माघ १२ गते बुर्तिबाङ

बागलुङको ढोरपाटन नगरपालिकाले नगरपालिका भरका एकल महिलालाई लक्षित गर्दे चिसो मौसममा न्यानो सिरक लिएर उपहार स्वरुप वडा वडामा पुगेर हस्तान्तरण सुरु गरेको छ ।

एकल महिलालाई सम्मान गर्न र उनीहरूको आत्मसम्मान वृद्धि गर्ने उद्देश्य स्वरुप पालिका भरका करिब ६ सय महिलाहरूलाई फाइबर सिरक उपलब्ध गराउन सुरु गरिएको ढोरपाटन नगरपालिका कार्यवाहक मेयर धन बहादुर कायतले बताउनु भयो ।

चालु आर्थिक बर्षको निती कार्यक्रम र बजेटमा एकल महिला सँग नगर उपप्रमुख कार्यक्रम अन्र्तगत ९ लाख बजेट विनियोजन गरेर ९ वटै वडाका एकल महिलालाई लक्षित गर्दे कार्यक्रमको आयोजना गरिएको कायतले बताउनु भयो । शनिबार ढोरपाटन नगरपालिका ७, ८ र ९ नम्बर वडाका १७८ जनालाई सिरक उपलब्ध गराइएको हो । सिरक हस्तान्तरण गर्दे कार्यवाहक मेयर धन बहादुर कायतले चिसो मौसममा सिरक उपलब्ध गराइएको बताउँदै आगामी दिनमा ज्येष्ठ नागरिकलाई सम्मान हुने कार्यक्रम लिएर अगाडि बढिने बताउनु भयो ।

समाजका उत्प्रेरक मार्गदर्शकलाई सम्मान गर्नु स्थानीय सरकारको दायित्व रहेको बताउँदै सहारा विहीन, जोडी बिहिन बनेका एकल महिलालाई यसबर्ष सम्मान गरिएको बताउनु भयो । सिरक पाएसँगै आगामी दिनमा पनी आफुहरुलाई सम्झने कार्यक्रम लिएर आउन सहभागि एकल महिलाले कार्यवाहक मेयरलाई अनुरोध गरेका छन । वडा नम्बर ७ मा ५० जना, ८ मा ६४ जना, वडा नम्बर ९ मा ६४ जनालाई सिरक उपलब्ध गराइएको हो ।

कार्यक्रममा सहभागि नभएकालाई वडाले हस्तान्तरण गर्ने गरी जिम्मा लगाइएको छ । कार्यक्रममा ढोरपाटन नगरपालिका प्रमुख प्रशासकीय अधिकृत चिरञ्जीवी घिमिरे, वडा नम्बर ९ का कार्यवाहक वडा अध्यक्ष मोहन पुन, वडा नम्बर ८ का अध्यक्ष भद्रमणी सुनार, वडा नम्बर ७ का अध्यक्ष धन बहादुर अदै लगायतको रहोबरमा हस्तान्त्रण गरिएको हो । अन्य सबै वडामा लगत्तै सिरक उपलब्ध गराइने जनाईको छ ।

