असार २४ गते बुर्तिबाङ

सुत्केरी पछि जटिल स्वास्थ्य समस्या देखिएपछि ढोरपाटन नगरपालिका ५ की मिना बिकलाई थप उपचारका लागी हेलिकोप्टर मार्फत काठमान्डौ रिफर गरिएको छ ।

आइतबार साँझ सुत्केरी बेथा लागेपछि बुर्तिबाङ स्वास्थ्य केन्द्र आएकी २८ बर्षिया मिनाको गर्भमा रहेको बच्चा चल्न छोडेपछि स्वास्थ्य कर्मीको टिमले मृत अवस्थामा बच्चा रातिनै निकाल्न सफल भएपनि आमाको अवस्था जटिल बन्दै गएपछि थप उपचारका निम्ती काठमान्डौ पठाइएको जनस्वास्थ्य निरीक्षक केशव थापाले बताउनु भयो ।

आमाको प्रेसर अत्याधिक कम भएपछि यहाँ प्रारम्भिक उपचार गरिएको र उहाँको अवस्था जटिल हुँदै जान थालेपछि पोखराबाट हेली मगाउने तयारी गर्दे गर्दा मौसमले साथ नदिएपछि काठमाण्डौबाट हेली मगाएर सोमबार साँझ मात्रै उद्धार गरिएको बुर्तिबाङ स्वास्थ्य केन्द्रका प्रमुख नविन्द्र ढकालले बताउनु भयो । 

सोमबार बिहान देखि स्थास्थ्यमा थप जटिल समस्या आउन थालेपछि उद्धार गरिएको हो ।

ढोरपाटन नगरपालिका कार्यवाहक मेयर धन बहादुर कायत र स्वास्थ्य कर्मीको  पहल गण्डकी प्रदेश सभा सदस्य माननिय दोर्ण कुमार कुवँरको सक्रियतामा राष्ट्रपती महिला उत्थान जिविको पार्जन सुधार कार्यक्रम अन्तगत हेली मगाइएको जनाइएको छ ।

गृह मन्त्रालय मार्फत नेपाली सेनाको हेलिकप्टर मगाएर सुत्केरी महिलाको साँझपख मात्रै उद्धार गरिएको बागलुङका प्रमुख जिल्ला अधिकारी नेत्र प्रसाद सुवेदीले जानकारी दिनुभयो ।

बुर्तिबाङ असार २२ गते 

लायन्स क्लब अफ ढोरपाटनले सप्ताहव्यापी कार्यक्रम अन्तरगत ढोरपाटन नगरपालिका २ सेरामा वृक्षारोपण कार्यक्रम सम्पन्न गरेको छ । 

लायन बर्ष २०२४÷०२५ को साप्ताहिक सर्भिस कार्यक्रमअन्तरगत विभिन्न प्रजातिका बिरुवा रोपन गरिएको हो ।

लायन्स क्लब अफ ढोरपाटनका अध्यक्ष छविलाल पाण्डेको नेतृत्वमा लायन्स क्लबका निवर्तमान अध्यक्ष राम प्रसाद आर्चाय लागएत पदाधिकारी, स्थानीय टोल विकास संस्थाका अध्यक्ष अमर बहादुर क्षेत्री लगायत पदाधिकारी, भालुमारे सामुदायिक वन उपभोक्ता समितिका अध्यक्ष टेक बहादुर कुवँर लगायत पदाधिकारी, कृषि समुह, बाल विकास केन्द्र लगायतको उपस्थिति मा वृक्षारोपण गरिनुका साथै स्थानीय समुदायको  अपनत्व रहने गरी रोपन गरिएको विरुवा लाई सबैले संरक्षण र जर्गेना गर्ने गरी अपनत्व लिन आग्रह गरिएको हो । 

वातावरणीय पर्यावरणलाई जोगाउनु सबैको दायित्व भएका कारण खाली भूभागमा बिरुवा रोपन गर्ने, त्यसको संरक्षण गर्ने कार्यक्रम अगाडि बढाइएको बताउँदै आगामी दिनमा सेवा भाव, समाजमा जनचेतना मूलक कार्यक्रम सँगै वातावरणीय क्षेत्रमा काम गर्ने गरी आफूहरू अगाडि बढिएको क्लब अध्यक्ष छविलाल पाण्डेले बताउनु भयो ।

