बैशाख २२ गते बुर्तिबाङ
बागलुङको तमानखोला गाउँपालिकामा दोश्रो चौमासिक सम्मको सार्वजनिक सुनुवाइ कार्यक्रम शनिबार वडा नं. ५ को खुँखानीमा सम्पन्न भएको छ ।
पालिकाले आर्थिक बर्ष २०८०÷०८१को दोश्रो चौमासिकमा पालिका वडा कार्यालय तथा विषयगत शाखा बाट भए गरेका काम, सेवा प्रवाह, विकास निर्माणका विषयमा सेवा ग्राही नागरिकको बिचमा पालिका स्तरीय सार्वजनिक सुनुवाई कार्यक्रम गरिएको हो ।
आयोजित कार्यक्रममा बोल्ने सहभागिले तमानखोला गाउँपालिकाको समृद्धि र विकासलाई थप उचाइमा पुर्याउनका निम्ती जनताको जनजिविकालाई र वास्तविक समस्यालाई सम्बोधन गरेर अगाडि बढ्नुपर्नेमा जोड दिएका हुन । सहभागिले गाउँपालिकामा सामुदायिक विद्यालयमा भौतिक प्रगति भएपनि शैक्षिक गुणस्तरमा वृद्धि हुन नसकेको, वडा नं. ६ मा विद्युतको समस्या हुँदा नागरिक समस्यामा परेको , पालिकाको तर्फदेखि विद्यालयको अनुगमन नभएको र साँघुरा सडक विस्तार गर्नुपर्ने विषयमा आफ्नो धारणा राखेका हुन ।
सहभागिले जंगली जनावरले बारीमा लगाएको अन्नबाली सखाप पार्ने गरेका कारण त्यसको रोकथामको विकल्प दिन आग्रह गरेका हुन । पालिकामा भइहेको सवारी भाडादर निर्धारण हुनुपर्ने, स्थानीय पाठ्यक्रम समयमा विद्यालयमा उपलब्ध गराउनु पर्ने, पर्यटन क्षेत्रको प्रर्वद्धन हुँदै जाँदा आम्दानीको श्रोतको खोजी गर्न र दिगो योजना निर्धारण गर्नुपर्ने लगायतका विषयमा सुझाब, धारणा राखेका हुन ।
वन डढेलो नियन्त्रणमा खेल्नुपर्ने भूमिका, मोटरे वल पुल निर्माण, थास्पुरी सन्तर सडक निर्माणको काम रोकिएको लगायतका विषयमा जिज्ञासा राखिएको थियो । १४ जना नागरिकले आफ्नो जिज्ञासा सुझाव र प्रतिकृया राखेका हुन । कार्यक्रममा गाउँपालिका अध्यक्ष जोकलाल बुढाले सहभागिताबाट उठेका प्रश्न र विज्ञासाको जवाफ दिँदै गाउँपालिकाको तर्फबाट श्रोतसाधन र क्षमताले भ्याय सम्म दिगो विकास र नागरिकले पत्यक्ष लाभान्वित हुने गरी काम गरिएको बताउनु भयो ।
भौगोलिक रुपमा दुर्गम र विकासको दृष्टिकोणले पछि रहेको तमानखोलामा जनताको माग र आवश्यकतालाई टेकेर काम गरिएको बताउँदै सहभागिले राखेका प्रश्न र जिज्ञासा अनुसार शिक्षा क्षेत्रको गुणस्तर उकास्न सबै तह तप्का आ आफनो ठाउँबाट जिम्मेवार पुर्वक लाग्नुपर्ने बताउनु भयो ।
पालिकाको विकासका निम्ती साँघुरा सडक र घुम्तीलाई व्यवस्थित बनाउन काम गरिने , शिक्षा स्वास्थ्य र कृषि क्षेत्रको विकासमा महत्वपूर्ण स्थान दिएर काम भइरहेको र अझैपनी नागरिकका माग र आवस्यकतालाई आत्मसाथ गर्दे सेवा प्रवाह, विकास निर्माण र लक्ष्य निर्धारण गरिने बताउनु भयो ।
पालिका मात्र नभई सबै नागरिक आ आफ्नो क्षेत्रबाट जिम्मेवार बन्न सकेमामात्रै लिइएका लक्ष्य र उद्देश्य पुरा हुने बताउनु भयो । त्यस्तै गाउँपालिका उपाध्यक्ष हिरा कुमारी छन्त्यालले बोल्दै अबका दिनमा सामुदायिक विद्यालयको गुणस्तर उकास्न सरोकारवाला निकायसँग छलफल बहस गर्ने र विद्यालयको अवस्थाको विषयमा अनुगमन गरिने पनि बताउनु भयो ।
महिलालाई नेतृत्व तहमा ल्याउनका निम्ति अगाडि बढिएको, पोषण मैत्री पालिका निर्माणमा समेत पालीकाले महत्वपूर्ण उद्देश्य सहित काम गर्दे आएको बताउनुभयो ।
कार्यक्रममा सहभागिताबाट उठेका प्रश्न र जिज्ञासाको विषयमा गाउँपालिका प्रमुख प्रशासकीय अधिकृत ईश्वर लाल शाक्य , वडा नं. ५ का अध्यक्ष हिरा बहादुर सिर्पाली, वडा नं. ६ अध्यक्ष चित्र बहादुर छन्त्याल, स्वास्थ्य शाखा प्रमुख तिल बहादुर छन्त्याल, प्राविधिक अर्जुन कुमार यादव, कृषि शाखा प्रमुख सन्देश पराजुली, शिक्षा शाखा प्रमुख दुर्गादत्त घिमिरे, पशु शाखा प्रमुख यम कुमारी घती, रोजगार शाखा प्रमुख चेतलाल चालिसे लगायतले सहभागिबाट उठेका प्रश्न जिज्ञासा को विषयका प्रकाश पार्नुभएको हो ।
प्रमुख प्रशासकीय अधिकृत ईश्वरलाल शाक्यले तयार पार्नुभएको प्रतिवेदन अनुसार हालसम्म पालिकाको ९० योजना मध्ये ८२ योजना सम्झौता भई ५० योजनाको काम सम्पन्न गरी भुक्तानी भइसकेको बताउनु भयो । ३२ योजना निर्माणको अन्तिम चरणमा रहेका कारण भुक्तानीको तयारीमा रहेको बताउँदै विभिन्न ८ योजना सम्झौता हुन बाँकी रहेको बताउनु भयो ।
नागरिक प्रतिबेदन, बर्हिगमन प्रतिवेदन प्रस्तुत र नागरिकले दिएका सुझाब सल्लाह र अघिल्लो चौमासिकमा गरिएका प्रतिबद्धताका विषयमा समेत छलफल र प्रतिवेदन प्रस्तुत गरिएको हो ।
कार्यक्रम गाउँपालिका अध्यक्ष जोकलाल बुढाको अध्यक्षता, उपाध्यक्ष हिरा कुमारी छन्त्यालको स्वागत, प्रमुख प्रशासकीय अधिकृत ईश्वरलाल शाक्यको प्रगति प्रतिवेदन प्रस्तुत र सामुदायिक रेडियो ढोरपाटनका स्टेसन प्रमुख छविलाल पाण्डेको सहजिकरणमा कार्यक्रम सम्पन्न भएको हो