ढोरपाटन माघ ११
बागलुङको ढोरपाटन नगरपालिका ५ पाखापानीका मानसिङ पुनले २०७३ सालमा रहरै रहरमा सुरु गरेको स्वरोजगार कृषि तथा पशुपालन फार्म व्यवसायले पछिल्ला वर्षमा सार्थकता पाएको छ । बाख्रा सँगै फलफूल खेतीमा पन्ध्र लाख लगानीबाट व्यवसाय सुरुवात गरेका पुनको मिहिनेतले व्यवसायिक कृषि र पशुपालनबाट पाखो बारी हराभरा भएको छ । खोरभरी पचासौँ बाख्रा खसिबोका उत्पादन भइरहेका छन ।
पुर्खौली र रैथाने खेतीप्रणालीलाई क्रमश हटाउँदै व्यवसायिक खेतीमा होमिएका मानसिङ्को बहुउद्देश्य फार्ममा यतिबेला हजारौँ बोट केरा, सयौँ बोट किवी संगै कागती, सुन्तला, टिमुर लगायतका खेतीले घरवरिपरी सँगै आसपासमा रहेको बाँझो जमिन समेत राम्रै प्रयोगमा आएको छ ।
स्वास्थ्य कर्मी समेत रहेका पुन दम्पती दिनभर जागिरमा व्यस्त हुन्छन साँझ बिहानको समयलाई व्यवसायमा खर्च गरेका उनिहरुलाई घरमा बाबा, आमा ,दाई, भाउजू, दिदीबहिनीको राम्रो साथ छ । करिब तीस रोपनी क्षेत्रफल खेतियोग्य जमिनबाट कृषिको व्यवसायिक सुरुवात पुनले सात बर्षमा १८० रोपनी क्षेत्रफलमा खेती विस्तार गरेका हुन  ।
दुई हजार पाँच सय घार मात्रै विभिन्न प्रजातिका केरा छन केराबाट राम्रो उत्पादन सुरु भएको छ । १७ रोपनी क्षेत्रफलमा १४० बोट किवी प्रत्यक बर्ष लटरम्म फल्न थालेको छ । 

४० बोट कागती, ५० बोट सुन्तला, २५० बोट टिमुर पाखैभरि देखिन्छ । सबै प्रकारका बोटबाट उत्पादन सुरु हुन थालेपछि मानसिंहको परिवार खुसी छन नै उत्पादित कृषि उपज हेर्नका निम्ती विभिन्न ठाउँदेखि नागरिकहरू अवलोकनका लागी पुग्ने गरेका छन ।

सबै फलफूलबाट राम्रो उत्पादन समेत सुरु गरेका पुनले यसवर्ष व्यवसायलाई थप वृद्धि गर्ने तयारीमा छन । बाउ बाजेले प्रयोग गरेको सयौँ रोपनी पाखो बारीलाई अब उत्पादन सँग जोड्न उनको लक्ष्यमा नेपाल सरकारले पनि साथ दिने भएको हो । अझै ३० रोपनी क्षेत्रफल वृद्धि गरेर यसवर्ष कुल दुई सय १० रोपनीमा खेती पुर्याउने गरी काम सुरु गरेका उनले अब किवी खेतीलाई विस्तार गर्ने र त्यसका निम्ती चालु आर्थिक बर्षमा प्रधानमन्त्री कृषि आधुनिकीकारण परियोजना मार्फत १० लाख अनुदानको कार्यक्रम परेको बताए  उक्त बजेटमा आफूले समेत लगानी वृद्धि गरी किवी खेतिको विस्तारमा अगाडि बढ्ने लक्ष्य रहेको सुनाए ।
तालिम र अनुदानको आशा नगरी व्यवसायमा होमिएका पुनलाई परिवारका सदस्यले साथ दिइरहेका थिए । दाई हिमाल कुमार पुन बैदेशिक रोजगारीमा यूरोपमा हुनुहुन्थ्यो विदेशमा कमाउने रकम घरमै परिवार सँगै बसेर कमाउन सकिने देखेपछि दाईलाई समेत घरमै बोलाएर अगाडि बढेका उनले कृषि र पशुपालनमा दिगो लक्ष्य रहेका कारण वार्षिक लाखौँ रुपैयाँको कारोबार गर्ने गरी अगाडि बढिरहेको बताए ।  

कृषि, पशुपालन व्यवसाय सुरु गर्ने तर धेरै समय टिक्नै नसक्ने यूवा प्रबृर्तिलाई अन्त्य गर्दे कुनै हरेश नखाई फलफुल र बाख्रा पालनमा रमेका मानसिंहले दिगो लक्ष्य लिएर अगाडि बढ्दै आएका हुन ।