वृक्षारोपण कार्यक्रममा जिल्ला वन कार्यालय बागलुङबाट घाँस प्रजाति र फलफूल प्रजातिका बिरुवा लिएर करिब एक सय बिरुवा रोपिएको हो । विभिन्न सामाजिक कार्यक्रम सक्रिय भूमिका निर्वाह गर्दे आएको क्लबले जुलाई ७ तारिखमा स्वास्थ्य सचेतना सम्बन्धी कार्यक्रम तय गरेको छ ।

 असार १८ गते बुर्तिबाङ

ढोरपाटन नगरपालिकाले मङ्गलबार सामुदायिक तथा निजी विद्यालयका प्रधानाध्यापक र विद्यालय व्यवस्थापन समितिका अध्यक्षको बिचमा शैक्षिक अन्तरकृया कार्यक्रम गरेको छ ।

ढोरपाटन नगरपालिकामा कुल ५८४ विद्यार्थीले परिक्षा दिएकोमा १४४ जना अर्थात २४.६५ प्रतिशत विद्यार्थी उर्तिण भएपछि शैक्षिक गुणस्तरको सम्बन्धमा चासो बदन थालेको हो

गत एसईई परीक्षामा ढोरपाटन नगरपालिका स्थित सामुदायिक विद्यालयको नजिता कमजोर देखिएपछि विद्यालयको अवस्था सँगै आगामी दिनमा शिक्षाको गुणस्तर उकास्न कसरी सकिन्छ भन्ने उद्देश्य सहित कार्यक्रमको आयोजना गरिएको शिक्षा शाखा प्रमुख गणेश रावलले बताउनु भयो ।

नगरपालिकाले शिक्षा क्षेत्रमा पर्याप्त मात्रामा लगानी गर्दा समेत सामुदायिक विद्यालयको गुणस्तर खस्कनुमा सबै पक्षको कमजोरी रहेको बताउँदै अबका दिनमा सबैले अपनत्व लिने गरी जिम्मेवार बनाएर अगाडि बढिने ढोरपाटन नगरपालिका कार्यवाहक मेयर धन बहादुर कायतले बताउनु भयो ।

शिक्षाको गुणस्तर वृद्धि नहुनुमा विद्यालयमा रहेको समस्या के हो र आपसमा दोषारोपण गरेर मात्रै समस्याको समाधान नहुने भएका कारण वास्तविक समस्याको समाधान निकाल्नका निम्ती यस्तो कार्यक्रम आयोजना गरिएको बताउँदै विद्यालयका शिक्षक, व्यवस्थापन समिति, अभिभावक, विद्यार्थी सँगै स्थानीय जनप्रतिनिधि र सरकारको समेत उत्तिकै भूमिका रहने भएका कारण निरन्तर शिक्षाको विषयमा समीक्षा गर्ने, अझै प्रभावकारी हुने गरी कार्यक्रम ल्याउने र जिम्मेवार पदमा रहेका व्यक्तिले आफ्नो भूमिका सक्रिय पूर्वक निभाउने गरी अगाडि बढाइने बताउँदै लगानी र जिम्मेवारी अनुसार परिणाम नदेखिएको खण्डमा कारवाही प्रकृया समेत अगाडि बढाउने गरी नगरपालिकाले तयारी अगाडि बढाएको कार्यवाहक मेयर धन बहादुर कायतले बताउनु भयो ।

नगरपालिका भरका ५३ वटा विद्यालयका प्रधानाध्यापक र व्यवस्थापन समितिका अध्यक्षको उपस्थिति रहेको कार्यक्रममा विद्यालयको अवस्था, चुनौती समस्या र अवसरका विषय सँगै आगामी दिनमा सुधार गरेर जानुपर्ने विषयका सन्दर्भमा विद्यालयका प्रधानाध्यापकले आफ्नो प्रतिवेदन प्रस्तुत गरेका छन ।

ढोरपाटन नगरपालिका सामाजिक विकास समिति संयोजक नवीन शेरचनको अध्यक्षतामा आयोजित कार्यक्रममा ढोरपाटन नगरपालिका कार्यवाहक मेयर धन बहादुर कायत, सामाजिक विकास समिति संयोजक नवीन शेरचन र शिक्षा शाखा प्रमुख गणेश रावलले विद्यालयको अवस्था र सुधारका सन्दर्भमा प्रश्न र जिज्ञासा राख्नुभएको थियो ।

