बैशाख २ गते बुर्तिबाङ

बागलुङको गल्कोट नगरपालिका देखि निसीखोलाको भल्कोट सम्म नगरबस सञ्चालन गर्ने निर्णय भएको छ ।

आइतबार बडिगाड गाउँपालिका अध्यक्ष गण्डकी थापाको अध्यक्षतामा चार पालिकाको प्रमुख उप प्रमुख सहित बसेको बैठकले मध्यपहाडी लोकमार्ग अन्तरगत पर्ने बागलुङको गल्कोट नगरपालिकाको सिमाना घोँडाबाँदे देखि निसीखोला गाउँपालिकाको सिमाना सम्म सिधा नगरबस सञ्चालन गर्ने विषयमा छलफल भएको बडिगाड गाउँपालिका अध्यक्ष गण्डकी थापाले बताउनु भयो ।

नागरिकलाई सहज, सरल र सस्तो सेवा प्रवाह गर्ने उद्देश्य सहित चारवटा पालिका मिलेर बस खरिद गर्ने र दैनिक सेवा प्रवाह गर्ने गरी छलफल हुनुका साथै सम्भाव्यता अध्ययन समिति समेत गठन गरिएको छ । गल्कोट नगरपालिका प्रमुख भरत शर्मा गैरे, बडिगाड गाउँपालिका अध्यक्ष गण्डकी थापा, ढोरपाटन नगरपालिका कार्यवाहक मेयर धन बहादुर कायत, निसीखोला गाउँपालिका अध्यक्ष सूर्य बहादुर घर्ति पालिकाका उपाध्यक्ष प्रमुख प्रशासकीय अधिकृत वडा अध्यक्ष लगायतको बैठकले नगरबस चाँडै सञ्चालनमा ल्याउने निर्णय गरेको हो 

बैठकले गल्कोट नगरपालिका अध्यक्ष फमबहादुर खत्री संयोजक रहेको ५ सदस्य सम्भाव्यता अध्ययन समिति समेत गठन गरेको छ । समितिको सदस्यमा ढोरपाटन नगरपालिकाबाट वान बहादुर छन्त्याल, निसीखोला गाउँपालिकाबाट चन्द्रसिंह रामजाली, बडिगाड गाउँपालिकाबाट विष्णु प्रसाद आर्चाय, सदस्य सचिब मा बडिगाड गाउँपालिका प्रमुख प्रशासकीय अधिकृत पूर्ण बहादुर घर्तिलाई चयन गरिएको हो ।

त्यस्तै बैठकले छिमेकी पालिका सँग सम्मोन्य गरेर फोहोर व्यवस्थापन क्षेत्रको समेत चाँडै स्थान खोजी गरि पश्चिम बागलुङका पालिकाहरूको एकै स्थानमा फोहोर व्यवस्थापन स्थल बनाइने विषयमा समेत छलफल भएको छ । केही दिनमै गल्कोट नगरपालिकामा बैठक बसेर यसको विषयमा टुंगो लगाउने अध्यक्ष थापाले बताउनु भयो ।

बैसाख १ गते देविस्थान

निसीखोला गाउँपालिका वडा नं. १ को देविस्थान बजारमा चैते दशै मेला तथा निसीखोला गाउँपालिका तेस्रो अध्यक्ष कप शनिबार देखि सुरु भएको छ ।

परापूर्व कालदेखि चैते दशैँको अवसरमा मेला लाग्दै आएको उक्त स्थानमा यसवर्ष निसीखोला गाउँपालिका तेस्रो अध्यक्ष कप संगै विभिन्न खेलकुद एव्म सांस्कृतिक कार्यक्रम सुरु भएको हो । शनिबार नयाँ वर्षको अवसरमा गाउँपालिका अध्यक्ष सुर्य बहादुर घर्ती लगायतको उपश्थितीमा शुभकामना आधान प्रदान कार्यक्रम संगै विविध खेलकुदका कार्यक्रम सुरु गरिएको हो । आयोजित प्रतियोगिता अन्तरगत ३५ बर्ष माथिको पुरुष भलिबल प्रतियोगिता तर्फ निसीखोला गाउँपालिका वडा नं. २ लाई पराजित गर्दे निसीखोला गाउँपालिका ३ अघिल्लो चरणमा प्रवेश गरेको छ ।

