बुर्तिबाङ बैशाख १४ गते
बागलुङको तमानखोला गाउँपालिका वडा नं. २ सिलगुम स्थित वनक्षेत्रमा फैलिएको आगो नियन्त्रण गर्ने क्रममा एक जनाको घटना स्थलमै ज्यान जानुका साथै अन्य दुई जना घाइते भएका छन ।
शुक्रबार बिहान देखि फैलिएको आगो वन क्षेत्रबाट बस्तीतर्फ फैलिँदै गर्दा आगो नियन्त्रणमा लिन गएका तमानखोला गाउँपालिका २ सिलगुमका ४८ बर्षिय देवसिंह कामीको आगो नियन्त्रण गर्ने क्रममा घर नजिकैको वनमा आगोबाट जलेर ज्यान गएको हो । त्यस्तै आगलागी नियन्त्रण गर्ने क्रममा सिलगुमकै ३१ बर्षिय ज्ञान बहादुर बूढा र सोही ठाउँकै ३३ बर्षिया प्रेम बहादुर घर्ती मगर घाईते हुनुभएको छ ।
घाईते दुबै जनाको बुर्तिबाङ स्वास्थ्य केन्द्रमा उपचार भइरहेको छ । घाइतेको अनुहार, खुट्टा, र शरीरको विभिन्न भागमा आगोले पोलेको पाइएको छ ।
सोही आगलागीबाट तमानखोला गाउँपालिका २ र ढोरपाटन नगरपालिका ३ का विभिन्न बस्तीमा आगलागी फैलिएको छ ।आगोले सिलगुमका राम बहादुर कार्कीको ढुँगा माटोले बनेको दुई तले घर र गोठ पूर्ण रुपमा जलेर नष्ट भएको छ । घरगोठ जल्दा अन्नपात, लत्ता कपडा सँगै घरमा राखिएका सम्पूर्ण सामान जलेर नष्ट हुनुका साथै दुई वटा बाख्रा जलेर नष्ट भएका छन । त्यस्तै सोही ठाउँका सूर्य बहादुर सिर्पालीको ढुँगा माटोले बनेको दुई तले घर र गोठ जलेर नष्ट भएको छ ।
घर जल्दा खाध्यान्ह, लत्ता कपडा लगाएतका सम्पूर्ण सामान जलेर नष्ट भएको जनाइएको छ । त्यसैगरी सोही आगलागीबाट ढोरपाटन नगरपालिका ३ गुजा गाउँमा खगेन्द्र बिकको घर गोठ पूर्ण रुपमा जलेर नष्ट भएको छ । त्यस्तै सोही ठाउँका ढाल बहादुर पुनको दुई तले ढुँगा माटोले बनेको घर जलेको छ ।
सोही ठाउँकै बल बहादुर घर्तिको १ तले कच्ची घर जलेर नष्ट भएको हो । घर गोठ जल्दा पीडित सबैको खाध्यान्ह, लत्ता कपडा, भाँडा कुँडा लगायत घरमा राखिएका सम्पूर्ण सामान जलेर नष्ट भएको इलाका प्रहरी कार्यालय बुर्तिबाङले जनाएको छ । प्रहरी निरीक्षक राजकुमार बिक सहितको प्रहरी टोली घटना स्थलमा पुगेर उद्धारको काम गरेको हो ।
स्थानीय, जनप्रतिनिधि, प्रहरीको सक्रियतामा आगो नियन्त्रणमा ल्याउने प्रयास गरिएको हो ।