कतिपय विद्यालयको शैक्षिक गुणस्तर वृद्धि नहुनुमा कोभिड पछिको सबै विद्यार्थीलाई साना कक्षामा पास गराउनुपर्ने बाध्यता, अभिभावकको चासो कम हुनु, चेतनाको अभाव जस्ता कारण पनि शिक्षामा परिणाम नआएको बताएका हुन ।

प्रमुख प्रशासकीय अधिकृत विष्णु प्रसाद ज्ञवाली,वडा अध्यक्ष लगायतको आतिथ्यता रहेको कार्यक्रम ज्ञानेन्द्र प्रसाद सापकोटाले सहजिकरण गर्नुभएको थियो । नतिजा

असार १८ गते बुर्तिबाङ

निसीखोला गाउँपालिका वडा नम्बर २ ले सोमबार एक कार्यक्रमका बिच अन्तर जातीय विवाह गर्ने जोडी र ७ वटा सामुदायिक विद्यालयका ४२ जना विद्यार्थीलाई स्टेसनरी सहित सम्मान गरेको छ ।

वडा नम्बर २ को आर्थिक बर्ष २०८०÷८१ को कार्यक्रम अन्र्तगत वडाभरि अन्तर जातीय विवाह गरेका जोडी सहित आर्थिक रुपमा कमजोर रहि पढाईबाट बञ्चित रहेका तथा अति विपन्न परिवारका ४२ जना बालबालिकालाई स्टेसनरी ले सम्मान गरिएको हो ।

विशेष गरी दलित समुदाय र अन्य जाती बिच विवाह गरेका ६ जोडीलाई सम्मान पत्र र दोसल्ला ओढाएर सम्मान गरिएको हो । समाजमा अझै पनि जातीय भेदभाव र छुवाछुत व्याप्त रहेको सन्दर्भमा त्यसलाई चिर्न र अन्तरजातीय विवाह गर्दे गर्दा समाजले हेर्ने दृष्टिकोणलाई चिर्नका निम्ती र सकारात्मक सन्देश दिने उद्देश्य स्वरुप सम्मान कार्यक्रमको आयोजना गरिएको वडा नम्बर २ का अध्यक्ष कुविर विश्वकर्माले बताउनु भयो ।

२०७२ सालको संविधानमा निदृष्ट गरेको जातीय छुवाछुत अन्त्यका निम्ती समाजबाटै सकारात्मक स्पमा अगाडि बढ्नुपर्दछ भन्ने मान्यता अनुसार अन्तर जातीय विवाह गरेका जोडीलाई समाजले पनी सम्मान गरोस् र उहाँहरूलाई प्रोत्साहन गर्ने उद्देश्य स्वरुप एक कार्यक्रमका बिच सम्मान गरिएको अध्यक्ष बिकको भनाई छ । अन्तरजातीय विवाहमा सम्मान भएका जोडीले वडा कार्यालयले यस्तो महत्वपूर्ण कार्यक्रम आयोजना गरेको धन्यबाद व्यक्त गर्दे समाजमा अझै पनि बाँकी रहेको जातीय छुवाछुत र भेदभावका निम्ती सबैको भूमिका महत्वपूर्ण रहेको बताएका छन ।

सहभागि छमकला बराल मगरले बोल्दै भन्नुभयो आफूले दलित सँग विवाह गर्दे गर्दा सुरुवाती चरणमा समाजकै कारण केही असहज भएपनि अहिले सुन्दर सन्सार बिताईरहेको बताउनु भयो । मानिस मानिस एकै भएको र जात केबल पुरुष र महिलाको मात्र रहेको बताउँदै सचेत मानिसबाट समाजमा हुँदै आइरहेको जातीय छुवाछुत र भेदबाद अन्त्य गर्नुपर्नेमा जोड दिनुभयो ।

सोमबार आयोजित कार्यक्रममा वडा अध्यक्ष कुविर विश्वकर्माको अध्यक्षता,गण्डकी प्रदेशका पूर्व सांसद खिम विक्रम शाही, वडा अध्यक्ष, सामाजिक अगुवा, स्थानीय बासिन्दा लगायतको उपस्थिति रहेको थियो । सहभागिले यस्तो महत्वपूर्ण कार्यक्रम आयोजना गरेको भन्दै वडा नम्बर दुई लाई धन्यबाद ज्ञापन गरेका हुन । दलित महिला सचेतना कार्यक्रमको समेत आयोजना गरेको वडाले हक अधिकार संगै भेदभाब र छुवाछुत गर्दा हुने कानुनी पाटो र त्यसको अवस्था लगाएतका विषयमा समेत जानकारी गराइएको थियो । 

