भाद्र २६ गते बिहीबार

बागलुङको तमानखोला गाउँपालिका ६ नर्जामा गयराती परेको चट्याङका कारण एक जनाको ज्यान जानुका साथै दुई लघुजलविधुत आयोजना पूर्ण रुपमा अबरुद्ध हुँदा स्थानीय वडाभरका नागरीक विधुत सेवाबाट बञ्चित हुन पुगेका छन ।

गाउँ नजिकै विधुत आयोजनामा परेको चट्याङका कारण घरमै सुतिरहेको अवस्थामा नर्जा स्थित ७१ बर्षिय मनकली बि.क.को घटना स्थलमै ज्यान गएको छ ।

त्यस्तै स्थानीय पात्ले लघुजलविधुत आयोजना र बराहकोष लघुजलविधुत आयोजनाको पावरहाउसमा रहेका सबै मेशिन चट्याङले क्षेत्री पुर्याउनुका साथै ६० बढि घरपरिवारको विधुत वक्स , बल्ब लगाएत विधुतीय सामाग्रि जलेर नष्ट भएको तमानखोला गाउँपालिका ६ का अध्यक्ष चित्र छन्त्यालले बताउनु भयो ।  चट्याङका कारण स्थानीय नागरिक घाइते समेत भएका हुन ।

२५ भदौ, काठमाडौं । जंगीअड्डामा भएको जेनजी प्रतिनिधिको बैठकमा शुशील कार्कीको नेतृत्वमा नागरिक सरकार बनाउन प्रस्ताव गरेको छ ।

यो प्रस्ताव नेपाली सेनाका प्रमुख अशोकराज सिग्देलसमक्ष पठाइएको छ । एक उच्च सैनिक अधिकृतले भने, ‘उहाँहरूले सम्माननीयज्यूको नाम लिनु भएको छ, यद्यपि अझै अर्को समूहसँग समेत कुरा भइरहेको छ ।’

सेनाले पूर्वप्रधानन्यायाधीश कार्कीसँग समेत संवाद गर्ने जनाएको छ ।

बुधबार दिनभर जनेजी युवाले सामाजिक सञ्जाल डिस्कर्डमा समेत कसलाई नेतृत्वमा ल्याउने भन्ने विषयमा छलफल गरेका थिए । त्यसक्रममा समेत कार्कीको पक्षमा बलियो मत प्रस्तुत भएको छ ।धेरै युवाले काठमाडौं महानगरका मेयर बालेन शाहको नाम समेत प्रस्ताव गरेका थिए । तर, उनी सम्पर्कमा नआएको कतिपयको गुनासो छ । मंगलबार बेलुकी उनले स्टाटस लेख्दै जेनजीलाई सेना प्रमुखसँग वार्ताका गर्न तयार रहन भनेका थिए ।

बुधबार बिहान जेनजी प्रतिनिधि वार्ताका लागि जंगीअड्डा पुगेका थिए । तर, १५ जनाभन्दा बढी छलफलका लागि पुगेपछि सेना प्रमुख अशोकराज सिग्देलले पहिले आपसमा सहमति गरेर आउन भनेका थिए । उनले संयोजक समेत तोकेर आउन आग्रह गरेका थिए । त्यसपछि जंगीअड्डाकै एउटा कोठामा बैठक भएको थियो ।

त्यसक्रममा कतिपयले गणान्त्रिक व्यवस्थाविरुद्ध समेत प्रस्ताव राखेका थिए । त्यही कारण रक्षा बमसहितको समूह बाहिरिएको थियो । यद्यपि, अन्तिममा कार्कीको नेतृत्वमा नागरिक सरकार बनाउने सहमति भएको थियो ।

‘जेन जी’ ले पुस्ताले देशभर गरेको आन्दोलन अन्तरगत बागलुङको बुर्तिबाङमा समेत शान्तीपूर्ण रुपमा आन्दोलन गरिएको छ ।

