बागलुङ । सोमबार ताराखोला गाउँपालिकामा नेपाली कम्युनिष्ट पार्टी नेकपा र राष्ट्रिय जनमोर्चा राजमोको संयुक्त बैठक अर्गलमा सम्पन्न भएको छ ।
नेकपाका गाउँपालिका अध्यक्ष पदम खत्री ‘दिवस’को अध्यक्षतामा सम्पन्न वैठकमा आगामी प्रतिनिधिसभा निर्वाचनलाई लक्षित गर्दै संगठन सुदृढीकरण र परिचालनलाई तीव्र बनाउने निर्णय गरेको छ
बैठकमा नेकपा केन्द्रिय सदस्य तथा बागलुङ क्षेत्र नम्बर २ का संयुक्त उम्मेदवार ज्ञामनाथ गैरे अनिलको प्रमुख अतिथ्यता भएको थियो । उम्मेदवार गैरेले यस पटक क्षेत्र नम्बर २ मा आफ्नो जित सुनिश्चत गर्नका लागि टोल–टोलबाटै परिचालित हुन आवश्यक रहेको बताउनुभएको छ ।
बैठकमा राजमो जिल्ला समिति सदस्य तीर्थसिंह थापाले स्वागत मन्तव्य व्यक्त गर्नुभएको थियो ।
बैठकमा राजमोका समानुपातिक उम्मेदवार बेदिलाल सापकोटा, नेकपाका केन्द्रिय सदस्य नेता फमलाल न्यूरे, ताराखोला गाउँपालिका अध्यक्ष धनबहादुर बिक, नेकपाका केन्द्रिय सदस्यहरु कमल घिमिरे, राजिव घिमिरे, राजमो सचिव भिमलाल पोखरेल तथा नेकपा बागलुङका संयोजक प्रकाश घर्ती लगायतको उपस्थिति रहेको थियो ।
बैठकको औचित्य र महत्वबारे संयोजक प्रकाश घर्तीले प्रष्ट पारेका थिए । बैठकका निर्णयहरू नेकपाका केन्द्रीय सदस्य फमलाल न्यूरे र राजमो सचिव भिमलाल पोखरेलले प्रस्तुत गरेका थिए । साथै गाउँपालिकाको आगामी कार्ययोजना तथा जिम्मेवारीबारे धनबहादुर विक हिमालले जानकारी गराएका थिए ।
कार्यक्रममा उम्मेदवार ज्ञामनाथ गैरे अनिलले पार्टीलाई विजयी बनाउन सबै कार्यकर्ता र समर्थकलाई एकताबद्ध भएर अघि बढ्न आग्रह गरेका थिए ।
बैठकबाट पालिका स्तरीय निर्वाचन परिचालन समिति गठन गर्ने, वडा स्तरीय भेला तथा निर्वाचन परिचालन र निर्वाचन केन्द्र सम्पर्क कार्यालय स्थापना गर्ने, टोल केन्द्रित कार्यक्रम सञ्चालन गर्ने, युवा तथा महिला परिचालन समिति गठन गर्ने, उम्मेदवार परिचय तथा भेटघाट कार्यक्रम तय गर्ने, मतदाता शिक्षा, प्रशिक्षण तथा अध्ययन समिति गठन गर्ने तथा कार्यालय सम्पर्क, समन्वय र परिचालन समिति गठन गर्ने निर्णय गरिएको छ ।
बैठकले संगठनलाई मजबुत बनाउँदै जनस्तरसम्म पहुँच विस्तार गर्ने रणनीति अवलम्बन गर्ने निष्कर्ष निकालेको छ ।
