लोकेन्द्र निरासी ,बुर्तिबाङ
जातीय विभेद तथा छुवाछुत उन्मुलन राष्ट्रिय दिवसको अवसरमा निसीखोलामा जात व्यवस्था विरुद्ध जनचेतनामूलक कार्यक्रम सम्पन्न भएको छ ।
निसीखोला गाउँपालिकाको समन्वय र निसीखोला दलित संजाल वडा नं. २ को आयोजनामा उक्त कार्यक्रम सम्पन्न भएको हो । उक्त कार्यक्रममा निसीखोला गाउँपालिकाका अध्यक्ष सूर्य बहादुर घर्ती मगरको प्रमुख आतिथ्यता रहेको थियो । प्रमुख अतिथि घर्तीले कार्यक्रममा बोल्दै एक्काइसौं शताव्दीमा पनि जातीय विभेद गर्नु निन्दनीय कार्य भएकाले सबै मिलेर यसको अन्त्य गर्नुपर्ने बताउनु भएको थियो ।
उहाँले नेपालको कानुनले जातीय विभेदलाई दण्डनीय अपराध घोषित गरिसकेकाले कानुनलाई स्थानीय तहबाट समेत सशक्त रुपमा कार्यान्वयन गरी छुवाछुत तथा जातीय विभेदको अन्त्य गर्नुपर्ने बताउनु भयो । कार्यक्रममा थप बोल्दै उहाँले आफ्नो कार्यकालमा निसीखोला गाउँपालिकाभित्र हुने विवाह, भोजभतेर, शुभकार्य लगायत विभिन्न कार्यहरुमा हुने दुईओटा चुलोलाई अन्त्य गर्ने बताउनु भयो । छुवाछुत अन्त्यको लागि गाउँकार्यपालिकामा आवश्यक निर्णय गरी कार्यान्वयन गरिने बताउनु भयो । उहाँले मानिस सबै समान भएकाले सबैले एकअर्काको सहअस्तित्वलाई स्वीकार्दै समतामूलक समाज निर्माण गर्नुपर्ने बताउनु भयो ।
त्यसैगरी कार्यक्रममा विशिष्ट अतिथि एवं निसीखोला गाउँपालिका वडा नं. २ का वडाअध्यक्ष कुबिर वि.क., दलित अधिकारकर्मी लोकेन्द्र सुनार, अशोक वि.क., नेकपा माओवादी केन्द्रका केन्द्रिय सदस्य निल बहादुर पुन त्यसैगरी अतिथिहरु नेपाली काँग्रेसका भविन्द्र कुँवर, दलित संजाल निसीखोलाका अध्यक्ष रोशन वि.क., दलित अगुवा ईद बहादुर रसाइली, ठग बहादुर वि.क., अनिल विश्वकर्मा, कुशल स्मिथ, मंगोल नेशनल अर्गनाइजेशनकी मिनु पुन, आयुष विश्वकर्मा लगायतले बोल्नुभएको थियो । कार्यक्रममा बोल्ने वक्ताहरुले छुवाछुत तथा जात व्यवस्था देशकै प्रमुख समस्याको रुपमा रहेको, राज्यले कानुनको उचित कार्यान्वयन गर्न नसकेको, जातीय विभेदबाट दलित समुदाय अपमानित र पीडित बन्न बाध्य भएको, राज्यका हरेक निकायमा दलित समुदायको अत्यन्तै न्युन सहभागिता रहेको, जातीय विभेद र अपराधका घटनाहरु बढ्दै जाँदा राज्यको ध्यान नगएको, बेपत्ता भएका दिलीप वि.क. र अन्तरजातीय विवाहको कारण प्रभात बस्यालले न्याय पाउन नसकेको, राज्यले जातीय विभेद तथा छुवाछुत उन्मुलन राष्ट्र घोषणा गरेको १८ वर्ष पुग्दासम्म अझै पनि जातीय विभेदका घटनाहरु झनझन बढ्दै गएको लगायतका विषयमा बोलेका थिए ।
त्यसैगरी वक्ताहरुले धर्म संस्कार र संस्कृतिमा भएका गलत प्रथाहरुको अन्त्य गर्नुपर्ने, दलित समुदायमाथि हुने विभेदको अन्त्य गर्न राज्यका निकायहरु गम्भीर बन्नुपर्ने, शिक्षा र चेतनामूलक कार्यक्रमहरु संचालन गर्नुपर्ने, सबैमा सम्मानजनक मानवीय व्यवहारको अभिवृद्धि गर्नुपर्ने, छुवाछुत तथा जातीय विभेद गर्नेलाई कडाभन्दा कडा कार्वाही गरिनुपर्ने, दलितहरु शिक्षित र संगठित बन्नुपर्ने लगायतका विषयमा जोड दिएका थिए ।
कार्यक्रममा प्लेकार्ड सहितको नारा जुलुस र र्याली अन्तरजातिय प्रेम सम्बन्धका कारण वेपक्त भनियका दिलिप वि.क र म्याग्दीका प्रभात बोसेलको रिहाईको माग गर्दै बुर्तिबाङ देखि भल्कोटसम्म बाइक र्याली समेत सम्पन्न गरिएको थियो ।
त्यसैगरी उक्त कार्यक्रमको अवसरमा प्रमुख अतिथि, विशिष्ट अतिथि र दलित अधिकारकर्मीहरुलाई कदरपत्रले सम्मान गरिएको थियो ।
निसीखोला दलित संजाल वडा नं. २ का अध्यक्ष विराज वि.क.को अध्यक्षता रहेको उक्त कार्यक्रममा संजालका सचिव ओम बहादुर रसाइलीको स्वागत मन्तव्य रहेको थियो भने कार्यक्रमको संंचालन निसीखोला दलित संजालका उपाध्यक्ष एवं संचारकर्मी विनोद विश्वकर्माले गर्नुभएको थियो ।
