फागुन १५ गते बुर्तिबाङ
बुर्तिबाङ बजारमा विभिन्न प्रशासनिक कार्यालयको भवन निर्माणका निम्ति जग्गा व्यवस्थापन समिति र आर्थिक संकलन समितिको गठन गरिएको छ ।
विगत ७ महिनादेखि इलाका प्रशासन, मालपोत र नापी कार्यालयको भवन निर्माणका निम्ति जग्गा व्यवस्थापन र खरिद गर्ने विषयमा छलफल भएपनि कुनै परिणाम नदेखिएपछि मंगलबार गण्डकी प्रदेश सभा सदस्य दोर्ण कुमार कुवँरको सक्रियतामा एक हप्ता भित्र तीनवटै कार्यालय राख्न मिल्ने भवन निर्माणका निम्ति जग्गा व्यवस्थापन समितिको गठन गरिएको हो । धन बहादुर कुवँर संयोजक रहेको समितिले बजार क्षेत्रभित्र एकहप्ता भित्र जग्गाको खोजी गर्ने गरि १० सदस्य समितिको गठन गरिएको छ ।
त्यस्तै माननीय दोर्ण कुमार कुवंर संयोजक रहेको १० सदस्य आर्थिक संकलन व्यवस्थापन समितिको गठन गरिएको हो । जग्गा व्यवस्थापन समितिमा हरि बहादुर कुवंर, दल बहादुर भण्डारी, गङ्गा बहादुर घर्ती, केयरसिंह गुरुङ, निमलाल पाण्डे, धुव्र श्रेष्ठ, गंगा बहादुर शेरबुजा, टोप बहादुर केसी, र सरन पाण्डेलाई राखिएको छ ।
त्यस्तै आर्थिक व्यवस्थापन समितिमा माननीय दिलमाया पौवी, ढोरपाटन नगरपालिका कार्यवाहक मेयर धन बहादुर कायत, वडा नं. १ का अध्यक्ष वान बहादुर छन्त्याल, वीर बहादुर गुरुङ, दिपेन्द्र श्रेष्ठ, शालिकराम शर्मा, गुञ्ज बहादुर भण्डारी, चन्द्रलाल अर्याल, दीपक कुमार अदै लाई चयन गरिएको जनाइएको छ ।
भवन निर्माणका निम्ति सरकारबाट बजेट व्यवस्था गर्न सकिने भएपनि जग्गा खरिदका निम्ति बजेट विनियोजन नहुने भएका कारण जग्गा खरिदका निम्ति बजार बासीबार्टै आर्थिक संकलन गरेर अभियान अगाडि बढाउने मंगलबार वडा नं. १ को कार्यालयमा भएको बैठकले निर्णय गरेको हो ।
विभिन्न टोल विकास संस्थाका पदाधिकारी, राजनैतिक दलका प्रतिनिधि, जनप्रतिनिधि लगायतको उपस्थिति मा भएको छलफलबाट तत्काल जग्गाको खोजी गर्ने, जग्गा खरिद गर्ने र आगामी आर्थिक बर्षको बजेटमा भवन निर्माणका निम्ति पहल गरेर भवन निर्माण गर्नका निम्ति सक्रियता देखाइएको हो ।
बजार क्षेत्रमा जग्गाको मूल्य महँगो र धेरै जग्गा प्राप्त गर्न समेत कठिन रहेको बताउँदै तीनवटै कार्यालय एकै भवनबाट सञ्चालन हुने गरि जग्गा खरिद प्रकृयालाई प्राथमिकता दिइएको हो ।
पटक पटक प्रयास गर्दा समेत आर्थिक श्रोत नहुँदा जग्गा व्यवस्थापन हुन नसकेको र प्रशासन, नापी र मालपोत कार्यालयको भवन निर्माणका निम्ति सरकारबाट ताकेता आइरहेका कारण पनि अब चाँडै निष्कर्षमा पुग्नुपर्ने अवस्था सृजना भएका सांसद दोर्ण कुमार कुवँरले बताउनु भयो ।
साँसद कुवँरले आर्थिक संकलन अभियानमा आफ्नो तर्फदेखि एक लाख रुपैयाँ संकलन गर्ने प्रतिबद्धता जनाउनु भएको छ ।