प्रर्याप्त खानेपानी र सिंचाईको सुविधा नहुँदा समस्यामा रहेका पुनलाई कृषि ज्ञान केन्द्र बागलुङले समेत ९० हजार रुपैँया अनुदान दिने भएको छ । सिँचाई प्रर्याप्त भएमा अझै राम्रो परिणाम प्राप्त हुने बताउँदै राज्यले बास्तविक किसानको छनौट गरेर लगानी गरेमा आफुजस्ता युवाहरुलाई गाउँमै व्यवसायक बन्न धेरै सहयोग पुग्ने उनको भनाई छ ।
यसवर्ष मात्रै ६ कुइन्टल बढि किवी उत्पादन गरी विक्री गरेका उनले दैनिक १० घार सम्म केरा र पचासौँ कुइन्टल किवी बजार पठाउने लक्ष्य सहित अगाडि बढिएको बताए ।

 माघ ११ गते ढोरपाटन

बागलुङको ढोरपाटन नगरपालिकाको हिउँदे नगरसभा तथा १६ औँ अधिवेशन शुक्रबार सम्पन्न भएको छ ।

गत पौष २९ गते सोमबार देखि सुरु भएको बजेट, योजना तथा कार्यक्रम माथिको प्रस्ताव संगै विभिन्न ७ वटा ऐन, नियमावली, कार्यविधि सभामा पेश गरिएको थियो । शुक्रबारको नगरसभाले बजेट कार्यक्रम सँगै ऐन कार्यविधि र नियमावली माथि व्यापक छलफल सहित पारित गरिएको ढोरपाटन नगरपालिका प्रमुख प्रशासकीय अधिकृत चिरन्जिवि घिमिरेले बताउनु भयो ।

ढोरपाटन नगरपालिका कार्यवाहक मेयर धन बहादुर कायतको अध्यक्षतामा सञ्चालन भएको सभा तथा अधिवेशनबाट १५ औँ नगरसभाबाट पास भएका योजनालाई थप संसोधन गर्दे ६८ करोड, ७८ लाख ५० हजार पाँच सय रुपैयाँ कुल बजेट सहितको विभिन्न संशोधित योजना, कार्यक्रम र बजेट प्रस्तुत गरिएको हो ।

सभाबाट विभिन्न ७ वटा ऐन, विधेयक र नियमावलीको प्रस्ताव माथि छलफल गर्दे पारित गरिएको हो । जसमा ढोरपाटन नगरपालिका सहकारी नियमावली २०८१, ढोरपाटन नगरपालिका सार्वजनिक खरिद नियमावली २०८१, ढोरपाटन नगरपालिका विद्यमान समितिको कार्यसञ्चालन कार्यविधि २०८१, ढोरपाटन नगरपालिका व्यवसाय दर्ता विधेयक २०८१ पारित गरिएको छ ।

त्यस्तै ढोरपाटन नगरपालिका लेखा समितिको कार्यसञ्चालन कार्यविधि २०८१, ढोरपाटन नगरपालिकाको प्रशासकीय खर्च नियमन कार्यविधि २०८१, र ढोरपाटन नगरपालिकाको शिक्षा ऐन माथि छलफल सहित सभाबाट पारित गरिएको हो । त्यस्तै प्रस्तावित वार्षिक बजेट कार्यक्रम र योजना अन्र्तगत १५ औँ अधिवेशनको बजेटमा थप २५ लाखको बजेट थप गर्दे ३० वटा संशोधित योजना र कार्यक्रम पारित गरिएको हो ।

बजेट, कार्यक्रम र योजनालाई सभाको बहुमतद्वारा पारित गरिएको थियो । पौष २९ गते ल्याइएको संशोधित बजेटमा थप १६ लाख रुपैयाँको कार्यक्रम संसोधन गरिएको हो ।जसमा आमा समुह तथा महिला स्वास्थ्य स्वयमसेवीका को लागी सामाजिक व्यवहार परिवर्तन तथा गुणस्तरीय स्वास्थ्यका लागी आफ्नै पहल कार्यक्रम तर्फको ७ लाख र विभिन्न योजनाहरूको कन्सल्टेन्सी बापतको एकमुष्ट जम्मा भएको रकम ९ लाख संसोधन गरिएको हो ।