असार १७ बुर्तिबाङ

जिल्लाको निसीखोला गाउँपालिका ३ मा रहेको प्रभा माध्यमिक विद्यालयले एसईई परीक्षामा उर्तिण विद्यार्थीलाई सम्मान गरेको छ ।

आइतबार एक कार्यक्रमको आयोजना गर्दे विद्यार्थीले उर्तिण विद्यार्थीलाई सम्मान गर्दे थप शैक्षिक सफलताको कामना गरिएको हो ।

निसीखोला गाउँपालिका वडा नम्बर ३ का अध्यक्ष रमेश विक्रम शाहीको अध्यक्षतामा आयोजित कार्यक्रमका अवसरमा गण्डकी प्रदेश निवर्तमान सांसद खिम विक्रम शाहीको प्रमुख आतिथ्यता रहेको थियो ।

कार्यक्रममा बोल्दै शाहीले प्रभा माध्यमिक विद्यालयले शैक्षिक गुणस्तरमा अझै अगाडि बढ्नुपर्ने बताउँदै उर्तिण विद्यार्थीको शैक्षिक सफलताको कामना गर्नुभयो ।

त्यस्तै कार्यक्रममा विशिष्ट अतिथिको रुपमा रहनुभएका निसीखोला गाउँपालिका शिक्षा शाखा प्रमुख विष्णु प्रसाद न्यौपानेले बोल्दै विद्यालयको शैक्षिक गुणस्तर उकास्न अझै अगाडि बढ्नुपर्ने आवश्यकता देखिएको बताउँदै शिक्षा गुणस्तर वृद्धि नभएसम्म देशको विकास नहुने बताउनु भयो ।

शिक्षामा राज्यले गरिरहेको लगानीलाई परिणाम मुखी बनाउन सरोकारवाला सबै सचेत भएर अगाडि बढ्नुपर्ने बताउनु भयो । कार्यक्रममा विद्यालयका प्रधानाध्यापक नवराज आर्चायले समेत मन्तव्य व्यक्त गर्नुभएको थियो , कार्यक्रममा विद्यार्थी संगै उत्कृष्ट नजिता ल्याउन सफल विषयगत शिक्षकलाई सम्मान गरिएको थियो । पश्चिम बागलुङमा ३.७८ जिपिय लिएर प्रभा माविका हिमाल परियारले सर्वाेकृत्ट अँक ल्याएका हुन ।

बुर्तिबाङ असार १६ गते

बागलुङको तमानखोला गाउँपालिकाको आयोजनामा शनिबार सार्वजनिक सुनुवाई कार्यक्रम वडा नम्बर ४ को लाम्मेलामा सम्पन्न भएको छ । प्रत्यक चौमासिकमा सार्वजनिक सुनुवाई गर्दे आएको पालिकाले आर्थिक बर्ष २०८०÷०८१ को तेश्रो चौमासिक सम्मको सार्वजनिक सुनुवाई गरेको हो ।

गाउँपालिका अध्यक्ष जोकलाल बुढाको अध्यक्षतामा आयोजित कार्यक्रममा उपाध्यक्ष हिराकुमारी छन्त्याल, वडा अध्यक्षहरू, कार्यपालिका सदस्य, वडा सदस्य, विषयगत शाखाका शाखा प्रमुख लगायत स्थानीय करिब ३ सय जना नागरिकको सहभागिता रहेको कार्यक्रममा स्थानीय नागरिकले सक्रिय पूर्वक आफ्नो मनमा लागेका गुनासो, सुझाव र जिज्ञासा राखेका हुन ।

करिब देड दर्जन नागरिकले राखेको धारणामा विशेषगरी कृषि, पर्यटन, शिक्षा, भौतिक पूर्वाधार, खानेपानी, सडक, जलविद्युत आयोजना लगायतका विषय प्राथमिकतामा रहेका थिए ।

सहभागिबाट उदिम बहादुर छन्त्याल, दिल बहादुर सिर्पाली, जग बहादुर छन्त्याल, जसिन्द्र सिर्पाली, विष्णु सिर्पाली, दिलमती हर्मल, मनोज सिर्पाली, तेजेन्द्र सिर्पाली, ख बहादुर हर्मेल, टेकमाया सिर्पाली लगायतले आफ्नो प्रश्न, जिज्ञासा र गुनासो व्यक्त गरेका थिए ।

