बाग्लुङ जिल्लाको निसिखोला गाउँपालिका वडा नं. 2 अर्नाकोट क्षेत्रमा लिफ्टिङ खानेपानी तथा सरसफाइ स्तरोन्नति (WASH) परियोजना अन्तर्गत समुदाय लक्षित क्षमता विकास तालिमहरू सफलतापूर्वक सम्पन्न भएका छन्।
युनिका फाउन्डेसन, नेदरल्यान्ड तथा निसिखोला गाउँपालिकाको आर्थिक सहयोगमा, कर्मफ्लाइट्स फाउन्डेसन नेपालद्वारा समन्वय गरिएको कार्यक्रम नेपाल रेडक्रस सोसाइटी कास्की जिल्ला शाखा मार्फत सञ्चालन गरिएको हो।
परियोजनाअन्तर्गत अर्नाकोट समुदायमा महिनावारी स्वच्छता व्यवस्थापन (MHM), विपद् नक्साङ्कन तथा जोखिम व्यवस्थापन, र आधारभूत प्राथमिक उपचार सम्बन्धी तालिमहरू आयोजना गरिएका थिए। महिनावारी स्वच्छता व्यवस्थापनसम्बन्धी २ दिने तालिमको उद्घाटन नेपाल रेडक्रस सोसाइटी कास्की शाखाका कार्यालय प्रमुख कृष्णप्रसाद कोइरालाको प्रमुख आतिथ्यतामा सम्पन्न भएको थियो।
तालिममा प्रजनन स्वास्थ्य तथा महिनावारी स्वास्थ्यसम्बन्धी सैद्धान्तिक र व्यवहारिक ज्ञान प्रदान गरिएको थियो।
कार्यक्रम व्यवस्थापक कल्पना ज्ञवालीका अनुसार, महिनावारीको समयमा व्यक्तिगत तथा यौनाङ्गको सरसफाइमा ध्यान नदिँदा विभिन्न संक्रमण, यौनजन्य रोग, पाठेघरसम्बन्धी समस्या, आङ खस्ने तथा क्यान्सरसम्मको जोखिम देखिने गरेको पाइन्छ। यी जोखिम न्यूनीकरण गर्न चेतना अभिवृद्धि र सुरक्षित अभ्यास प्रवर्द्धन नै तालिमको मुख्य उद्देश्य रहेको उहाँले बताउनुभयो।
सदरमुकामदेखि टाढा रहेको अर्नाकोट क्षेत्रमा विशेषगरी महिलाहरू सुरक्षित प्याडको अभाव र आर्थिक कठिनाइका कारण असुरक्षित टालाटुली प्रयोग गर्न बाध्य रहेको अवस्थालाई ध्यानमा राख्दै, तालिममा घरमै सुरक्षित र पुनःप्रयोग गर्न मिल्ने प्याड बनाउने सिप समेत सिकाइएको थियो।
खानेपानी उपभोक्ता समितिभित्रका ३० जना महिला तथा किशोरीहरूको सहभागिता रहेको उक्त तालिममा कार्यक्रम व्यवस्थापक कल्पना ज्ञवाली, कर्मफ्लाइट्सका सहजकर्ता निथोई बिक तथा स्थानीय सहजकर्ता सपना कुँवरले सहजीकरण गर्नुभएको थियो।
तालिमको समापन नेपाल रेडक्रस सोसाइटी कास्की शाखाका कोषाध्यक्ष मोहन सिंह खड्काको प्रमुख आतिथ्यतामा सम्पन्न भएको थियो। सहभागीहरूको तर्फबाट करिश्मा बिक र ममता बिकले तालिम अत्यन्त प्रभावकारी भएको प्रतिक्रिया दिँदै, यसले स्वास्थ्य, आत्मविश्वास र सम्मानपूर्वक जीवनयापन गर्न सहयोग पुगेको बताउनुभयो।
यसै परियोजनाअन्तर्गत अर्नाकोट, सिन्देरी, घाम्पु, निन्नेचौर, चौर र खालबाङ क्षेत्रका २४ जना समुदाय सदस्यहरूलाई लक्षित गरी २ दिने विपद् नक्साङ्कन तथा जोखिम व्यवस्थापन तालिम पनि सञ्चालन गरिएको थियो।
त्यसैगरी, २२ जनालाई लक्षित ४ दिने आधारभूत प्राथमिक उपचार तालिम नेपाल सरकारबाट स्वीकृत मापदण्डअनुसार सञ्चालन गरिएको थियो। उक्त तालिममा सबै सहभागी परीक्षा उत्तीर्ण भएका थिए भने उत्कृष्ट सहभागी चामेली घर्ती, रेशम बीके लगायतलाई नेपाल रेडक्रस सोसाइटीद्वारा सम्मान गरिएको थियो।
उक्त तालिमहरूमा निसिखोला गाउँपालिका वडा नं. २ का विद्यालय तथा समुदाय, साथै ढोरपाटन नगरपालिका वडा नं. २, ५ र ७ अन्तर्गतका विद्यालय तथा समुदायका प्रतिनिधिहरूको सहभागिता रहेको थियो, जुन क्षेत्रहरू परियोजनाबाट प्रत्यक्ष प्रभावित छन्।
यसैबीच, अर्नाकोट लिफ्टिङ खानेपानी तथा सरसफाइ स्तरोन्नति परियोजना औपचारिक रूपमा सुरु भइसकेको कर्मफ्लाइट्स फाउन्डेसन नेपालका कार्यक्रम निर्देशक प्रेम बहादुर कुँवरले जानकारी दिनुभएको छ। सोही क्रममा खानेपानी उपभोक्ता समूह, इन्जिनियर तथा प्राविधिकहरू सहित नेपाल रेडक्रस सोसाइटी कास्की, निसिखोला गाउँपालिका र सम्बन्धित सरोकारवालाहरूको संयुक्त बैठकमार्फत परियोजनाको सम्पूर्ण योजना समीक्षा गरिएको निसिखोला गाउँपालिका वडा नं. २ का वडा अध्यक्ष कुबिर बीकेले जानकारी दिनुभयो।
साथै, पम्प हाउससम्म राष्ट्रिय विद्युत् लाइन विस्तारका लागि नेपाल विद्युत् प्राधिकरणसँग समन्वय बैठक समेत सम्पन्न भएको छ।
यी सबै गतिविधिहरूले अर्नाकोट क्षेत्रमा समुदायको एकता, सशक्तीकरण, स्वास्थ्य सचेतना, विपद् तयारी क्षमता तथा दिगो लिफ्टिङ खानेपानी सेवाको सुनिश्चिततामा महत्वपूर्ण योगदान पुर्याउने विश्वास लिइएको छ।
बैँक