उक्त बजेट प्रादेशिक अस्पताल उद्‌घाटन र प्रशासनिक भवन उद्घाटनमा लाग्ने ७ लाख  खर्च सहित विभिन्न शीर्षकमा समावेश गरिएको छ ।

प्रस्तुत ऐन, विधेयक र नियमावली उपर सभाका सदस्यले अध्ययन गर्ने र व्यापक छलफल पछि सभाबाट पारित गर्ने गरी पार्ने गर्ने तयारी सहित पौष २९ गतेको सभाको समय आजका लागी सारिएको थियो । कार्यक्रम ढोरपाटन नगरपालिका प्रमुख प्रशासकीय अधिकृत चिरन्जिवि घिमिरेले सहजिकरण गर्नुभएको हो ।

माघको तेस्रो हप्तादेखि चिसो घट्नुपर्नेमा यसपाली पहिलो हप्तादेखि नै तापक्रम बढ्न थालेको छ । केही दिनयता देशका धेरैजसो ठाउँमा न्यूनतम र अधिकतम तापक्रम दुवै बढ्दो छ ।

माघ पहिलो हप्ता बितिसक्दा पनि छिटपुटबाहेक हिउँदे वर्षा र हिमपात भएको छैन । हिउँदमा भित्रिएका सबैजसो प्रणाली गण्डकी प्रदेश र त्योभन्दा पश्चिममा मात्रै सीमित भएको मौसमविद्ले बताएका छन् ।

पश्चिममा पनि पर्याप्त पानी परेको छैन । हिउँ परेर सेतै हुनुपर्ने हिलाल माघमा पनि कालै छन् । सामान्यतया माघको तेस्रो हप्तादेखि चिसो घट्नुपर्नेमा यसपटक माघको पहिलो हप्तादेखि नै चिसो घट्न थालेको छ ।

काठमाण्डौ उपत्यकालगायत देशका धेरै ठाउँमा केही दिनदेखि तापक्रम बढ्दो रहेको छ । लामो समयसम्म पानी नपरेको र भारतमा उच्च चापीय प्रणाली रहेकाले नेपालमा तापक्रम बढेको मौसमविद् सञ्जिव अधिकारीले बताउनुभयो ।

न्यून चापीय प्रणालीले बादल ल्याउने, पानी ल्याउने र चिसो बढाउने गर्छ भने उच्च चापीय प्रणालीले तापक्रम बढाउन सहयोग गर्छ ।

जल तथा मौसम पूर्वानुमान महाशाखाले पश्चिम क्षेत्रमा कतै–कतै हल्का वर्षा र उच्च क्षेत्रमा हिमपातको सम्भावना रहेको जनाएको छ । मौसम बदली भएकाले आज धेरैजसो ठाउँमा तापक्रम घट्न सक्ने अनुमान छ । तर यो लामो समयसम्म नरहने मौसमविद्को अनुमान छ ।

यही माघ २२ देखि फागुन ३ गतेसम्म जिल्लाका ११ हजार पाँच सय ५५ जना किशोरीलाई एचपीभी खोप लगाइने भएको छ ।

महिलाको पाठेघरको मुखमा लाग्ने क्यान्सर उन्मूलन गर्न एचपिभी खोप लगाइने प्रदेश जनस्वास्थ्य कार्यालयले जनाएको छ ।जनस्वास्थ्य कार्यालयका प्रमुख घनश्याम सापकोटाका अनुसार यो वर्ष जिल्लाका १० पालिकाका कक्षा ६ देखि १० सम्म अध्ययनरत १० देखि १४ वर्ष उमेर समूहका युवतीलाई एचपीभी लगाइने छ ।

माघ २२ देखि २८ गतेसम्म पहिलो चरणमा छ पालिका र दोस्रो चरणमा फागुन ३ सम्म लगाइनेछ । पहिलो चरणमा छ पालिका र दोस्रो चरणमा चार पालिकामा खोप अभियान चलाइने छ ।खोप लगाउन तीन सय १५ स्वास्थ्यकर्मी, छ सय २६ जना स्वयंसेविका परिचालन गरिएको छभने तीन सय १२ खोप केन्द्र निर्धारण गरिएको छ ।