इन्जिनीयर थम प्रकाश खनालको नेतृत्वमा सुरु भएको आन्दोलन बुर्तिबाङ देवचोकबाट सुरु भई ढोरपाटन नगरपालिकाको कार्यालय हुँदै बुर्तिबाङ बजार परिक्रमा गर्दे सम्पन्न गरिएको हो ।

सरकारलाई जवाफदेही बनाउन र देशमा भइरहेको अराजकता, भ्रष्ट्राचारको अन्त्य र सामाजिक सञ्जाल बन्दको विरोधमा आफुहरुले आन्दोलन गर्नुपरेको खनालले बताउनु भयो ।

सरकारको गैर जिम्मेवारीपनको खवरदाी गर्नका निम्ती नयाँ पिँडी सडकमा उत्रन बाध्य भएको बताउँदै सरकार नसच्चिएसम्म खवरदारी भइरहने र नयाँ पिँडी पछाडी नहट्ने खनालको भनाई थियो ।

स्वतस्फूर्त रुपमा सहभागि भएका करिब दुई सय जना यूवाहरुको समुहले बर्तमान सरकारको राजीनामा माग्दै पुराना नेताहरुका कारण देश बर्बादी तर्फ गइरहेको आरोप लगाएका छन ।

कार्यक्रमलाई शान्तीपूर्ण रुपमा सफल पार्न सहयोग गरेको भन्दै प्रहरी प्रशासन, पत्रकार बजार बासी नागरिकलाई आयोजकले धन्यबाद ज्ञापन गरेको छ ।

२३ भदौ, काठमाडौं । हिंसात्मक बनेको जेनजीहरूको प्रदर्शनमा मृत्यु हुनेको संख्या १७ पुगेको छ । ट्रमा सेन्टरमा थप दुई जनाको मृत्यु भएको अस्पताल स्रोतले जानकारी दिएको छ ।

यो सँगै उपत्यकाका विभिन्न अस्पतालमा मृत्यु हुनेको संख्या १७ पुगेको हो । ट्रमा सेन्टरमा मात्रै मृत्यु हुनेको संख्या ९ पुगेको छ । सामाजिक सञ्जाल बन्दको विरोधमा उत्रिएका जेनजीहरूको प्रदर्शनका क्रममा गम्भीर घाइते भएकाहरूको अहिले विभिन्न अस्पतालमा मृत्यु भएको हो ।

यसैगरी सिभिल अस्पतालमा ३, केएमसी अस्पतालमा १, त्रिवि शिक्षण अस्पतालमा १ र एभरेष्ट अस्पतालमा ३ जना जना प्रदर्शनकारीको मृत्यु भएको छ ।

अहिलेसम्म कुल १७ जना प्रदर्शनकारीको मृत्यु भइसकेको छ ।

भाद्र २१ गते

निसीखोला–२, अर्नाकोट, बागलुङमा एक दिने निःशुल्क स्वास्थ्य शिविर  सञ्चालन भएको छ।  कर्मफ्लाइट्स फाउन्डेशन नेपाल, नेपाल एपीएफ मुक्तिनाथ फिल्ड अस्पताल, पोखरा (सशस्त्र प्रहरी बल, नेपाल) को संयुक्त आयोजनामा, निसीखोला गाउँपालिका र वडा नं. २ कार्यालयको स्वीकृति र समन्वयमा निःशुल्क स्वास्थ्य शिविर सम्पन्न भएको हो।

निःशुल्क स्वास्थ्य शिविरको उद्घाटन वडा अध्यक्ष कुबिर विश्वकर्माले गरेका थिए भने तीन जना वडा सदस्यहरू उपस्थित थिए। शिविरको समन्वय कर्माफ्लाइट्सका स्वास्थ्य समन्वयक कृष्ण पाण्डेले गरेका थिए र प्रमुख चिकित्सकको नेतृत्व डा. आकर्षा श्रेष्ठले गरेका थिए।

