निसी फाल्गुन ९
निसीखोला ५ का सागर उमेरले सानै छन तर गाउँमा केही उद्यम गर्नुपर्छ भन्ने मान्यता सहित लाखौँ रकम लगानी गरेर उद्योग सञ्चालनमा व्यस्त बन्दै गएका छन । निसीखोला गाउँपालिका ५ निसीका २१ बर्षिय सागर विश्वकर्मा गाउँमा आफनै दाजुभाई संगै सावुन उत्पादन गर्ने र जुत्ता चप्पल उत्पादन गर्ने उद्योग खोलेको दुई बर्ष हुन थाल्यो ।
गाउँमै केही गर्नुपर्छ भन्ने मान्यता सहित लाखौँ रकम खर्च गरेर आर.डि.एस सोप इन्डष्ट्रिज नामक संस्था स्थापना गर्दे पछिल्लो समय लुगाधुने, नुहाउने सावुन भाँडा धुने सावुन, सरफ तथा जुत्ता चप्पल उत्पादन गर्नमा उनिहरु व्यस्त देखिन्छन ।
भारत तथा देशका विभिन्न स्थानबाट तालिम लिएर अनुभव संगै व्यवसायमा होमीएका उनिहरुले भारत तथा देशका विभिन्न स्थानबाट कच्चा पदार्थ लिएर सामान उत्पादन गर्दे आएका हुन ।
आफु सहित दाई र भाइको समेत साथमा सुरु गरेको व्यवसायले यतिवेला उनिहरुले उत्पादन गरेको वस्तुले बजार माग थेग्नै मुस्किल छ । बागलुङको ढोरपाटन नगरपालिका, निसीखोला, तमानखोला , वडिगाड गाउँपालिका तथा रुकुम पूर्व र पश्चिम सम्मका व्यवसाहीले उद्योगबाट उत्पादित सामान खरिद गर्न थालेपछि आफुहरुलाई बजार माग थेग्नै मुस्किल परेको उनको भनाई छ । बाहिरबाट कच्चा पदार्थ ल्याउनुपर्ने र समयमा सामान आइपुग्न मुस्किल हुने समस्याका कारण केहि झन्झट देखिएपनी व्यवसाहीको माग पुर्ति गर्ने गरि काम अगाडी बढाइएको सागरको भनाई छ ।सावुन उत्पादन गर्न यहाँका वन जंगलमा पाईने कच्चा पदार्थलाइ समेत प्रयोग गर्ने गरि तयारि भइरहेको छ त्यसले गर्दा स्थानीय स्तरमा रोजगारिको सृजना हुनुका साथै कच्चा पर्दाथमा समेत सहजता हुने उनको भनाई छ ।
दुर्गम गाउँमा पनी केहि गर्न सकिन्छ भन्ने मान्यताका साथ यसरि लाखौँ रकम लगानी गरेर व्यवसायमा होमिएका उनलाई घर परिवारको साथ रहेको छ । कक्षा ११ र १२ मा अध्ययन गर्दे आएका कतिपय विद्यार्थीले समेत आफनो फुर्सदको समयमा उद्योगमा आएर काम सिक्ने र पारिश्रमिकमा काम गर्ने गरेको उनले बताए ।
काम सानो ठुलो हुँदैन यहिँ केहि गर्न सकियो भनेपनी राम्रो कमाई गर्न सकिन्छ केहिलाई रोजगारि दिन सकिन्छ भन्ने मान्यताले आफुहरुले उद्योग खोलेर व्यवसायमा होमीएको सागर बताउँछन ।