त्यस्तै ढोरपाटन नगरपालिका ५ लाई पराजित गर्दे गल्कोट नगरपालिका ७ अघिल्लो चरणमा प्रवेश गरेको हो । निसीखोला गाउँपालिका भित्रका जनप्रतिनिधि र कर्मचारी बिचको मैत्रिपूर्ण भलिबल खेलमा जनप्रतिनिधिले जित हात पार्दे पच्चिस हजार पुरस्कार रासी प्राप्त गर्न सफल भएका छन ।

वडा स्तरीय पुरुष भलिबल खेलमा निसीखोला २ लाई पराजित गर्दे निसीखोला गाउँपालिका ७ अघिल्लो चरणमा प्रवेश गरेको छ । कार्यक्रमको बैशाख ४ गते गाउँपालिका अध्यक्ष सुर्य बहादुर घर्तिले प्रमुख अतिथिको रुपमा कार्यक्रमको उद्घाटन गर्नुहुने भएको देविस्थान युवा क्लबका अध्यक्ष भरत पुनले बताउनु भयो ।

आयोजित कार्यक्रमका अवसरमा एकलाख पचास हजार प्रथम पुरस्कार राशिकोवडा स्तरिय पुरुष भलिवल, महिला भलिवल, ३५ वर्ष माथि उमेर समुहको भेट्रान्स खेल प्रतियोगिता, तेक्वान्डो प्रतियोगिता, पुरुष महिला छेलो, जनप्रतिनिधि, कर्मचारी बिचको मैत्रिपूर्ण भलिबल खेल, पुरुष महिला रस्सा कस्सा लगायतका प्रतियोगिताको आयोजना गरिएको आयोजकले जनाएको छ ।

कार्यक्रममा स्थानीय कला संस्कृतिको  संरक्षण गर्न मारुनी नृत्य, आमा समुहको नृ्रत्य, दोहोरी गीत लघु उद्यमी प्रर्दशनी लगायतका कार्यक्रम तय गरिएको जनाइएको छ । देविस्थानमा परापूर्व कालदेखिनै चैत्राष्टमी मेला लाग्ने गरेको पाइन्छ । मेलाको आवश्यक तयारी पुरा भइरहको निसीखोला गाउँपालिका खेलकुद विकास समिति संयोजक राजमन बुढाले बताउनु भयो ।

बैसाख १ गते बुर्तिबाङ
पर्यटन मार्फत आर्थिक विकास गर्न सबै पक्षले आफ्नो दायित्व पूरा गर्नुपर्ने तमानमा आयोजित ए कार्यक्रममा सहभागीले बताएका छन् ।

शनिबार तमानखोला गाउँपालिका—२ मुठाचौर बराह तालमा आयोजित तमानखोला गाउँपालिकाको पर्यटन सम्भावना अवसर र चूनौती विषयक पर्यटन प्रवद्र्धन गोष्ठीमा सहभागीले कुनै एक पक्षको प्रयासले मात्रै पर्यटनबाट आम्दानी हाँसिल गर्न नसकिने बताए । तमानखोला गाउँपालिकाको आयोजना र लेखन नेपाल मिडिया प्रा.ली.को सहजीकरणमा आयोजित कार्यक्रममा सहभागीले भने,‘पर्यटनका लागि भौतिक पूर्वाधारसंगै प्रचार प्रसारको पनि जरुरी हुन्छ । त्यससंगै पाहुनालाई दिने नयाँ स्वाद पनि हुनुपर्छ । त्यसले मात्रै पर्यटन विकास हुन्छ ।’

पर्यटनको विकास मार्फत लाभ लिनका लागि सरकारी, निजी क्षेत्र र आम नागरिकले पनि विशेष लगानी गर्नुपर्ने उनीहरुको भनाई थियो । ‘पर्यटकीय ठाउँहरुमा पूर्वाधार निर्माण गर्ने र प्रचार प्रसार गर्ने काममा सरकारी पक्षले ध्यान दिनुपर्छ,’कार्यक्रममा सहभागीले भने,‘यहाँ आएका पर्यटकलाई आवश्यक अन्य सेवाहरुका लागि निजी क्षेत्र र यहाँको स्थानीय नागरिकले लगानी गर्नुपर्छ । गाउँमा आउने पर्यटकलाई गाउँकै पहिचान दिने खानेकुरा खुवाउन सकियो भने मात्रै उनीहरुलाई पुनः फर्केर आउने वाताबरण बनाउन सकिन्छ ।’ कार्यक्रममा बोल्दै तमानखोला गाउँपालिका अध्यक्ष जोकलाल बुढामगरले गाउँपालिकाले संघ र प्रदेश सरकारसंग मिलेर पालिका भित्रका पर्यटकीय क्षेत्रहरुको पहिचान गर्दै आवश्यक पूर्वाधार र भौतिक संरचना निर्माणलाई तिब्रता दिएको बताए ।

