१८ मंसिर, बागलुङ । बागलुङमा जिप दुर्घटना हुँदा आठ जना घाइते भएका छन् ।

बागलुङ नगरपालिका–८ सिगाना सेरामा बिहीबार दिउँसो साढे ४ बजे बरेङबाट बागलुङ बजारतर्फ आउँदै गरेको ग ३ च ४८३४ नम्बरको जिप दुर्घटनामा परेको हो ।

 मंसिर १७ गते

बागलुङको तमानखोला गाउँपालिकाले आर्थिक बर्ष २०८२÷०८३ को प्रथम चौमासिक सम्म भए गरेका कार्यक्रम, बजेट र लक्ष्य निर्धारणको सन्दर्भमा बुधबार समीक्षा गरेको छ ।

गाउँपालिका अध्यक्ष जोक लाल बुढाको अध्यक्षतामा आयोजित कार्यक्रममा जनप्रतिनिधि, कर्मचारीको उपश्थितीमा विषयगत शाखाबाट प्रथम चौमासिक सम्म भएका योजना, सम्पादित कार्यक्रम, कार्यक्रमको सान्दर्भिकता र भावी  लक्ष्य सहितको प्रतिवेदन प्रस्तुत गरिएको छ ।

पालिकाले प्रत्यक चौमासिक र वार्षिक रुपमा विषयगत शाखाबाट भइरहेका कार्यसम्पादन, समस्या, चुनौती सम्भावना र भावी लक्ष्यका विषयमा समीक्षा गर्दे अगाडि बढ्दै आइरहेको छ । गाउँपालिकाले दिने सेवा प्रवाह र पालिकाले लिएको लक्ष्यलाई सफल पार्न निती विधी र नागरीक मैत्री भएर सेवा प्रवाह गर्न गाउँपालिका अध्यक्ष जोकलाल बुढाले सुझाब दिनुभयो ।

कार्यक्रममा प्रमुख प्रशासकीय अधिकृत अमित परियार लगायत जनप्रतिनिधि, विषयगत शाखाका प्रमुख , कर्मचारी लगायतको सहभागिता रहेको थियो ।

सामाजिक सञ्जालमा केही दिनदेखि बिरामी आमालाई छोराबुहारीले चिहानमा जिउँदै छाडेको दावीसहित गरिएको प्रचारबाजी पूर्ण रूपमा असत्य रहेको खुलेको छ ।

चिहानमा छाडिएकाे भनिएकी महिला बागलुङको तमानखोला गाउँपालिका– १ निवासी ५० वर्षीया कृष्णकुमारी छन्त्याल रहेकी छन्। सामाजिक सञ्जालमा प्रचार भएजस्तो उनका छोराबुहारी छैनन् । उनकी एक छोरीमात्र छन् । छोरी जमुना छन्त्यालका अनुसार उनी १५ वर्षदेखि मनोरोगी बिरामी हुन्।

मंसिर ८ गते राति करिब २ बजे काठमाडौँ महानगरपालिका–२६, रानीवारीस्थित घरबाट बाहिर निस्किएकी कृष्णकुमारी हराएकी थिइन्। छोरीले आमाको खोजीका लागि विभिन्न स्थानमा रिपोर्टसमेत गरेकी थिइन्। तर सामाजिक सञ्जालमा भने झुठो अफवाह फैलाइएको थियो ।

‘आमाका छोराबुहारी कोही छैन म मात्र एक्ली छोरी हो, आमा हराएपछि हामीले अहोरात्र खोजिरहेका थियौँ। मिडिया र सामाजिक सञ्जालमा झूटो कुरा बनाइयो, र परिवारलाई बदनाम गरियो,’ छोरी छोरी जमुनाले गुनासो पोखिन्। कृष्णकुमारीलाई कीर्तिपुरस्थित मसानघाट नजिकै एक्लै भेटिएपछि स्थानीयले उद्धारका लागि जानकारी गराएका र मानवसेवा आश्रमले उद्धार गरी किर्तिपुर नगरपालिका र कीर्तिपुर अस्पतालको सहकार्यमा उनको उपचार सुरू गरिएको थियो । उद्धार पश्चात उनलाई १२ घन्टा इमर्जेन्सीमा राखी निगरानी गरिनुका साथै २४ घन्टासम्म हाई डिपेन्डेन्सी युनिटमा राखि उपचार गरिएको थियो ।

