर्घटना भएको छ दुर्घटनाको विषयमा अनुसन्धान भइरहेको इलाका प्रहरी कार्यालय बुर्तिबाङका प्रमुख प्रहरी निरीक्षक राजकुमार बिकले बताउनु भयो ।

पौष २७ गते

 बागलुङको ढोरपाटन नगरपालिका १ बुर्तिबाङमा शुक्रबार देखि फुटबल प्रतियोगिता सुरु भएको छ । बुर्तिबाङ फुटबल क्लबको आयोजनामा चौँठो बुर्तिबाङ कप सेभेन ए साइड प्रतियोगिता सुरु भएको हो आगामी माघ १ गतेसम्म सञ्चालन हुने प्रतियोगितामा विभिन्न १० समुहको सहभागिता रहेको हो ।

शुक्रबार आयोजित प्रतियोगिता अन्र्तगत आयोजक समुह निलो र तमान खोला समुह बिचको खेलमा तमान खोला अघिल्लो चरणमा प्रवेश गरेको छ । प्रतियोगितामा प्रथम हुने समुहले नगद ७७ हजार ७ सय ७७ कप मेडल र प्रमाणपत्र प्राप्त गर्ने छ

त्यस्तै द्धिर्तिय हुनेले रु ४४ हजार ४ सय ४४ कप मेडल र प्रमाणपत्र प्राप्त गर्ने क्लब अध्यक्ष युवराज कुवँरले बताउनु भयो । प्रतियोगितामा उत्कृष्ट खेलाडीलाई विभिन्न विधामा पुरस्कृत र सम्मान गरिने जनाइएको छ ।

पौष २७ गते बुर्तिबाङ
बागलुङ जिल्लाको ढोरपाटन नगरपालिकाको वडा नम्बर ७ बोबाङमा भएको निः शुल्क वृहत स्वास्थ्य शिविरमा कुल एक हजार १ सय ८७ जनागरिकले सेवा लिएका छन ।
ढोरपाटन नगरपालिकाको आयोजनामा जनताको स्वास्थ्य सँग नगर उपप्रमुख कार्यक्रम अन्र्तगत वडा नंं ६,७, ८ र ९ का नागरिकलाई लक्षित गर्दे बुधबार र बिहिबार दुई दिन सम्म शिविरको शुभारम्भ गरिएको थियो ।
ज्येष्ठ नागरिक बाट उद्घाटन गरेर सुरुवात भएको शिविरमा ३०० जनाको भिडियो एक्सरे, १५० जनाको ल्याब,२०० जनाको आँखा तथा दन्त विशेषज्ञ सेवा चेकजाँच तथा उपचार गरिएको छ ।

९८ जनालाई चस्मा उपलब्ध गराइएको ढोरपाटन नगरपालिका स्वास्थ्य संयोजक केशव थापाले बताउनु भयो । शिविरमा बिरामीको स्वास्थ्य चेक जाँच, भिडियो एक्सरे, मुटुको इ.सी.जी, आँखा जाँच तथा चस्मा वितरण, हाडजोर्नी नशा, बाल रोग तथा स्त्री रोग सम्बन्धी चेक जाँच, पाठेघरको मुखको क्यान्सर जाँच, रगत दिशा पिसाब खकार जाँच, गर्भवती महिलाको चेक जाँच, परिवार नियोजन सेवा, कुपोषित बच्चाहरूको उपचार, अशक्त र ज्येष्ठ नागरिकलाई लौरो हस्तान्तरण लगायतका समस्याको चेकजाँच तथा उपचार गरिएको हो ।
शिविरमा हाडजोर्नी तथा नशा रोग विशेषज्ञ डा. निरञ्जन अर्याल, बुर्तिबाङ स्वास्थ्य केन्द्रमा कार्यरत बालरोग विशेषज्ञ डा. नविन्द्र ढकाल र डा. रचना सुवेदी लगाएत अन्य स्वास्थय कर्मीबाट समेत विरामीको स्वास्थ्य चेकजाँच तथा औषधि उपचार गर्नुभएको छ । ज्ञानोदय माध्यमिक विद्यालयमा आयोजित शिविरमा सेवा लिएका नागरिकलले आफनै घरदैलोबाट निः शुल्क रुपमा सेवा लिन पाउँदा आफुहरुलाई निकै राहात भएको र आगामी दिनमा समेत यस्ता शिविर आवस्यक रहेको बताएका छन ।