‘हामीले पूर्वाधार निर्माणको क्षेत्रमा काम अगाडि बढाएका छौं,’उनले भने,‘यहाँको बराह ताल, शोलेडाँडा लगायतका ठाउँहरुमा आवश्यक पूर्वाधारहरुको काम अगाडि बढेको छ ।’ बराह तालमा पुग्नका लागि पदमार्ग, त्यहाँ पुग्ने पर्यटकका लागि आवश्यक खानेपानी, शौचालय, पिकनिक स्पोट लगायतका संरचना बनेका छन् । ताल संरक्षणका लागि आवश्यक घेराबार पनि लगाईएको छ । तालको परिवरी पनि स्लेट ढुङ्गा बिच्छ्याएर पदयात्रीका लागि संरचना तयार गरिएको पनि बुढाले जानकारी गराए । शोलेडाँडामा पाहुनाघर, कोशेलीघर, सहीदपार्क सौचालय निर्माणका काम सम्पन्न भएको छ । अन्य ठाउँहरुको पहिचान गरी प्रचार प्रसार गर्दै आवश्यक पूर्वाधार निर्माण गर्ने काममा पालिका लागेको बुढाको भनाई छ ।
उनले प्राकृतिक रुपमा अनुपम आनन्द दिने लालीगुराँस फुल्ने क्षेत्र घुम्न आउन आग्रह गरे । आन्तरिक र बाह्य पर्यटकका लागि पनि तमानखोला भर्जिन गन्तव्य रहेको उनको भनाई छ । गाउँपालिका उपाध्यक्ष हिराकुमारी छन्त्यालले पर्यटकीय क्षेत्रहरुमा संरचना निर्माण गर्दा पर्यटकमैत्री संरचना निर्माणमा ध्यान दिने बताईन् ।

‘स्थानीय सामग्रीहरुको उपयोग गरेर पर्यटकलाई यहाँ आएर हेर्दा आनन्द लाग्ने खालको संरचना बनाउने कुरामा हाम्रो ध्यान रहनेछ,’उनले भनिन्,‘सबैको साझा प्रयासबाट मात्रै पर्यटनबाट आर्थिक विकास गर्न सम्भव छ ।’ कार्यक्रममा तमानखोला गाउँपालिका—३ का अध्यक्ष झकबहादुर बुढाले पर्यटनबाट आम्दानी गर्न स्थानीयले विशेष ध्यान दिनुपर्नेमा जोड दिए ।
‘पर्यटनलाई हाम्रो आम्दानीसंग जोड्नका लागि यहाँको मौलिक उत्पादनमा ध्यान दिनुपर्छ, यहाँ आउने पाहुनलाई यहाँकै वस्तु खुवाउने र उपहार दिने वाताबरण बनाउनुपर्छ,’उनले भने । कार्यक्रममा जनजागृतिमा माविका प्रध्यानाध्यापक बेदबहादुर छन्त्यालले प्राकृतिक सौन्दर्य नमासिने गरी अन्य संरचना निर्माण गर्नुपर्ने बताए । ‘हामीले पर्यटकीय क्षेत्र भनेर संरचना निर्माण गर्दा प्राकृतिक रुपमै गर्नुपर्छ, कृत्रिम लाग्नेगरी काम नगरौं,’उनले भने,‘विगतमा राज्यको निकायको आँखा नपर्दा यो ठाउँ पछि परेको हो । हामीले यसको प्रचार प्रसार र प्रवद्र्धनमा ध्यान दिनु जरुरी छ ।’ कार्यक्रममा स्थानीय ओम पुन लगायतले स्थानीयले बराह तालको संरक्षण प्रवद्र्धनमा ध्यान दिन आग्रह गरे ।

