सामाजिक सञ्जालमा केही दिनदेखि बिरामी आमालाई छोराबुहारीले चिहानमा जिउँदै छाडेको दावीसहित गरिएको प्रचारबाजी पूर्ण रूपमा असत्य रहेको खुलेको छ ।
चिहानमा छाडिएकाे भनिएकी महिला बागलुङको तमानखोला गाउँपालिका– १ निवासी ५० वर्षीया कृष्णकुमारी छन्त्याल रहेकी छन्। सामाजिक सञ्जालमा प्रचार भएजस्तो उनका छोराबुहारी छैनन् । उनकी एक छोरीमात्र छन् । छोरी जमुना छन्त्यालका अनुसार उनी १५ वर्षदेखि मनोरोगी बिरामी हुन्।
मंसिर ८ गते राति करिब २ बजे काठमाडौँ महानगरपालिका–२६, रानीवारीस्थित घरबाट बाहिर निस्किएकी कृष्णकुमारी हराएकी थिइन्। छोरीले आमाको खोजीका लागि विभिन्न स्थानमा रिपोर्टसमेत गरेकी थिइन्। तर सामाजिक सञ्जालमा भने झुठो अफवाह फैलाइएको थियो ।
‘आमाका छोराबुहारी कोही छैन म मात्र एक्ली छोरी हो, आमा हराएपछि हामीले अहोरात्र खोजिरहेका थियौँ। मिडिया र सामाजिक सञ्जालमा झूटो कुरा बनाइयो, र परिवारलाई बदनाम गरियो,’ छोरी छोरी जमुनाले गुनासो पोखिन्। कृष्णकुमारीलाई कीर्तिपुरस्थित मसानघाट नजिकै एक्लै भेटिएपछि स्थानीयले उद्धारका लागि जानकारी गराएका र मानवसेवा आश्रमले उद्धार गरी किर्तिपुर नगरपालिका र कीर्तिपुर अस्पतालको सहकार्यमा उनको उपचार सुरू गरिएको थियो । उद्धार पश्चात उनलाई १२ घन्टा इमर्जेन्सीमा राखी निगरानी गरिनुका साथै २४ घन्टासम्म हाई डिपेन्डेन्सी युनिटमा राखि उपचार गरिएको थियो ।
हाल उनलाई वार्डमा सारिएको र स्वास्थ्य अवस्था सुधारोन्मुख रहेको कीर्तिपुर अस्पतालले जनाएको छ। चिकित्सकका अनुसार उनको शरीरमा गम्भीर भित्रि समस्या केही नभई मानसिक स्वास्थ्यसम्बन्धी समस्या मात्र देखिएको हो । मानवसेवा आश्रमले उनको परिवारसँग सम्पर्क स्थापित भएकाले केही दिनमै पारिवारिक पुनर्मिलन गरिने जानकारी दिएको छ ।