तमानखोला ४ मा रहेको सरस्वती आधारभुत विद्यालयमा ४ को भवन निर्माणमा भौतिक गुणस्तर कम भएको, ४ नम्बर वडाका केही बस्तीमा सडक सञ्जाल पुग्न नसकेको, खानेपानी, पुल आवश्यक रहेको , पालिकामा भौतिक गुणस्तर वृद्धि रहेपनि एसईई परीक्षाको नतिजाकमजोर आएका कारण शैक्षिक गुणस्तर सुधार हुन नसकेको, पालिकामा बजेट बेरुजु देखिनुका कारण, पालिकामा भएको खाजा खर्चको अवस्था लगायतका विषयमा स्थानीयले धारणा राखेका थिए ।

स्थानीय खानी सञ्चालन गर्नमा ध्यान दिनुपर्ने, तमानखोला र म्याग्दीको सिमानामा पर्ने पर्यटकीय सोले क्षेत्रमा सिमा विवाद समाधान गर्नुपर्ने, पुराना जीर्ण हुँदै गएका भौतिक संरचनामा ध्यान दिनुपर्ने लगायतका विषयमा नागरिकले सक्रिय रुपमा धारण, राखेका हुन ।

कार्यक्रममा सहभागि बाट उठेका जिज्ञासा, प्रश्न र गुनासोको सन्दर्भमा गाउँपालिका अध्यक्ष जोकलाल बुढा, उपाध्यक्ष हिराकुमारी छन्त्याल, वडा नम्बर ४ का अध्यक्ष छ प्रसाद श्रीपाली, प्राविधिक अर्जुन कुमार यादब, वडा सचिव महेन्द्र कँडेल, शिक्षा शाखा प्रमुख दुर्गा दत्त घिमिरे, कृषि शाखा प्रतिनिधि लगायतले प्रस्ट पार्नुभएको थियो ।

गाउँपालिका अध्यक्ष जोकलाल बुढाले जवाफ दिँदै तमानखोला गाउँपालिकाले शैक्षिक क्षेत्रमा सबैभन्दा बढि लगानी गर्दे गर्दा पनि अझैसम्म शैक्षिक गुणस्तर माथि उठ्न नसकेको बताउँदै अबका दिनमा परिणाम मुखी शिक्षा क्षेत्रको गुणस्तर वृद्धि हुने गरी सबै सक्रिय पूर्वक लाग्नुपर्नेमा जोड दिनुभयो ।

भौतिक गुणस्तर राम्रो हुँदै गर्दा शैक्षिक गुणस्तरमा पालिकाले मात्र ध्यान दिएर नपुग्ने बताउँदै शिक्षक, अभिभावक र विद्यार्थी समेत जिम्मेवार बन्न आवश्यक रहेको बताउनु भयो । शिक्षा क्षेत्रलाई थप व्यवस्थित बनाउन समीक्षात्मक रुपमा अगाडि बढ्न आवश्यक रहेको प्रस्ट पार्नुभयो ।

त्यस्तै पालिकाले १४ लाख खाजामा खर्च गर्यो भन्ने सहभागीको प्रश्नको जवाफ दिँदै पालिकाले १ वर्षमा खाजा खर्चमा मात्रै १४ खर्च नगरेको बताउँदै विभिन्न क्षेत्रमा भएका प्रशासनिक खर्च, तालिम, लगायतमा भएको खर्चलाई एकै ठाउँमा जोड्न नहुने बताउँदै पालिकामा सामाजिक सञ्जालमा आएको जस्तो तथ्यांक नरहेको बताउनु भयो ।

पालिकाले खर्चमा मितव्ययिता अपनाइरहेको बताउँदै बेरुजु विभिन्न किसिमका हुने बताउँदै बेरुजुलाई कम गर्न पालिका सक्रिय रुपमा लगीरहेको बताउनु भयो । तमानखोला गाउँपालिकाले छुवाछुत अन्त्यका निम्ति विभिन्न प्रयास गरिरहेको बताउँदै छुवाछुत जन्य कृयाकलाप रोक्न आम मानिस सचेत हुनुपर्ने बताउँदै हालसम्म पालिकामा छुवाछुत जन्य गतिविधिका विषयमा कुनै उजुरी नपरेको बताउँदै यस्ता गैर कानुनी काम कसैले गरे सम्बन्धित निकायमा उजुरी गर्न आग्रह गर्दे छुवाछुत अन्त्यका निम्ति संघीय सरकारले नै तदारुकता नदेखाउँदा सम्म त्यसलाई स्थानीय सरकारको पहलले मात्र पूर्णता पाउन नसक्ने बताउनु भयो ।