कार्यक्रममा तमाखोला गाउँपालिकाको पर्यटन सम्भावना अवसर र चूनौती विषय अवधारणा प्रस्तुत गर्दै पत्रकार संगम घर्तीमगरले प्राकृतिक सौन्दर्यसंग लुकामारी गर्दै वन्यजन्तुको चाल नियाल्ने र चराचुरङ्गीको चिरबिराहटमा रमाउन चाहाने पर्यटकहरुका लागि तमानखोला गतिलो गन्तव्य बन्नसक्ने बताए । उनले गाउँमा आउने पर्यटकलाई परम्परागत व्यवहार, त्यहाँको मौलिक संस्कृति, खेतीपाती वा दैनिक व्यवहारको अवलोकन, गाउँको सेरोफेरोको भ्रमण अनि गाउँमै उत्पादन गरिएका सामग्रीहरू खाँदै गाउँकै घरमा बस्ने अनि गाउँमै उत्पादन भएका कोशेलीहरू बोकेर जाने वाताबरण सिर्जन ागर्नुपर्ने बताए । नेपालको एक मौत्र शिकार आरक्ष ढोरपाटन शिकार आरक्षसंग नजिकै रहेका कारण ढोरपाटनमा आउने पर्यटकलाई तमानखोला भित्र्याउनका लागि आवश्यक पदमार्गहरुको विकास गर्नु आवश्यक रहेको उनले उल्लेख गरे ।

तमानखोला गाउँपालिकासंग पर्यटकीय गन्तव्य बनाउका लागि मुठाचौर बराह ताल, शोलेडाँडा, नौडल्ले पहाड, ढोमई थान लगायतका धार्मिक तथा प्राकृतिक सौन्दर्यका ठाउँहरु रहेकाले त्यसको शिलशिलावद्ध विकासमा ध्यान दिन समेत आग्रह गरे । बोंगादोभान, मुठाचौर बराहताल, अंकुटे देउराली, धान्चे देउराली, नौडल्ले पहाड, बयलीको धुरी, पुठाले खोलेको ताल, शोलेडाँडा, अमिलचौर जोड्दै दुरलेकको धुरी, ताराखोला, घुम्टेधुरी, घोडाबाँधे, गाजादहसम्मको पदमार्ग, खानेपानी, पर्यटकीय क्षेत्रको सूचना तथा जानकारी बोर्ड, पर्यटकको बसाइँका लागि विभिन्न ठाउँमा घरबास (होमस्टे) व्यवस्थापन, नौडल्लेको पहाड पुगेर फर्कदा वन्यजन्तुसंग साक्षात्कार गर्ने गरी नर्जा भित्रीवनमा चिडियाघर निर्माण गर्न सकिने उनको भनाई थियो ।
‘तमानको अप्ठ्यारो र चट्टानी भूगोललाई उपयोग गर्दै शाहसकि पर्यटन रक क्लाईम्बिङको सम्भावना पहिल्याउन सकिन्छ । चट्टानी पहरामा हुने भिर मौरीको शिकार (हनि हन्टिङ) गरेर पनि पर्यटकलाई लोभ्याउन सकिन्छ,’उनले भने,‘तमानखोलामा उत्पादन हुने आलु, सिमी, जौ लाई व्यसायिक बनाई कृषि पर्यटनसंग पनि जोड्न सकिन्छ । यहाँ आउने पर्यटकलाई आलुका विभिन्न परिकार, जौ÷मकैको आटो, सिमीको दाल र मोही (गोरस) खुवाउन सकियो भने तमानखोलाको पर्यटन प्रवद्र्धनमा ब्राण्ड बन्नसक्छ ।’ तमानखोलाको मौलिक संस्कृति सोरठी र यानीमायाको संरक्षण र प्रवद्र्धनबाट पनि पर्यटकलाई आकर्षित सकिने उनको भनाई छ ।
कार्यक्रममा टिप्पणी गर्दै नेपाल नेपाल महासंघ बागलुङका सचिव विजय रानाले तमान आउने पर्यटकलाई सुरक्षित महसुस गर्ने वाताबरण सिर्जना गर्नुपर्ने बताए । ‘यहाँ आउने पर्यटक एक पटक आएपछि अर्को पटक पुनः आउने बनाउनका लागि यो ठाउँ सुरक्षित छ भन्ने आभास दिलाउनुपर्छ, त्यसका लागि यहाँको नागरिकले भूमिका खेल्नुपर्छ,’ उनले भने,‘यहाँ घुम्ने पर्यटकहरु आउँदै गर्दा यहाँको नागरिकको आर्थिक आम्दानी पनि बढ्नुपर्छ ।