हाल उनलाई वार्डमा सारिएको र स्वास्थ्य अवस्था सुधारोन्मुख रहेको कीर्तिपुर अस्पतालले जनाएको छ। चिकित्सकका अनुसार उनको शरीरमा गम्भीर भित्रि समस्या केही नभई मानसिक स्वास्थ्यसम्बन्धी समस्या मात्र देखिएको हो । मानवसेवा आश्रमले उनको परिवारसँग सम्पर्क स्थापित भएकाले केही दिनमै पारिवारिक पुनर्मिलन गरिने जानकारी दिएको छ ।

बागलुङको बडिगाड गाउँपालिका–२ खर्बाङ स्थित त्रिभुवन माध्यमिक विद्यालयले यही मंसिर २१ देखि २८ गतेसम्म श्रीमद्भागवत धन–धान्याचल सप्ताह ज्ञान महायज्ञ संचालन गर्ने भएको छ । त्रिभुवन माविले व्यवस्थित बहुप्राबिधिक शिक्षालयका रुपमा विकास गर्न र छात्रावास निर्माणका लागि महायज्ञ संचालन गर्ने भएको हो ।

मंगलबार बागलुङमा पत्रकार सम्मेलन गरि विद्यालयले महायज्ञको बारेमा जानकारी गराएको छ । विद्यालय व्यवस्थापन समितिका अध्यक्ष विष्णु भुषालले पछिल्लो समय विद्यार्थीको आकर्षण बढ्दै गएपछि प्राबिधिक शिक्षालाई प्राथमिकता दिनु पर्ने अवस्था आएको बताउनुभयो । अहिले बाली विज्ञान पढाई हुँदै आएको भन्दै अन्य विषय पनि पठनपाठन गर्नु पर्ने आवश्यकता देखिएको उनको भनाइ छ ।

यहाँ हाल एक हजार १८७ जना विद्यार्थीले अध्ययन गर्दै आएका छन् । यस विद्यालयमा सामान्य परिवारका विद्यार्थी पढ्ने भन्दै धेरैले छात्रावासमै बस्न चाहने उनको भनाइ छ । अहिले सामान्य रुपमा छात्रावास संचालन गरे पनि व्यवस्थित गर्न नसकिएको अध्यक्ष भुषालले बताउनुभयो । महायज्ञ पश्चात संकलन भएको रकमले व्यवस्थित छात्रावासका लागि पूर्वधार निर्माण गरिने उहाँको भनाइ छ ।

अध्यक्ष भुषालले भन्नुभयो ‘त्रिभुवन माध्यमिक विद्यालय जिल्लामै उत्कृष्ट छ, तर अझै पनि धेरै आवश्यकताहरु छन्, ति पूरा गर्नका लागि हामीहरुसँग स्रोत छैन, अहिले पनि सीमित दरबन्दी मात्रै छ, तर हामीहरुले विभिन्न स्रोतबाट शिक्षक कर्मचारी राखेर काम गरि रहेका छौँ, छात्रावास व्यवस्थित गर्ने, बहुप्रबिधिक शिक्षालयका रुपमा विकास गर्ने उद्देश्यले महायज्ञ आयोजना गरेका हौँ ।”

महायज्ञबाट रु पाँच करोड संकलन गर्ने लक्ष्य लिएको अध्यक्ष भुषालले बताउनुभयो । महायज्ञ सुरु नहुँदै सहयोग आउन थालेको उहाँ बताउँनुहुन्छ । महायज्ञ सम्पन्न गर्नका लागि रु करिब ५० लाख खर्च हुने अनुमान गरिएको छ ।

 गत मंसिर १ गतेदेखि विद्यालयमै छात्रावास सञ्चालन गरेर कक्षा १० को पठन पाठनलाई व्यवस्थित गर्न थालेको ढोरपाटन नगरपालिका ४ स्थित प्रकाश माध्यमिक विद्यालयलाई न्यानो सिरक हस्तान्तरण गरिएको छ ।