त्यस्तै प्रर्यटयिक क्षेत्रमा देखिएको सिमाना विवादको विषयमा अन्तरगत जिल्ला बिच सम्मोन्य आवश्यक रहेका कारण आवश्यक सम्मोन्य भइरहेको बताउनु भयो । सरस्वती आधारभुत विद्यालयमा विद्यालय भवन निर्माणमा कम गुणस्तर रहेको स्थानीय प्रश्नका सन्दर्भमा प्राविधक अर्जुन कुमार यादवले जवाफ दिँदै प्राविधिक स्टेमिट अनुसार काम गुणस्तर रुपमा सम्पन्न भएको र उपभोक्ता समितिले सो भन्दा बढि गरेको काम गुणस्तर हिन रहेको बताउँदै समितीले गरेको काम प्रभावकारी नहुनुमा स्वयम् विद्यालय, व्यवस्थापन समिती, उपभोक्ता समितिले ध्यान दिनुपर्ने बताउनु भयो ।

त्यस्तै सहभागिले राखेका वडागत रुपमा सडक, खानेपानी, स्थानीय समस्याका सन्दर्भमा वडा नम्बर ४ का अध्यक्ष छ प्रसाद श्रीपालीले बोल्दै नागरिकका आशा, अपेक्षा बमोजिम योजनाको छनौट, वर्गीकरण गर्दे विकास निर्माणका काम भइरहेको बताउँदै विकास निर्माण, र समाजमा रहेका विकृति, विसंगति न्यूनिकरणका निम्ति सबै नागरिकको भूमिका समेत महत्वपूर्ण हुने बताउनु भयो ।

कार्यक्रमका अवसरमा प्रमुख प्रशासकीय अधिकृत ईश्वरलाल शाक्यले आर्थिक बर्ष २०८०÷०८१ को बजेट, कार्यक्रम र योजना र गाउँपालिकाले गरेका महत्वपूर्ण कामको सन्दर्भमा प्रतिवेदन प्रस्तुत गर्नुभएको हो ।

कार्यक्रम गाउँपालिका उपाध्यक्ष हिराकुमारी छन्त्यालको स्वागत, सामुदायिक रेडियो ढोरपाटनका स्टेशन प्रमुख छविलाल पाण्डेको सहजिकरणमा सम्पन्न भएको हो ।

असार १३ गते बुर्तिबाङ

तमानखोला गाउँपालिकाले हलगोरु पाल्ने कृषलाई प्रोत्साहन स्वरुप नगद अनुदान उपलब्ध गराउने भएको छ ।

गत असार १० गते प्रस्तुत गाउँपालिकाको निती तथा कार्यक्रममा रैथाने जातका गोरु पाल्ने किसानलाई गाउँपालिकाले अनुदान स्वरुप सम्मान गर्ने उद्देश्य सहित पाँच लाख बजेट समेत विनियोजन गरेको छ ।

बढ्दो यान्त्रिकरण सँगै गोरु पाल्ने चलन हराएका ले ‘हल गोरु पाल्न प्रोत्साहन एवं प्रवर्द्धनात्मक’ कार्यक्रमअन्तर्गत किसानलाई अनुदान दिन यस्तो कार्यक्रम लिइएको तमानखोला गाउँपालिका अध्यक्ष जोक लाल बुढाले बताउनु भयो । गाउँघरमा गोरु लोपउन्मुख हुन थालेपछि आधुनिक टेलर बढ्दै गएको पाइन्छ ।

कृषि उत्पादनको वृद्धि गर्न, रोजगारीको सृजना गर्न र पर्याप्त मल उत्पादन गर्न समेत गोरु पालन व्यवसाय राम्रो रहेको भन्दै गाउँपालिकाले गोरु पाल्ने किसानलाई अनुदान दिने गरी यसवर्ष कार्यक्रम ल्याएको हो ।

बढ्दो प्रविधिको विकाससँगै गोरु लगाएर जोत्ने परम्परा हराएका ले त्यसलाई संरक्षण गर्न किसानलाई अनुदान दिन लागिएको अध्यक्ष बुढाले बताउनु भयो ।

