बुर्तिबाङ, बागलुङ । भ्रष्टाचार नियन्त्रण तथा सुशासन प्रवर्द्धन सम्बन्धी अन्तरक्रिया कार्यक्रम बिहीबार बुर्तिबाङमा सम्पन्न भएको छ । अख्तियार दुरुपयोग अनुसन्धान आयोग को कार्यालय पोखराको आयोजनामा ढोरपाटन नगरपालिकाका जनप्रतिनिधि, कर्मचारी, वडा तहका कर्मचारी, शिक्षक तथा विद्यालय व्यवस्थापन समितिका पदाधिकारीबीच कार्यक्रम आयोजना गरिएको हो ।
कार्यक्रमलाई सम्बोधन गर्दै आयोगको कार्यालय पोखराका प्रमुख डा. नारायण प्रसाद रेग्मी ले बढ्दो भ्रष्टाचार तथा आयोगमा आउने विभिन्न उजुरीलाई आधार मानेर स्थानीय तहमा सुशासन प्रवर्द्धनका लागि यस्ता कार्यक्रम सञ्चालन गरिएको बताउनुभयो । उहाँका अनुसार स्थानीय तहमा उजुरीको संख्या बढ्दो रहेको र सम्बन्धित निकायबाट समयमै जवाफ तथा आवश्यक कागजात उपलब्ध नगराउँदा अनुसन्धान तथा फर्छ्योट प्रक्रियामा समस्या देखिने गरेको छ ।
उहाँले गत आर्थिक वर्षबाट जिम्मेवारी सरी आएका ८ हजार ४७२ सहित चालु आर्थिक वर्षमा २८ हजार ५५४ गरी कुल ३७ हजार २६ उजुरी दर्ता भएको जानकारी दिनुभयो । तीमध्ये २९ हजार ३ वटा उजुरी फर्छ्योट भएको र ९४७ वटा उजुरी विस्तृत अनुसन्धानमा रहेको बताइएको छ । साथै आयोगको कार्यालय पोखराले आर्थिक वर्ष २०७०/०७१ देखि हालसम्म १० हजार १९४ उजुरी फर्छ्योट गरिसकेको जनाएको छ ।
कार्यक्रममा बागलुङ जिल्लामा गत वर्षका १३ सहित हालसम्म कुल १०४ उजुरी दर्ता भएको उल्लेख गर्दै ४८ वटा उजुरी फर्छ्योट भएको तथा ५६ वटा बाँकी रहेको जानकारी दिइयो । जिल्लामा सबैभन्दा बढी उजुरी बागलुङ नगरपालिका मा, दोस्रोमा गल्कोट नगरपालिका र तेस्रोमा ढोरपाटन नगरपालिका मा रहेको जनाइएको छ । ढोरपाटन नगरपालिकामा गत आर्थिक वर्षका ६ र चालु आर्थिक वर्षका ५ गरी ११ उजुरी दर्ता भएकामध्ये ६ वटा उजुरी फर्छ्योट हुन बाँकी रहेको जानकारी दिइयो ।
कार्यक्रममा धन बहादुर कायत ले स्थानीय सरकारलाई पारदर्शी र सुशासनयुक्त बनाउन कर्मचारी, जनप्रतिनिधि तथा उपभोक्ता समितिसहित सबै पक्ष जिम्मेवार बन्नुपर्ने बताउनुभयो । गैरजिम्मेवार कार्य गर्ने जोसुकै कानुनी दायरामा आउनुपर्नेमा उहाँले जोड दिनुभयो ।
ढोरपाटन नगरपालिकाका प्रमुख प्रशासकीय अधिकृत चिरञ्जिवी घिमिरे को स्वागत मन्तव्य रहेको कार्यक्रमको सहजीकरण आयोगका नापी अधिकृत उदय पराजुली ले गर्नुभएको थियो ।