स्त्रीरोग विशेषज्ञ विजय ओझाका अनुसार एक दिनमा नेपालमा चार जना महिलाको पाठेघरको क्यान्सरबाट मृत्यु हुने गरेकाले किशोरीलाई खोप लगाउँदा भविष्यमा हुने क्यान्सरबाट बच्न सक्ने बताए । ओझाले शारीरिक सम्पर्कमा आउनुभन्दा पहिला खोप लगाउँदा प्रभावकारी हुने भएकाले १० देखि १४ वर्ष उमेर समूहका किशोरी छनोट गरिएको बताए ।

माघ ९ गते बागलुङ

पर्वतको फलेवास नगरपालिका ४ स्थित माटेदेवल जनसहयोग माध्यमिक विद्यालयमा निःशुल्क आँखा शिविर संगै पाठेघर सम्बन्धी स्वास्थ्य शिविर हुने भएको छ ।

सामुदायिक सेवा केन्द्र एंव सामुदायिक प्रहरी सेवा माटेपानी पोखराको आयोजनामा यहि माघ १२ गते गते शनिबारका दिन शिविर आयोजना गरिएको आयोजकले जनाएको छ ।

गण्डकी मेडिकल कलेज पोखरा तथा हिमालय आँखा अस्पत्ताल पोखराको प्राविधिक सहयोगमा निः शुल्क आँखा शिविर र एक दिने महिलाहरुमा पाठेघर सम्बन्धि स्वास्थ्य सेवा शिविर सञ्चालन गर्न लागिएको फलेसाव नगरपालिका वडा नम्बर ४ ले जनाएको छ । आँखाका विरामीको निः शुल्क रुपमा चेकजाँच उपचार संगै मोतिविन्दुको सल्यक्रिया हुने जनाइएको छ ।

बागलुङ माघ ९ गते
बागलुङ नगरपालिकालाई बुधबार एक कार्यक्रमका विच बालमैत्री स्थानीय शासनयुक्त बागलुङ नगरपालिका घोषणा गरीएको छ ।
उपप्रधानमन्त्री तथा सहरी विकास मन्त्री प्रकाशमान सिंहले बुधबार बागलुङ बजारको धौलागिरि बहुमुखी क्याम्पसको प्राङ्गणमा आयोजना गरिएको बालमैत्री नगर घोषणाको उद्घाटन गर्दै बालबालिकाहरुको हकहितको लागि घोषणा कार्यक्रमले चेतना र जागरण फैलाएर बालबालिकाको दिगो भविष्य कसरी निर्माण गर्न सकिन्छ भन्ने बारेमा बहस सृजना गरेर सबै सरोकारवालाहरुलाई जवाफदेही बनाउने बताउनुभयो ।

उपप्रधानमन्त्री सिंहले बालमैत्री अभियानले गुणस्तरीय व्यवहारिक शिक्षा र सिकाईमा बालबालिकाहरुको पहुँच पुर्याउनुको साथसाथै देशले असल नागरिक पाउने बताउनुभयो ।
बागलुङ नगरपालिकाका नगर प्रमुख बसन्त कुमार श्रेष्ठले सबै जनालाई स्वागत गर्नु हुँदै बागलुङ नगरपालिकाका सबै वडाहरुलाई बालमैत्री स्थानीय शासनयुक्त वडा घोषणापछि नगर घोषणा कार्यक्रमलाई उत्सवको रुपमा मनाउन लागेको बताउनुभयो ।

बालबालिकालाई हेर्ने दृष्टिकोण, उहाँहरुलाई गरिने व्यवहार र सबै क्षेत्रमा बालबालिकाको अधिकार सुनिश्चित गर्नको लागि आजको घोषणा कार्यक्रम महत्वपूर्ण कोसे ढुंगा हुने बताउनुभयो ।
२०७९ जेठ ७ गतेको पहिलो कार्यपालिका बैठकले बागलुङ नगरपालिकालाई बालमैत्री स्थानीय शासनयुक्त नगर घोषणा गर्ने निर्णय गरेको थियो ।