मिनी टेलर वितरणले गोरु पाल्ने किसान निरुत्साहित भएको महसुस गरेकाले अनुदान कार्यक्रम ल्याएको र गोरु पाल्दा वातावरणीय रुपमा समेत फाइदा स्थानीयको भनाई छ ।

 असार १२ गते बुर्तिबाङ

बागलुङको निसीखोला गाउँपालिका स्तरीय खेलकुद विकास समिति द्धारा सार्वजनिक सुनवाई गर्दे गाउँपालिका अध्यक्ष कपको आयव्यय विवरण सार्वजनिक गरेको छ ।

बुधबार निसीखोला गाउँपालिका कार्यालयको सभाहलमा सार्वजनिक सुनवाई कार्यक्रमको आयोजना गर्दे गत बैशाख १ देखि ६ गतेसम्म भएको गाउँपालिका अध्यक्ष कप कार्यक्रमको आयव्यय विवरण सार्वजनिक गरेको हो । खेलकुद विकास समिति अध्यक्ष राजमान बुढाको अध्यक्षतामा आयोजित कार्यक्रममा विभिन्न राजनैतिक दलका प्रतिनिधि, कर्मचारी, स्थानीय बासिन्दा लगायतको उपस्थिति रहेको थियो । गाउँपालिका अध्यक्ष कप तथा विविध खेलकुद एवम् सांस्कृतिक कार्यक्रम वडा नम्बर १ को देविस्थान माध्यमिक विद्यालयमा सम्पन्न भएको थियो ।

कार्यक्रम सञ्चालन व्यवस्थापनका निम्ति निसीखोला गाउँपालिकाले १५ लाख बजेट विनियोजन गरेको छ । समितिका अध्यक्ष राजमान बूढा द्धारा प्रस्तुत विवरणमा कुल १६ लाख ६४ हजार ८ सय २७ रुपैयाँ खर्च भएको पाइएको छ । कार्यक्रम प्रस्तावना भन्दा बढि अन्य विविध खर्च भएका कारण कुल १ लाख ६४ हजार ८ सय २७ रुपैयाँ रकम घाटा हुन पुगेको अध्यक्ष बुढाले बताउनु भयो ।

भलिबल  खेलतर्फ ४ लाख ५१ हजार, तेक्वान्डो तर्फ १ लाख १० हजार, अन्य कार्यक्रम तर्फ २ लाख ७९ हजार अफिसियल तर्फ १ लाख ५० हजार, साउन्ड सिस्टम र टेन्ट तर्फ १ लाख ७० हजार रुपैयाँ खर्च भएको पाइएको छ । त्यस्तै अन्य विभिन्न शीर्षकमा खर्च गरेको समितिले व्यवस्थापकीय क्षेत्रमा बढि रकम खर्च भएको जनाइएको हो । कार्यक्रम सभ्य र भव्य रुपमा सम्पन्न भएको बताउँदै देविस्थान युवा क्लब लगायत विभिन्न सहयोगी दातालाई धन्यबाद दिँदै आगामी दिनमा थप व्यवस्थित रुपमा अगाडि बढिने बताउनु भयो ।

कार्यक्रममा निसीखोला गाउँपालिका पूर्व अध्यक्ष तारानाथ पौडेल, नेपाली कांग्रेसको तर्फदेखि चेतराम पौडेल, नेकपा एमाले प्रतिनिधि भूमिराज घर्ती, नेकपा माओवादी केन्द्र प्रतिनिधि भीम घर्ती, राजमो प्रतिनिधि थमन घर्ती , देविस्थान युवा क्लब अध्यक्ष भरत पुन लगाएले बोल्दै खेलकुद विकास समितिले आफूले गरेको कार्यक्रमको विषयमा सार्वजनिक सुनुवाइ कार्यक्रम गरेकोमा राम्रो पक्षको सुरुवात भएको बताउँदै मेला महोत्सवलाई अझै व्यवस्थित गर्न फजुल खर्चमा मितव्ययिता ल्याउनुपर्ने, कार्यक्रममा पुरस्कार राशि कम गरेर भएपनि खर्चलाई व्यवस्थित गरिनुपर्ने, खेलकुद लगायतका कार्यक्रम सञ्चालन गर्दे गर्दा कृर्षि, लघु उद्यम जस्ता महत्वपूर्ण वस्तुलाई बजारीकरणमा टेवा पुग्ने गरी अगाडि बढ्नु पर्नेमा जोड दिएका हुन ।