त्यसका लागि यहाँको स्थानीय उत्पादनमा जोड दिनुपर्छ ।’ तमानखोला गाउँपालिका—२ का वडाध्यक्ष नारायण सुनारको अध्यक्षतामा भएको कार्यक्रममा स्वागत तमानखोला गाउँपालिकाका प्रमुख प्रशासकीय अधिकृत ईश्वरलाल शाक्य र सञ्चालन पत्रकार डम्मर बुढा मगरले गरेका थिए ।

चैत्र ३० गते बुर्तिबाङ

बागलुङ जिल्लाको तमानखोला गाउँपालिका वडा नंं. ३ तमानमा एक लाख प्रथम पुरस्कार राशि सहितको फुटबल प्रतियोगिता हुने भएको छ ।

चैत्राष्टमीको अवसर पारेर तमानखोला गाउँपालिका फुटबल कप तथा विविध खेलकुद एवम् सांस्कृतिक कार्यक्रम हुने भएको हो । तमानखोला गाउँपालिकाको आयोजनामा तमान युवा क्लब तमानको व्यवस्थापनमा तमानखोला गाउँपालिका फुटबल कप २०८० आयोजना गरिएको तमानखोला गाउँपालिका युवा खेलकुद विकास समितिका संयोजक हिक्मत जक्तपुरीले बताउनु भयो ।

फुटबल प्रतियोगितामा प्रथम हुने समुहले एक लाख, द्विर्तीय हुनेले साठी हजार र सेमिफाइनलमा प्रवेश गर्ने समुहका निम्ति शान्तवना पुरस्कार स्वरुप दशहजार पुरस्कार रहेको जनाइको छ 

आगामी बैशाख ३ देखि ८ गते सम्म हुने प्रतियोगिताको गण्डकी प्रदेश सभा सदस्य माननीय दोर्ण कुमार कुवँरले बैसाख ६ गते प्रमुख अतिथिको रुपमा उद्घाटन गर्ने कार्यक्रम तय गरिएको छ । कार्यक्रमका अवसरमा तमानखोला गाउँपालिकामा उत्पादन भएका विभिन्न उत्पादित सामाग्रीको स्टल मार्फत प्रदर्शनीमा राखिने जनाइएको छ ।

स्थानीय उत्पादनलाई बजारीकरणमा सहयोग गर्दे आइरहेको पालिकाले कृर्षि, लघु उद्यम मार्फत उत्पादन गरिएको विभिन्न प्रकारका कपडा, भेडाको उनबाट बनाइएका सामाग्री, चोयाबाट बनाइएका सामाग्री, घरेलु औजारका सामाग्री लगायतका बस्तु स्टलमा राखिने तमानखोला गाउँपालिका ३ का अध्यक्ष झक बहादुर बुढाले बताउनु भयो ।

वडा स्तरीय पुरुष भलिबल, खुल्ला महिला भलिबल, सादा ताराखेल, आर्चरी ताराखेल, ३५ वर्ष उमेर माथिको भेट्रान्स खेल, जनप्रतिनिधि, शिक्षक कर्मचारी बिचको बुटवल, पुरुष महिला ठेलो, पुरुष महिला रस्सा कस्सा प्रतियोगिता लगायत विविध सांस्कृतिक कार्यक्रम सञ्चालन हुने तमान युवा क्लबका मेला संयोजक गिर बहादुर घर्तीले बताउनु भयो ।

चैत्र २६

बागलुङको ढोरपाटन नगरपालिका वडा नं.१ की जित कुमारी माझीले आफूलाई नापी कार्यालय बुर्तिबाङले जग्गा नापजाँचमा अन्याय गरेको बताएकी छन । ढोरपाटन नगरपालिका १ खप्तरि बाङ स्थित बन्दै गरेको बसपार्क नजिकैको जग्गामा नापजाँच गर्ने क्रममा नापी प्राविधिकले नै पटक पटक ठाउँ सार्दै गर्दा आफूलाई अन्याय गरेको बताएकी हुन ।