चिसो मौसममा विद्यार्थीलाई न्यानोबाट जोगाउने उद्देश्य सहित ढोरपाटन नगरपालिका ५ निवासी समाजसेवी भिम कुमारी क्षेत्रीको सक्रियतामा आर्थिक अभियान सङ्कलन गरेर सिरक उपलब्ध गराइएको जनाइएको छ ।

विद्यालयका अभिभावक स्थानीय शिव संक कार्की, स्थानीय युवा हेमन्त गोतामे लगायतको पहलमा स्वदेश तथा विदेशमा रहेका यूवाहरुको सक्रियतामा आर्थिक सङ्कलन गरेर करिब पचास हजार रुपैयाँ बराबरको सिरक उपलब्ध अभियन्ता भिमकुमारी क्षेत्रीले बताउनु भयो । कार्यक्रममा प्रमुख अतिथिको रुपमा रहनु भएको दिपेन्द्र श्रेष्ठले बोल्दै विद्यालय सञ्चालनमा ल्याएको छात्रावासलाई थप व्यवस्थित बनाउन र विद्यार्थीलाई न्यानोमा बसेर अध्ययन गर्नका निम्ती यस्तो सहयोग मुलक कार्यक्रमले थप सहयोग गर्ने बताउनु भयो ।

कार्यक्रममा कर्मभूमि फाउन्डेसनका निर्देशक कमल भुसाल, रिलायबल लाइफ इन्स्योरेन्स बुर्तिबाङ शाखा प्रमुख योगेन्द्र परियार लगायतको मन्तव्य रहेको थियो । विद्यालयका प्रध्यानाध्यापक राम बहादुर रानाले बोल्दै विद्यालयले थालेको अभियानमा साथ दिएकोमा सामाजिक अभियन्ता प्रति धन्यबाद ज्ञापन गर्दे आगामी दिनमा पनी यस्ता सहयोग हातहरू फैल्याएर अगाडी बढ्न आव्हान गर्नुभयो ।

कार्यक्रम विद्यालय व्यवस्थापन समिति जेष्ठ सदस्य हिरा बहादुर खत्रीको अध्यक्षता, शिक्षक मिरा सुनारको स्वागत शिक्षक खिम बहादुर पुनको सञ्चालनमा सम्पन्न भएको हो ।

बुर्तिबाङ मंसिर १४ गते बुर्तिबाङ स्थित उत्तर गंगा माध्यमिक विद्यालयको प्राङ्गणमा भएको ढोरपाटन नगरपालिका स्तरीय ७ औँ राष्ट्रपती रनिङ शिल्ड प्रतियोगिता शनिबार सम्पन्न भएको छ ।

विभिन्न २२ इभेन्ट सहित गत बिहीबार देखि सुरु भएको प्रतियोगिताबाट उत्तर गंगा माध्यमिक विद्यालयले विभिन्न इभेन्ट हात पार्दै प्रथम स्थान हासिल गर्न सफल भएको छ । विद्यालयले ७ स्वर्ण, ४ रजत र २ काश्य गरी कुल १३ पदक हात पार्न सफल भएको छ ।

लगातार ३ वर्षसम्म विभिन्न इभेन्टमा विजेता बनेको विद्यालयले रनिङ शिल्ड आफ्नो पोल्टामा पार्न सफल भएको हो । दिर्तिय हुने सरस्वती माध्यमिक विद्यालय सुकुरदुङ ले ५ स्वर्ण, ४ रजत र २ कास्य सहित ११ पदक हात पारेको हो । तिर्तिय स्थानमा भुजि माध्यमिक अधिकारी चौर हुन सफल भएको छ ।

विद्यालयले ४ स्वर्ण पदक लिएको हो । कुल १४ माध्यमिक विद्यालयको सहभागिता रहेको प्रतियोगिता तर्फ छात्र छात्रा भलिवल, ट्रयाक डौड, फिल्ड गरी २२ इभेन्ट सम्पन्न गरिएको हो ।

कार्यक्रम मर्यादित रुपमा सम्पन्न भएको कार्यक्रम संयोजक किरण पौडेलले जानकारी दिनुभयो ।