बुर्तिबाङ
बागलुङको तमानखोला गाउँपालिकाले आगामी आर्थिक वर्षका लागि ३३ करोड ६७ लाख रुपैयाँभन्दा बढीको बजेट सार्वजनिक गरेको छ । गाउँपालिकाको नवौँ गाउँसभाबाट सुखी, समान र समुन्नत तमान निर्माण गर्ने लक्ष्यसहित बजेट प्रस्तुत गरिएको हो ।
मंगलबार नीति तथा कार्यक्रम प्रस्तुत गरेको गाउँपालिकाले बुधबार उपाध्यक्ष हिरा कुमारी छन्त्यालमार्फत आगामी आर्थिक वर्षको बजेट सार्वजनिक गरेको हो । गाउँपालिकाले कुल ३३ करोड ६७ लाख ८७ हजार ५ सय ६ रुपैयाँ बराबरको बजेट ल्याएको छ ।
प्रस्तुत बजेटमध्ये चालुतर्फ २५ करोड ५९ लाख ५० हजार ९ सय २३ रुपैयाँ र पूँजीगततर्फ ८ करोड ८ लाख ३६ हजार ५ सय रुपैयाँ विनियोजन गरिएको छ ।
गाउँपालिकाले पूर्वाधार विकासतर्फ सडक निर्माण तथा स्तरोन्नतिलाई प्राथमिकतामा राखेको छ । स्थानीय आवश्यकताका आधारमा यातायात पहुँच विस्तार गर्ने तथा दीर्घकालीन महत्वका भौतिक संरचना निर्माणमा बजेट केन्द्रित गरिएको जनाएको छ ।
त्यस्तै कृषि उत्पादन वृद्धि, पर्यटन प्रवर्द्धन, श्रम तथा रोजगार सिर्जना, शिक्षा सुधार, युवा तथा खेलकुद विकास र स्वास्थ्य सेवाको विस्तारलाई समेत बजेटमा प्राथमिकता दिइएको छ ।
गाउँपालिकाले स्थानीय स्रोत, सम्भावना र आवश्यकतालाई आधार बनाएर विकास निर्माणका कार्यक्रम सञ्चालन गर्ने जनाएको छ ।
बजेट प्रस्तुत कार्यक्रममा गाउँसभा अध्यक्ष जोकलाल बुढा, प्रमुख प्रशासकीय अधिकृत अमित परियार, गाउँसभा सदस्य, कर्मचारी लगायतको उपस्थिति रहेको थियो ।