बुर्तिबाङ नयाँ शहर आयोजनाले बसपार्क निर्माण गर्दे गरेको आडैमा सटिएको जग्गा जित कुमारी माझीको छ । बसपार्क निर्माण सुरु गर्दे गर्दा पनि जग्गा नापजाँच गरेर नयाँ शहर आयोजनाले टर्मिनल भवन निर्माण सुरु गरेको थियो । मेरो जग्गाको सिमानामै बसपार्कको भवन बनिरहेको छ । पहिले नापजाँच गर्दा जग्गा साँधियार को मन्जुरीमा नयाँ शहरले आफ्नो जग्गा कब्जा गरेर संरचना निर्माण सुरु गरेपनि पछिल्लो समय फेरी आफूले उपभोग गरेकै जग्गा नयाँ शहरको रहेको भन्दै हकदाबी गर्न थालेको माझीको आरोप छ ।

गत फागुन महिनामा बुर्तिबाङ नापी कार्यालयका निमित्त प्रमुख राम प्रसाद सापकोटाले जग्गा नापजाँच गर्दा बडिगाड खोलाको भाग कटाएर नापजाँच गर्दा माझीको जग्गा मिचिएको र बसपार्क निर्माणका निम्ति नयाँ शहरले खरिद गरेको जग्गा माझीको तर्फ सरेको बताइएको माझीले पटक पटक प्राविधिक लगेर आफ्नो जग्गा छुट्याइदिन आग्रह गर्दा समेत वास्तविक जग्गा छुट्याउन नसकी फरक फरक नापजाँच गराइदिने गरेको माझीले बताइन ।

बसपार्क निर्माण अगावै नापी कार्यालय बुर्तिबाङका अमिन सुनिल कुमार र निमित्त प्रमुख कृष्ण बहादुर कुमालले नापेकै नक्सा र साँध अंशियारले मन्जुरी गरेको क्षेत्र आफूले भोगचलन गर्दे आइरहेकोमा गत फागुन ११ गते आफूलाई कुनै जानकारी नदिई पहिले कायम गरिएको रेखांकन हटाएर पुनह मनपरी रेखांकन गरिएको उनको भनाई छ । यता नापी कार्यालय बुर्तिबाङका निमित्त प्रमुख राम प्रसाद सापकोटाले आफूहरूले नापजाँच गरेको यथार्थ र अधिकारी रहेको बताउँदै पीडितले चित्त नबुझेमा अदालत जान सक्ने बताए ।

पहिले र अहिलेको नापजाँचमा फरक किन भन्ने प्रश्नमा उनले भने पहिले अंशियारले भनेको भोगचलन गरेको आधारमा नापजाँच भएको हुन सक्के बताउँदै अहिले बडिगाड खोलाको भाग छुट्याएर हेर्दा वास्तविक रेखांकन गरिएको दाबी गरेका छन । बसपार्कले समेत खोलाको भागमा संरचना निर्माण गरेको रहेछ विगतमै खोलाको रेखांकन नहेरिएका कारण यस्तो कमजोरी देखिएको उनको तर्क छ ।

ढोरपाटन चैत्र २८

बागलुङको ढोरपाटन नगरपालिकाले बजार अनुगमन तथा बजार व्यवस्थापनमा सक्रियता देखाएको छ ।

पटक पटक बजार अनुगमन गर्दे अखाद्य वस्तुको जफत सँगै व्यवसायलाई सचेत गराउँदै आएको नगरपालिकाले पछिल्लो समय उद्योग वाणिज्य संघ ढोरपाटन, इलाका प्रशासन, प्रहरी लगायतको सक्रियतामा अव्यवस्थित बन्दै गइरहेको बजारलाई व्यवस्थित बनाउन सडक पेटी भन्दा बाहिर ठाउँ ओगटेर राखिएका सामान व्यवस्थापन गर्न, घरदेखि बाहिर सम्म टहरा बनाएर जथाभावी सामान राख्ने बनाइएका स्थान हटाउन अनुरोध गर्दे बजार अनुगमन सँगै व्यवसायीलाई सचेतना गरिएको छ ।

बजार अव्यवस्थित बनीरहेको छ यसलाई व्यवस्थापन गर्नु सबैको दायित्व रहेको बताउँदै यो अभियानमा सबैले साथ दिनुपर्ने ढोरपाटन नगरपालिका कार्यवाहक मेयर धन बहादुर कायतले बताउनु भयो । टोलीले फाँट बजार र स्वामिबोट देखि बसपार्क सम्मको बजार अनुगमन गरेको हो ।