कार्यक्रममा गाउँपालिका वडा नम्बर १ का अध्यक्ष चन्द्रसिंह रामजाली, उपाध्यक्ष प्रेम बहादुर घर्ती, गाउँपालिका अध्यक्ष सूर्य बहादुर घर्तिले बोल्दै गाउँपालिकाले अध्यक्ष कप सञ्चालन गर्दे गर्दा समग्र निसीखोला गाउँपालिकाको खेलकुद सँगै कला संस्कृति, भेष भुसाको संरक्षण र सम्र्वधनमा टेवा पुग्ने बताउँदै यस्ता महत्वपूर्ण कार्यक्रममा युवाहरूको सक्रियता आवश्यक रहने बताउनु भयो ।

बागलुङ जिल्लाको पश्चिम बुर्तिबाङदेखि करिब ५ किलोमिटर पश्चिममा रहेको निसीखोला गाउँपालिका १, देविस्थान मा.वि.मा एस.ई.ई. दिएर बसेका विद्यार्थीहरू नतिजा पर्खदै कम्प्युटर सिक्दै गरिरहेका छन् । उनीहरूले एस.ई.ई. दिएपछि फुर्सदको समयलाई कम्प्युटर सिक्नमा प्रयोग गरिरहेका छन् । विद्यालयले बिहानको समयमा विद्यार्थीहरूलाई कम्प्युटर सिकाइरहेको कुरा विद्यालयका प्रधानाध्यापक झग बहादुर क्षेत्रीले जानकारी गराउनु भयो । कम्प्युटर सिक्नका लागि बुर्तिबाङ बजारलगायत अन्यन्त्र जानुपर्ने र बढी रकम खर्च गर्नुपर्ने अवस्थालाई न्यूनिकरण गर्नका लागि विद्यालयमै कम्प्युटर सिकाउन थालिएको हो । विद्यार्थीहरूले उत्साहजनक रूपमा कम्प्युटर सिकिरहेको तथा विद्यालयमै कम्प्युटर सिक्न पाइने भएपछि अभिभावकहरूले पनि केही राहत महसुस गरेको कुरा विद्यालयका शिक्षक तथा कम्प्युटर प्रशिक्षक दिपक घिमिरेले बताउनुभयो । हाल विद्यालयमा २५ जना विद्यार्थीहरूले कम्प्युटर सिकिरहेका छन् । स्मरण रहोस् अघिल्लो वर्ष पनि विद्यालयले एस.ई.ई. दिएर बसेका ५५ जना विद्यार्थीहरूलाई निशुल्क रूपमा कम्प्युटर शिक्षा प्रदान गरेको थियो ।

बागलुङ जिल्लाको पश्चिम बुर्तिबाङदेखि करिब ५ किलोमिटर पश्चिममा रहेको निसीखोला गाउँपालिका १, देविस्थान मा.वि.मा एस.ई.ई. दिएर बसेका विद्यार्थीहरू नतिजा पर्खदै कम्प्युटर सिक्दै गरिरहेका छन् । उनीहरूले एस.ई.ई. दिएपछि फुर्सदको समयलाई कम्प्युटर सिक्नमा प्रयोग गरिरहेका छन् । विद्यालयले बिहानको समयमा विद्यार्थीहरूलाई कम्प्युटर सिकाइरहेको कुरा विद्यालयका प्रधानाध्यापक झग बहादुर क्षेत्रीले जानकारी गराउनु भयो । कम्प्युटर सिक्नका लागि बुर्तिबाङ बजारलगायत अन्यन्त्र जानुपर्ने र बढी रकम खर्च गर्नुपर्ने अवस्थालाई न्यूनिकरण गर्नका लागि विद्यालयमै कम्प्युटर सिकाउन थालिएको हो । विद्यार्थीहरूले उत्साहजनक रूपमा कम्प्युटर सिकिरहेको तथा विद्यालयमै कम्प्युटर सिक्न पाइने भएपछि अभिभावकहरूले पनि केही राहत महसुस गरेको कुरा विद्यालयका शिक्षक तथा कम्प्युटर प्रशिक्षक दिपक घिमिरेले बताउनुभयो । हाल विद्यालयमा २५ जना विद्यार्थीहरूले कम्प्युटर सिकिरहेका छन् । स्मरण रहोस् अघिल्लो वर्ष पनि विद्यालयले एस.ई.ई. दिएर बसेका ५५ जना विद्यार्थीहरूलाई निशुल्क रूपमा कम्प्युटर शिक्षा प्रदान गरेको थियो ।