बागलुङ, बुर्तिबाङ
रक्तिम साँस्कृतिक अभियान केन्द्रिय समितीको आयोजनामा “विशेष रक्तिम साँझ–२०८३” शनिबार बुर्तिबाङमा सम्पन्न भएको छ।
गत जेठ १६ गते काठमाडौंबाट सुरु गरिएको उक्त विशेष कार्यक्रमले कला, साहित्य र राष्ट्रिय पहिचानलाई एउटै मञ्चमा जोड्ने उद्देश्यसहित देशका विभिन्न स्थानमा कार्यक्रम सञ्चालन गर्दै आएको छ।
रक्तिम साँस्कृतिक अभियानका केन्द्रीय सचिब सहविन अर्गेजाका अनुसार कार्यक्रमले राष्ट्रिय कला–संस्कृतिको संरक्षण र प्रवर्द्धनमा योगदान पुर्याउने अपेक्षा गरिएको छ।
“राष्ट्रियताको रक्षा, रक्तिमको सदिच्छा” भन्ने मूल नारासहित आयोजित कार्यक्रममा परम्परागत तथा आधुनिक सिर्जनालाई एकै ठाउँमा प्रस्तुत गर्दै सांस्कृतिक एकताको सन्देश प्रवाह गरिएको आयोजकले जनाएको छ।
कार्यक्रममा सांगीतिक प्रस्तुति, नृत्य, नाटक तथा विविध सांस्कृतिक झाँकीहरू प्रस्तुत गरिएका थिए।
बुर्तिबाङमा आयोजित कार्यक्रममा बागलुङ जिल्लाका विभिन्न स्थानबाट नेता, कार्यकर्ता तथा शुभेच्छुकहरूको उल्लेखनीय सहभागिता रहेको थियो।
विशेषगरी युवा सर्जक तथा कलाकारहरूलाई आफ्नो प्रतिभा प्रदर्शन गर्ने अवसर प्रदान गरिएको कार्यक्रममा नेपाली मौलिक कला, भाषा र संस्कृतिको संरक्षणमा जोड दिइएको थियो।
देशको समसामयिक अवस्था र सामाजिक यथार्थलाई झल्काउने नृत्य तथा कलात्मक प्रस्तुतिले दर्शकको ध्यान आकर्षित गरेको थियो।
कार्यक्रममा देशका विभिन्न जिल्लाबाट आएका कलाकारहरूले आफ्नो कला प्रस्तुत गर्दै राष्ट्रिय संस्कृति संरक्षण र प्रवर्द्धनमा रक्तिम साँस्कृतिक अभियानको सक्रिय भूमिकालाई थप मजबुत बनाएका थिए। देशका विभिन्न सहरमा कार्यक्रम जारी रहेको छ ।