घोषणाको उद्घाटन सत्रमा बागलुङ नगरपालिकाका विभिन्न विद्यालयका विद्यार्थीहरुले नृत्य, विज्ञान, कला, संस्कृति झल्कने प्रदर्शनी र झाँकीहरु प्रस्तुत गर्नु भएको थियो भने विभिन्न जातिय समूहद्धारा सांस्कृतिक नाँच र झाँकीहरु प्रस्तुत गरिएको थियो ।

बागलुङको ढोरपाटन नगरपालिका बुर्तिबाङमा जलवायु तथा जैविक विविधता सम्वन्धी सङ्घीय सरकार देखी स्थानीय पालिका स्तर सम्मको अनुगमन तथा अन्तरक्रिया कार्यक्रम मङ्गलबार सम्पन्न भएको हो ।

नेपाल सरकार तथा वन मन्त्रालयको आयोजना ,UNDPGEF को आर्थिक सहयोग तथा कफ्सन नेपाल र स्कलर नेपालको व्यवस्थापनमा ढोरपाटन नगरपालिकामा जैविक विविधता , भू संरक्षण , वातावरण संरक्षण तथा स्थानिय स्तरमा देखिएका समसामयिक समस्याहरूको पहिचान गरी त्यसलाई कसरी समधान गर्न सकिन्छ भन्ने कुरामा अन्तरक्रिया कार्यक्रम भएको हो ।

कार्यक्रममा स्थानीय जनप्रतिनिधि , सरकारवाला , बुद्धिजीवी, समाजको अगुवाइ ,पालिकाका कर्मचारी , विभिन्न सरकारी तथा गैर सरकारी संघ ,संस्थामा आवद्ध व्यक्तिहरू, प्रहरी , सञ्चारकर्मी लगायतको उपस्थितिमा जलवायु तथा जैविक विविधताको रणनिति सम्वन्धी अन्तरक्रिया तथा विभिन्न विषय वस्तुहरूमा छलफल भएको थियो । वि .स २०२४ देखी २०३० सम्ममा वन तथा वातावरण मन्त्रालयमा जल वायु तथा जैविक विविधता सम्बन्धी नयाँ रणनिति ल्याउने उद्देश्यले देश भरका सात वटै प्रदेशमा गएर सल्लाह सुझावहरू सङ्कलन गर्ने नेपाल जैविक विविधताको पुनरावलोकन ,छलफल गरेर २०३० सम्ममा नयाँ रणनिति ल्याउने नेपाल सरकारको लक्ष्य रहेको जनाइएको छ ।

जलवायु तथा जैविक विविधताको रणनिति व्यवस्थापनका श्याम कृष्ण श्रेष्ठले जानकारी दिनु भएको हो । अहिले सम्ममा देशका सात वटा प्रदेशका करिव २८ वटा जिल्ला तथा पालिकामा अनुगमन तथा अन्तरक्रिया कार्यक्रम भएको विष्णु बहादुर नेपालीले जानकारी दिनुभएको हो ।

कार्यक्रमका अवसरमा ढोरपाटन नगरपालिकाका प्रमख प्रशासकीय अधिकृत चिरञ्जीवी घिमिरेले बोल्दै विभिन्न राजनीतिक दलका जनप्रतिनिधि ,बुद्धिजीवी समाजसेवी , समाजका अगुवाइ , विभिन्न सङ्घ ,संस्था , कर्मचारी ,शिक्षक लगायत सबैको सहकार्य र समन्वय नभए सम्म कुनैपनि जैविक विविधताको समानता नहुने र यस पालिकाका सबै सङ्घ संस्था, समाजका अगुवाइ ,विभिन्न राजनीतिक दलका जनप्रतिनिधि लगायत सवै सरकार वाला तथा गैर सरोकारवालाहरूले हातेमालो र सहयोग गर्नुपर्छ भन्नेमा जोड् दिनुभएको हो ।

