चैत्र १२ गते बुर्तिबाङ
इमेज बचत तथा ऋण सहकारी सँस्था लिमिटेडका बचत कर्ता पीडितले दश महिना बित्दा समेत फरार इमेज सहकारीका अध्यक्ष देवकुमार नेपाली सम्पर्कमा नआएपछि बन्द रहेको बुर्तिबाङ बजारको दरबार होटल र रेष्टुरेन्ट सञ्चालन ल्याउने तयारी गरिएको गल्कोट संघर्ष समितका अध्यक्ष मञ्जु शर्माले बताउनु भयो ।
गल्कोट र बुर्तिबाङ का बचत कर्ता पीडित संघर्ष समितिको निर्णय अनुसार आफूहरूले दरबार होटल खोलेर त्यहाँ रहेका सामानको विभिन्न राजनैतिक दलको रहोभरमा तथ्यांक संकलन गरिएको र अब सरसफाइ लगायतका कार्य गरेर २०८१ बैशाख १ गते होटल रेष्टुरेन्ट सञ्चालनमा ल्याउने गरि आवश्यक तयारी गरिएको शर्माको भनाई छ ।
उता राष्ट्रिय सहकारी बैँकले घर जग्गा लिलामीमा राख्ने तयारी गरिरहेको बताउँदै बुर्तिबाङमा रहेको होटल दरबार रहेका घर १२ करोड धितोमा रहेका कारण लिलामीमा जान नदिई पीडित सदस्यहरूले खरिद गर्ने गरि तयारी गरिएको बताउँदै अब बुर्तिबाङ र गल्कोटका पीडित मिलेर होटल तथा भौतिक संरचनाको स्याहार सुसार गर्ने, सञ्चालनमा ल्याउने निर्णय भएको बताउनु भयो ।
विभिन्न समयमा सामाजिक सञ्जालमा लाइभ आउने, विज्ञप्ति राख्दै आएका इमेज बचत तथा ऋण सहकारी संस्थाका संस्थापक अध्यक्ष एवम् ढोरपाटन नगरपालिका मेयर देवकुमार नेपाली आफूहरू सँग एक पटक पनि सम्पर्कमा नभएको बताउँदै सहज वातावरण सृजना गर्दा समेत पीडितको माग प्रति सरकार समेत लाचार बनिरहेको पीडितहरूले बताएका छन ।
संघर्ष समिति गल्कोटका अध्यक्ष मञ्जु शर्माका अनुसार नेपालीले राष्ट्रिय सहकारी बैँकबाट करिब २५ करोड, ग्लोबल आइएमी बैँक र गरिमा विकास बैँकबाट गरि करिब १२ करोड गरि ३७ करोड बराबरको ऋण लिएको बताउँदै तत्काल राष्ट्रिय सहकारी बैँकमा राखिएको बुर्तिबाङमा रहेको दरबार होटल भएको घर गुम्न नदिन आफूहरूले उक्त ऋण तिरेर भएपनि पीडितको नाममा ल्याउने वातावरण तयार गर्न आफूहरू छलफलमा रहेको शर्माले बताउनु भयो ।
