असार ७ ।
ढोरपाटन नगरपालिका–१ बुर्तिबाङमा सञ्चालन भएको छैटौं गण्डकी प्रदेश आईटीएफ तेक्वान्दो प्रतियोगिता–२०८३ सम्पन्न भएको छ । ढोरपाटन नगरपालिकाको सहयोग तथा गण्डकी प्रदेश आईटीएफ तेक्वान्दो संघको आयोजनामा असार ६ र ७ गतेसम्म सञ्चालन भएको प्रतियोगितामा गण्डकी प्रदेशका ६ जिल्लाका १२० जना खेलाडीको सहभागिता रहेको थियो ।
गण्डकी प्रदेश आईटीएफ तेक्वान्दो संघका अध्यक्ष घम बहादुर थापा मगरको अध्यक्षता तथा ढोरपाटन नगरपालिकाका कार्यवाहक नगर प्रमुख धन बहादुर कायत (कल्याण) को प्रमुख आतिथ्यतामा सम्पन्न समापन कार्यक्रममा खेलाडीहरुलाई विभिन्न तौल तथा उमेर समूहअन्तर्गत उत्कृष्ट प्रदर्शनका आधारमा पुरस्कार, मेडल र प्रमाणपत्र वितरण गरिएको थियो ।
प्रतियोगितामा स्याङ्जा जिल्ला टिमले १० स्वर्ण, ७ रजत र ६ कास्यसहित कुल २३ पदक प्राप्त गर्दै प्रथम स्थान हासिल गरेको छ । त्यस्तै तनहुँले ८ स्वर्ण, ४ रजत र ४ कास्य गरी १६ पदकसहित दोस्रो तथा कास्कीले ३ स्वर्ण, ५ रजत र १३ कास्य गरी २१ पदकसहित तेस्रो स्थान हासिल गरेको छ ।
प्रतियोगितामा पुरुषतर्फ आयोजक टिमका सूर्य अदै सर्वोउत्कृष्ट खेलाडी घोषित हुनुभएको छ भने महिलातर्फ तनहुँकी मनिषा केसी सर्वोउत्कृष्ट खेलाडी बन्न सफल हुनुभएको छ ।
प्रतियोगितामा बागलुङ, म्याग्दी, कास्की, नवलपुर, स्याङ्जा, तनहुँ र आयोजक गरी ७ वटा टिमको सहभागिता रहेको थियो ।
समापन कार्यक्रममा ढोरपाटन उद्योग वाणिज्य संघका उपाध्यक्ष धनराम पुरी, जिल्ला खेलकुद विकास समिति बागलुङका सदस्य सरोज घर्ती मगर, समाजसेवी कृष्ण भण्डारी, ढोरपाटन नगरपालिका स्वास्थ्य शाखाका सहसंयोजक केशव थापा मगर, इलाका प्रहरी कार्यालय बुर्तिबाङका प्रहरी निरीक्षक सुदिप भट्टराई, विभिन्न जिल्लाका आईटीएफ तेक्वान्दो संघका अध्यक्षहरु तथा खेलकुद क्षेत्रका प्रतिनिधिहरुको सहभागिता रहेको थियो ।
कार्यक्रमलाई सम्बोधन गर्दै प्रमुख अतिथि धन बहादुर कायतले खेलकुदले युवालाई अनुशासित, स्वस्थ र जिम्मेवार बनाउन महत्वपूर्ण भूमिका खेल्ने बताउनुभयो । उहाँले स्थानीय स्तरमा खेल प्रतिभाको पहिचान र विकासका लागि यस्ता प्रतियोगिताले सहयोग पुर्याउने भन्दै ढोरपाटन नगरपालिकाले खेलकुद क्षेत्रको विकास र खेलाडी प्रोत्साहनका लागि आगामी दिनमा पनि सहयोग गर्ने प्रतिबद्धता व्यक्त गर्नुभयो ।
आयोजकका अनुसार प्रतियोगिताले गण्डकी प्रदेशमा आईटीएफ तेक्वान्दो खेलको विकास, खेलाडीबीच प्रतिस्पर्धात्मक भावना वृद्धि तथा आपसी सम्बन्ध मजबुत बनाउन महत्वपूर्ण योगदान पुर्याएको छ ।
