जेठ २७ गते, बागलुङ ।
बागलुङको तमानखोला गाउँपालिका–६ भित्रिवनमा नवनिर्मित झोलुङ्गे पुलको उद्घाटन गरिएको छ । कादुरी एग्रिकल्चर एण्ड एशोसियसन, ब्रिटिस गोर्खाज नेपालद्वारा निर्माण गरिएको उक्त पुलको एक कार्यक्रमकाबीच तमानखोला गाउँपालिकाका अध्यक्ष जोकलाल बुढाले उद्घाटन गर्नुभएको हो ।
भित्रिवन–नर्जा जोड्ने ठुलाचौर खोलामा निर्माण गरिएको उक्त पुल ७६ मिटर लामो रहेको छ । वडा कार्यालय जाने बाटोमा रहेको खोलामा पुल निर्माण भएपछि स्थानीय नागरिकलाई आवतजावतमा सहज हुने भएको छ ।
पुल निर्माणका लागि २०७७ सालमा सिडिआर (विस्तृत अध्ययन) सम्पन्न गरी २०८० सालदेखि निर्माण कार्य सुरु गरिएको थियो । कादुरी संस्थाको आर्थिक तथा प्राविधिक सहयोगमा पुल निर्माण सम्पन्न भएको कादुरी अफिसका प्रोजेक्ट म्यानेजर इन्जिनियर अवधनारायण माझीले जानकारी दिनुभयो ।
उद्घाटन कार्यक्रममा गाउँपालिका अध्यक्ष जोकलाल बुढाले पुल निर्माणले स्थानीय पूर्वाधार विकासमा महत्वपूर्ण योगदान पुगेको बताउनुभयो । उहाँले नागरिकको आवश्यकता र समस्यालाई मध्यनजर गर्दै सहयोग गरेको भन्दै कादुरी संस्थाको टोलीलाई धन्यवाद समेत व्यक्त गर्नुभयो ।
कार्यक्रममा गाउँपालिका उपाध्यक्ष हिराकुमारी छन्त्याल, प्रमुख प्रशासकीय अधिकृत अमित परियार, वडा अध्यक्ष चित्रबहादुर छन्त्याललगायत जनप्रतिनिधि तथा स्थानीय नागरिकको सहभागिता रहेको थियो ।