माघ ५ गते ढोरपाटन

नेपाल राष्ट्रिय शिक्षक सङ्गठन ढोरपाटन नगरको तेश्रो अधिवेशन शनिबार सम्पन्न भएको छ । अधिवेशनबाट किरण पौडेल अध्यक्ष रहेको २३ सदस्य समितिको गठन गरिएको छ ।

नेपाल राष्ट्रिय शिक्षक सङ्गठन ढोरपाटन नगर अध्यक्ष नारायण पौडेलको अध्यक्षतामा आयोजित कार्यक्रमका अवसरमा किरण पौडेल अध्यक्ष, दिपेन्द्र छन्त्याल उपाध्यक्ष, प्रतिभा आचार्य महिला उपाध्यक्ष, विकास गिरी सचिव ,राजु वि.क. कोषाध्यक्ष ,शान्ति पुन सह सचिब, खुमा कुमार पाण्डे सह कोषाध्यक्ष रहेको २३ सदस्य समितिको सहमतिबाट नेतृत्व चयन गरिएको नारायण पौडेलले बताउनु भयो ।

नेपाल राष्ट्रिय शिक्षक संगठन गण्डकी प्रदेश कोषाध्यक्ष ओम बहादुर थापाको प्रमुख आतिथ्यता रहेको कार्यक्रममा थापाले बोल्दै सबै शैक्षिक समस्याहरूको समाधानका निम्ती यथाशीघ्र शिक्षा ऐन जारी हुनुपर्नेमा जोड दिँदै नवगठित समितिलाई शुभकामना मन्तव्य व्यक्तः गर्नुभएको थियो ।

कार्यक्रममा नेपाल राष्ट्रिय शिक्षक सङ्गठन जिल्ला अध्यक्ष गंगा शर्मा, नेकपा एमाले गण्डकी प्रदेश सदस्यहरू टंक प्रसाद पौडेल, लक्ष्मण पुन, नेपाल राष्ट्रिय शिक्षक सङ्गठन गण्डकी प्रदेश सदस्य खिमानन्द आर्चाय लगायतको आतिथ्यता एव्म शुभकामना मन्तव्य रहेको थियो ।

कार्यक्रम निवर्तमान उपाध्यक्ष प्रतिभा आर्चायको स्वागत सचिव निरीश्वर पाण्डेको सञ्चालनमा सम्पन्न भएको थियो ।

सांकेतिक तस्बिर

माघ ३ गते ढोरपाटन
बागलुङको ढोरपाटन नगरपालिका वडा नम्बर ६ मा पिकअप जिप दुर्घटना भएको छ । बिहिबार साँझ गाडीखोलादेखि घैयाखानी जाने क्रममा ग ३ च ३८९ नम्बर पिकअप जिप रातको ८ः३० बजे दुर्घटना भएको जनाईएको हो । दुर्घटनामा १० जना घाइते भएका छन ।
घाइते मध्ये ६३ बर्षिय काजी कामी र ३८ बर्षिय चलदेवी कामीको अवस्था गम्भिर रहेका कारण थप उपचारका लागी रिफर गर्ने तयारी भइरहेको प्रादेशिक अस्पत्ताल बुर्तिबाङका प्रमुख डा. नविन्द्र ढकालले बताउनु भयो ।
घाइतेको उद्धार गरी प्रादेशिक अस्पत्तालमा उपचार भइरहेको इलाका प्रहरी कार्यालय बुर्तिबाङले जनाएके छ । अन्य ८ जनाको अवस्था सामान्य रहेका कारण खतरा मूक्त रहेको र गम्भिर दुई जनाको मासु र छाला च्यापिएको समस्या देखिएका कारण रिफर गर्नुपर्ने अवस्था आएको डा. ढकालको भनाई छ । घटनाको थप विवरण आउन बाँकी रहेको छ ।