पौष २६ गते

इन्द्रमणि पाण्डे

ढोरपाटनमा अखिल नेपाल किसान महासंघ – अप्पा-को नगर भेला तथा प्रशिक्षण कार्यक्रम विहिवार सम्पन्न भएको छ । उक्त कार्यक्रममा सङ्गठनका महासचिव तुल्सीराम सापकोटाले प्रमुख अतिथीको रुपमा बोल्दै,किसानहरुले सङ्गठित संघर्ष नगरे झन् ठूलो समस्या आउने , खेति तथा उत्पादन प्रणालीमा आधुनिकताको विकास हुन नसक्ने ठहर गर्दै आफुहरुले देशव्यापी रुपमा संघर्ष तथा सङ्गठन निर्माण जस्ता कार्यहरु गर्ने सिलसिलामा ढोरपाटनमा पनि कार्यक्रम गरिएको बताउनु भयो ।

कार्यक्रममा राष्ट्रिय जनमोर्चाका केन्द्रीय सदस्य गौरिश्वर पाण्डेले बोल्दै सङ्गठनमा एकता र एकतामा बल हुने भन्दै किसानहरुको समस्या समाधानमा सङ्गठन निर्माण गरि एकताबद्व भएर सघर्ष गर्ने वा आन्दोलनको मोर्चामा राष्ट्रिय जनमोर्चा जहिले पनि किसानहरुको साथमा रहने बताउनुभयो ।

भेलाले तुल्सिराम खरेलको अध्यक्षतामा ११ सदस्यीय नगर समिति गठन गरेको छ जसमा उपाध्यक्ष अविन महत, सचिव ओम बहादुर पाण्डे क्षेत्री,सहसचिव मित्रलाल पौडेल कोषाध्यक्ष ज्ञान बहादुर भण्डारी सदस्यहरुमा टेकलाल पाण्डे , याम सुनाम लगायत रहनुभएको छ ।सो अवसरमा अखिल नेपाल बुद्धिजीवी संघका केन्द्रीय सदस्य धन बहादुर कुँवर, जनजाति सम्मेलनका केन्द्रीय सदस्य तम बहादुर घर्ती अखिल नेपाल महिला संघ ढोरपाटन नगर अध्यक्ष धन कुमारी कुँवर रक्तिम सास्कृतिक अभियान जिल्ला अध्यक्ष सहविन अर्गेजा , अखिल नेपाल राष्ट्रिय स्वतन्त्र विधार्थी युनियन छैठौ-का केन्द्रीय सदस्य बिमल पाण्डे जातिय समता समाजका केन्द्रीय सदस्य नर बहादुर सुनार लगायतले मन्तव्य राख्नुभएको थियो ।

पौष २६ गते बुर्तिबाङ 

ढोरपाटन नगरपालिका ५ शैखोलामा रहेको मिलिजुली महिला बचत तथा ऋण सहकारी संस्थाको ११ औँ साधारण सभा तथा तेश्रो अधिवेशन बिहीबार सम्पन्न भएको छ ।

२०७० सालमा महिलाहरूको मात्रै सक्रियतामा सुरु गरिएको सहकारीले ५६४ जना सेयर सदस्य सँगै ७४ लाख रुपैयाँको कारोबार गर्न सफल भएको छ ।

संस्थाका अध्यक्ष सुनमाया घर्तिको अध्यक्षतामा आयोजित कार्यक्रममा ढोरपाटन नगरपालिका ५ का वडा अध्यक्ष दिपेन्द्र पुनको प्रमुख आतिथ्यता, रुद्रावती कृषि सहकारी संस्थाका अध्यक्ष रेशम राज रेग्मी, ढोरपाटन नगरपालिका पूर्व उपमेयर करमति पुन लगायतको आतिथ्यता एवं शुभकामना मन्तव्य रहेको कार्यक्रममा संस्थाका अध्यक्ष सुनमाया घर्तीद्वारा संस्थाका प्रगति प्रतिवेदन र कोषाध्यक्ष भीम कुमारी क्षेत्रीद्वारा आर्थिक प्रतिवेदन पेश गर्नुभएको हो ।

त्यस्तै तेश्रो आधिवेशनले सुनमाया घर्ती अध्यक्ष रहेको ९ सदस्य कार्य समितिको गठन गरेको छ । समितिको उपाध्यक्षमा भीम कुमारी क्षेत्री, सचिव गीता सापकोटा, कोषाध्यक्ष चमेली पुन, सहसचिव सोभा बूढा श्रीपाली लगायत समितिको चयन गरिएको हो ।

औपचारिक कार्यक्रम कर्मचारी एलिना सिर्पालीको स्वागत, सचिव गीता सापकोटाको सञ्चालनमा सम्पन्न भएको हो ।