कतिपय व्यवसायीले आफूहरूले पालिकाले लिएको कदमलाई हार्दिकता का साथ लिएपनि अटेरी व्यवसायीका कारण समस्या भइरहेको बताउँदै नगरपालिकाले कारवाही प्रकृया अगाडि बढाउनु पर्ने सुझाब दिएका छन ।

अनुगमनका क्रममा ढोरपाटन नगरपालिका प्रमुख प्रशासकीय अधिृकत विष्णु प्रसाद ज्ञवाली, वडा नं. १ का अध्यक्ष वान बहादुर छन्त्याल सदस्य गोपाल महत, इलाका प्रशासन बुर्तिबाङका प्रमुख लोक बहादुर कुवँर, उद्योग वाणिज्य संघका अध्यक्ष ढालेन्द्र छन्त्याल, इलाका प्रहरी बुर्तिबाङको तर्फदेखि मङ्गल गुरुङ सहितको टोली, पत्रकार, नगर प्रहरी लगायतको उपस्थिति रहेको थियो । 

त्यस्तै ढोरपाटन नगरपालिकाले बुर्तिबाङ बसपार्कमा शौचालय बनाउने गरी पाँच लाख बजेट विनियोजन गरेको छ । बुधबार शौचालय निर्माण गर्नका निम्ति कार्यवाहक मेयर धन बहादुर कायत, वडा नं. १ का अध्यक्ष वान बहादुर छन्त्याल, उद्योग वाणिज्य संघका अध्यक्ष ढालेन्द्र छन्त्याल लगायतको उपश्थिती मा बसपार्क छेउमा सार्वजनिक शौचालय बनाउने गरि अगाडि बढ्ने विषयमा छलफल गर्दे चाँडै काम सुरु गर्ने बताइएको छ ।

रासस

पाँच वर्षअघि निर्माण सुरु भएको बुर्तिबाङ सबस्टेशनको काम अन्तिम चरणमा पुगेको छ।

पश्चिम बागलुङलाई केन्द्रीय प्रसारण लाइनसँग जोड्न कपिलवस्तुको मोतिपुर– अर्घाखाँचीको सन्धिखर्क– गुल्मीको तम्घास–पौँदीअमराई हुँदै बुर्तिबाङ जोड्ने १३२ केभीको सबस्टेशनको काम अन्तिम चरणमा पुगेको हो ।

ढोरपाटन नगरपालिका–२ खल्टुबोटमा निर्माणाधीन सबस्टेशनको काम ८० प्रतिशत सम्पन्न भएको ‘१३२ किलोभोल्ट बुर्तिबाङ सबस्टेशन आयोजना’ प्रमुख मनोज चौधरीले बताए।

निर्माण पू्रा हुनासाथ गुल्मीको तम्घासको सवस्टेशन आगामी वैशाख १९ गते तथा सोही जिल्लाको पौँदीअमराई र बागलुङको बुर्तिबाङ सबस्टेशन अगामी असारमा परीक्षण गर्नेगरी द्रुत गतिमा काम भइरहेको उनले बताए।सबस्टेशन बनाउने र लाइन तान्ने काम निर्माण कम्पनीहरुले धमाधम काम गरीरहेका छन्, असारसम्म कुनै प्राविधिक अवरोध नभए परीक्षण गर्ने योजना छ, निर्माण कम्पनीलाई पनि असारभित्रमा काम सम्पन्न गर्ने ठेक्का दिइएको हो । अब फिल्डको काम मात्रै बाँकी छ, पौँदीअमराई र बुर्तिबाङमा एकैपटक परीक्षण हुन्छ,’ चौधरीले भने।

सदरमुकाम बागलुङ बजार र आसपासका क्षेत्र केन्द्रीय प्रसारण लाइनले जोडिए पनि पश्चिम बागलुङमा केन्द्रीय प्रसारण लाइन पुगेको थिएन। नेपाल विद्युत् प्राधिकरण बागलुङ वितरण केन्द्रले जिल्लाको पश्चिम क्षेत्रलाई प्राथमिकता दिएर लाइन विस्तार गर्दै आएको छ।

अहिलेसम्म निसीखोला र तमानखोला भेग केन्द्रीय लाइनबाट जोडिएका छैनन तर प्राधिकरणले निसीखोला, तमानखोला र ढोरपाटन नगरपालिका धेरै स्थानमा पोल गाड्ने र तार तान्ने काम गरिरहेको छ।