उनीसँगै तीन जना एपीएफ पैरामेडिक र चार जना अर्नाकोट स्वास्थ्य इकाईका स्वास्थ्यकर्मीले सेवा प्रदान गरेका थिए। अर्नाकोट माध्यमिक विद्यालयका शिक्षक र विद्यार्थीहरूले व्यवस्थापनमा सक्रिय सहयोग गरेका थिए।

शिविरमा करिब २८० जना सेवाग्राही (२०० महिला र ८० पुरुष) ले स्वास्थ्य परीक्षण, परामर्श र निःशुल्क औषधि प्राप्त गरेका थिए। तीमध्ये १९० जनाको रक्तमा चिनी (मधुमेह) जाँच गरिएको थियो। अधिकांश सेवाग्राही ज्येष्ठ नागरिक र बालबालिका थिए।

सबैभन्दा वृद्ध प्रतिभागी ९२ वर्षकी महिला घाम्पुबाट तीन घण्टा पैदल यात्रा गरी स्वास्थ्य लाभ लिन आएकी थिइन्। सर्वाधिक पाइएको रोगहरूमा मांसपेशी÷साँधको दुखाइ, बालबालिकामा भाइरल ज्वरो र खोकी, महिलामा पेट दुखाइ, छालासम्बन्धी एलर्जी, मूत्रमार्ग संक्रमण र एपिग्यास्ट्रिक दुखाइ रहेका थिए। केही बिरामीहरूलाई थप उपचारका लागि बर्तिबाङ र पोखरा रेफर गरिएको थियो।

सेवाग्राहीहरू अर्नाकोटसहित छेडा, थुम, सिन्डेरी, डेलढारा, खलबाङ, जडभरा, निन्नेचौर, चौर, घम्पु, पाखापानी तथा ढोरपाटन वडाहरू २, ५ र ७ बाट सहभागी भएका थिए। स्थानीय बासिन्दा ज्ञानबहादुर बिकले वर्षायाममा घरमै सेवा प्राप्त गरेकोमा आभार व्यक्त गर्दै आफ्नो घाँटीमा भएको गाँठाको उपचारका लागि पोखरा अस्पताल जाने सल्लाह दिइएको जानकारी दिए।
शिविर औषधि र सामग्रीमा Indechemie Health Care -P_ Ltd, Nepal Pharmaceutical Lab Pvt Ltd,  Sancho Pharma  को सहयोग थियो।

शिविरको अन्त्यमा नेपाल एपीएफ फिल्ड अस्पतालले थप औषधि दान गरेको थियो भने कर्मफ्लाइट्स फाउन्डेशनले स्थानीय स्वास्थ्य इकाईको क्षमता बढाउन ८० हजार रुपैयाँ बराबरको औषधि उपलब्ध गराएको थियो। स्वास्थ्य इकाई प्रमुख विष्णु कार्की कुँवरका अनुसार, किसानहरूमा एलर्जी समस्या बढी हुने भएकाले भविष्यमा आँखा विशेषज्ञको समेत शिविरमा समावेश गर्न अनुरोध गरिएको छ।
डा. आकर्षा श्रेष्ठले अर्नाकोटमा दोस्रो दुर्गम स्वास्थ्य शिविरमा सेवा दिन पाउँदा सन्तुष्टि महसुस गरेको बताइन्। उनले समुदायलाई पहुँचयोग्य स्वास्थ्य सेवा आवश्यक रहेको र स्थानीयको सरलता तथा आत्मीयताले प्रेरित भएको उल्लेख गरिन्।

कृष्ण पाण्डेले आठ वर्षअघि अर्नाकोटमा पहिलो स्वास्थ्य शिविर सञ्चालन गरेको स्मरण गर्दै यहाँको समुदायसँगको आत्मीय सम्बन्ध विशेष रहेको बताए। उनले क्याल्सियमको कमी र फलफूल अभाव जस्ता चुनौती अझै रहेकामा पनि स्याउ खेतीले भविष्यमा पोषण र स्वास्थ्य सुधारमा योगदान पु¥याउने विश्वास व्यक्त गरे।