यस वर्ष विजयादशमीको साइत भोलि बिहान ११ः५१ बजे उत्तम रहेको छ । नेपाल पञ्चांग निर्णायक विकास समितिका अनुसार बिहान १०ः३४ बजे देवी विसर्जन गरी ११ः५१ बजेको साइतमा मान्यजनबाट देवीको प्रसादका रूपमा टीका लगाउन सकिनेछ । पूर्वी मोहडा गरेर टीका लगाउनुपर्ने पनि समितिले जनाएको छ ।

विजयादशमीका दिन दिनभर टीका लगाउन सकिने भए पनि साइतमै टीका लगाउन चाहनेका लागि यो साइत दिइएको समितिले जनाएको छ । राज्य सञ्चालकले भने समितिले तोकेकै साइतमा मान्यजनबाट टीका, प्रसाद थाप्नुपर्नेछ ।

देवीको प्रसादका रूपमा देशका धेरै भागमा कोजाग्रत पूर्णिमाका दिनसम्म मान्यजनबाट टीका र आशीर्वाद थाप्ने गरिन्छ । केही भागमा भने विजयादशमीका दिनमात्र देवीको प्रसादका रूपमा टीका थाप्ने गरिन्छ ।

समितिले विश्वका विभिन्न देशका लागि स्थानीय समय अनुसार उत्तम साइत सार्वजनिक गरेको छ । भारतमा १०ः४५, अमेरिकाको न्युयोर्कमा ११ः११ को समयमा टीका लगाउन सकिनेछ । अमेरिकाका विभिन्न सहर अनुसार साइतको समय पनि फरक रहेको छ ।

१४ आश्विन २०७९

यस वर्षको मनसुन सरदर मिति भन्दा केही दिन ढिला बाहिरिने सम्भावना रहेको छ। मौसम पूर्वानुमान महाशाखाका अनुसार नेपालमा मनसुन बाहिरिने सरदर मिति अक्टोबर २ हो।

तर, हाल बङ्गालको खाडीमा विकसित भइरहेको न्यून चापीय क्षेत्र उत्तर पश्चिमीतर्फ सर्दै गइरहेकाले नेपालमा अजै मनसुनी वर्षाको सम्भावना रहेको महाशाखाले जनाएको छ। महाशाखाकाअनुसार असोज १८ गते नवमीदेखि नेपालमा पनि न्यून चापीय प्रणालीको प्रभाव पर्ने हुँदा मनसुनी वर्षा सक्रिय हुने सम्भावना छ।

असोज १८ गते नवमीमा देशभर आंशिकदेखि सामान्यतया बदली रहने सम्भावना रहेको छ। त्यसदिन  प्रदेश १, मधेस, वाग्मती र गण्डकी प्रदेशहरूका केही र बाँकी प्रदेशहरूका थोरै स्थानहरूमा मेघ गर्जन चट्याङसहित हल्कादेखि मध्यम वर्षाको सम्भावना छ।

असोज १९ गने टीकाको दिन देशभर सामान्य देखि पूर्णतया बदली रही देशका धेरै स्थानहरूमा मेघ गर्जन चट्याङसहित हल्कादेखि मध्यम वर्षा हुनुको साथै गण्डकी, लुम्बिनी र सुदूरपश्चिम प्रदेशहरूका थोरै स्थानहरूमा भारीदेखि अति भारी वर्षाको पनि सम्भावना रहेको महाशाखाले जनाएको छ।

यी दिनहरूमा देशको पहाडी भू-भागमा पहिरो तथा गेग्रान बहावको जोखिम रहेको, ठूला तथा साना नदी नाला र खोलाहरूमा पानीको सतह बढ्न सक्ने, सडक तथा हवाई यातायात र कृषिलगायतका क्षेत्रहरू प्रभावित हुन सक्ने भएकाले आवश्यक सतर्कता तथा पूर्व तयारी अपनाउन महाशाखाले आग्रह गरेको छ।

बुर्तिबाङ असोज १२ गते
पछिल्लो समय इलाका प्रह्री कार्यालय बुर्तिबाङले चाडपर्व लक्षित अभियान अन्र्तगत विभिन्न स्थानमा चेकिङलाई कडाई गर्दे सचेतना मुलक कार्यक्रम गरेको छ ।
चाडपर्वको समयमा सवारीचालकले यात्रुबाट मनपरि भाडा असुल्ने, क्षमता भन्दा बढि यात्रु चढाउने, प्रयोजन विपरित सवारी हाँक्ने जस्ता गतिविधी बढेको भन्दै प्रहरीले सवारी चेकजाँचमा कडाई गर्दे बुर्तिबाङ वसपार्कमा यात्रु सहायता कक्षको समेत व्यवस्थापन गरीएको हो ।
वडिगाड गाउँपालिका, निसीखोला गाउँपालिका, ढोरपाटन नगरपालिकाका विभिन्न स्थानमा पुगेर यस्तो अभियान सञ्चालन गरीएको अस्थाई ट्राफिक पोष्ट बुर्तिबाङका प्रहरी सहाएक निरीक्षक विशाल परियारले बताए ।
प्रहरीले चाडपर्वको समयमा हुन सक्ने अपराधिक गतिविधीलाई रोक्न नागरीकलाई सचेत बनाउँदै कहिँकतै अपराधिक गतिविधी भएमा सवारी चालकले भाडादर भन्दा बढि रकम असुलीे गरेमा, क्षमता भन्दा बढि यात्रु ओसार्ने जस्त गतिविधी गरेमा सहायता कक्ष वा १०० र १०३ मा फोन गरी जानकारी दिन समेत अपिल गरेको हो ।
कार्यालयका प्रमुख राजेश सर्मा अधिकारी र अस्थाई ट्राफिक पोष्ट बुर्तिबाङका प्रहरी सहाएक निरीक्षक विशाल परियारको कमान्डमा प्रहरीले यस्तो अभियान चलाएको हो ।