बैशाख २७ गते बुर्तिबाङ
नेकपा एमाले ढोरपाटन नगर कमिटीको दोस्रो नगर अधिवेशन आइतबार सुरु भएको छ ।
सबै स्थानीय तह र जिल्ला तहमा अधिवेशन सम्पन्न गर्ने अभियानमा जुटेको नेकपा एमालेले आइतबार ढोरपाटन नगर समितिको टुंगो लगाउने गरि तयारीमा जुटेको हो ।
अधिवेशनमा नगर कमिटी अध्यक्षका निम्ति दुई जनाको उम्मेद्वारी परेपछि सहमति हुन नसकी निर्वाचन प्रकृयामा जाने अवस्थामा रहेको जनाईएको छ ।
साँझ सम्म बन्द सत्र मार्फत सहमतिको प्रयास गरिएपनि गणेश कुमार थापा र चुना घर्तिको उम्मेद्वारी परेको र दुवैले आफ्नो दाबी नछोडेपछि निर्वाचन हुन सक्ने सम्भावना बढेको एक श्रोतले जनाएको छ । त्यस्तै सचिव पदमा समेत २ जनाको उम्मेद्वारी परेको हो ।
सचिव पदमा समेत सहमति हुन नसकिरहेको जनाइएको छ । सहमतिका प्रयास जारी रहने र सहमति नभए निर्वाचनको सम्भावना बद्दै गएको नेकपा एमाले जिल्ला कमिटी सदस्य ज्ञान प्रसाद कँडेलले बताए ।
आइतबार भएको उद्घाटन सत्रको कार्यक्रम ढोरपाटन नगर कमिटी संयोजक गणेश कुमार थापाको अध्यक्षतामा नेकपा एमाले केन्द्रिय सदस्य गण्डकी प्रदेश इन्चार्ज तथा पूर्व प्रतिनिधि सभा सदस्य गोकर्ण विष्टको प्रमुख आतिथ्यता रहेको थियो ।
आयोजित कार्यक्रममा प्रमुख अतिथि विष्टले बोल्दै नेकपा एमाले जनताको पार्टी भएको बताउँदै देशको समृद्धि र विकासमा नेकपा एमाले जनताको मन जित्ने गरी अग्र स्थानमा रहेको बताउनु भयो ।
पार्टीले सबै स्थानीय तह र जिल्ला तहमा अधिवेशन गरिरहेको बताउँदै पार्टीलाई हाँक्न सक्ने नेतृत्व टिम अगाडि बढेर जिम्मेवारी पूर्वक भूमिका निर्वाह गर्न आग्रह गर्नुभयो ।
कार्यक्रममा नेकपा एमाले केन्द्रिय सदस्य इन्द्रलाल सापकोटा, केन्द्रिय सदस्य सावित्रा राना, केन्द्रिय सल्लाहकार सदस्य मोहनलाल शर्मा, जिल्ला कमिटी अध्यक्ष हिरा बहादुर केसी , कृष्ण पाठक, टँक प्रसाद पौडेल, वीर बहादुर बिक, लगायतको आतिथ्यता एवम शुभकामना मन्तव्य रहेको थियो ।
कार्यक्रम हेम प्रसाद विकको स्वागत , सचिव इन्द्र बहादुर थापाको सञ्चालनमा सम्पन्न भएको थियो ।
