बुर्तिबाङ, जेठ २२ — बागलुङको ढोरपाटन नगरपालिका कार्यालयमा उच्च अदालत पोखरा, बागलुङ इजलासका न्यायाधीशहरूसँग न्यायिक सेवा, न्याय निरूपण तथा मेलमिलापसम्बन्धी अन्तरक्रिया कार्यक्रम सम्पन्न भएको छ।
कार्यक्रममा उच्च अदालत पोखरा, बागलुङ इजलासका मुख्य न्यायाधीश नातीबाबु लमिछाने, माननीय न्यायाधीश सरला कुमारी पाण्डे, डण्डपाणी शर्मा तथा बालकृष्ण गैरे को सहभागिता रहेको थियो।
त्यसैगरी ढोरपाटन नगरपालिकाका कार्यवाहक नगर प्रमुख धनबहादुर कायत कल्याण, प्रमुख प्रशासकीय अधिकृत चिरञ्जीवी घिमिरे, वडा अध्यक्षहरू, जनप्रतिनिधि, शिक्षक, विद्यार्थी, अभिभावक तथा विभिन्न क्षेत्रका सरोकारवालाहरूको उपस्थिति रहेको थियो।
कार्यक्रमलाई सम्बोधन गर्दै कार्यवाहक नगर प्रमुख धनबहादुर कायत कल्याणले साना तथा सामान्य प्रकृतिका विवादहरू स्थानीय स्तरमै समाधान गर्न सके समय र खर्च दुवैको बचत हुने बताउनुभयो। उहाँले स्थानीय तहबाट समाधान हुन सक्ने विषयमा अनावश्यक रूपमा जिल्ला वा माथिल्लो निकायसम्म पुग्नुभन्दा मेलमिलाप र सहमतिका माध्यमबाट समाधान खोज्नुपर्नेमा जोड दिनुभयो।
अन्तरक्रियाका क्रममा सहभागीहरूले न्याय सम्पादन प्रक्रिया, मेलमिलापको प्रभावकारिता, पीडितले न्याय प्राप्त गर्ने प्रक्रिया तथा न्यायाधीशहरूले दबाब र प्रभावबाट मुक्त रही कसरी निष्पक्ष निर्णय गर्छन् भन्ने विषयमा जिज्ञासा राखेका थिए। त्यसको जवाफ दिँदै न्यायाधीशहरूले संविधान, कानुन, प्रमाण तथा स्थापित न्यायिक सिद्धान्तका आधारमा निष्पक्ष रूपमा न्याय सम्पादन हुने स्पष्ट पारे।
कार्यक्रममा न्यायपालिकाप्रति नागरिकको विश्वास अभिवृद्धि गर्ने, स्थानीय स्तरमा विवाद समाधानलाई प्रोत्साहन गर्ने तथा न्यायमा आम नागरिकको पहुँच सहज बनाउने विषयमा समेत छलफल भएको थियो। सहभागीहरूले यस्ता अन्तरक्रियात्मक कार्यक्रमले न्यायिक प्रणालीबारे जनचेतना अभिवृद्धि गर्न र न्यायप्रतिको विश्वास मजबुत बनाउन महत्वपूर्ण योगदान पुर्याउने विश्वास व्यक्त गरेका थिए।
