बागलुङ, २२ असार। वडिगाड गाउँपालिकाको आयोजनामा महिलामैत्री शासन तथा सेवा प्रवाह सम्बन्धी सरोकारवालासँग अन्तरक्रिया कार्यक्रम सोमबार सम्पन्न भएको छ।
महिलालाई नेतृत्व तहमा थप सशक्त बनाउने, गाउँपालिकाभित्र महिलामैत्री शासनको अवस्था समीक्षा गर्ने तथा सेवा प्रवाहलाई थप प्रभावकारी बनाउने उद्देश्यले कार्यक्रम आयोजना गरिएको गाउँपालिकाले जनाएको छ।
गाउँपालिका अध्यक्ष गण्डकी थापाको अध्यक्षतामा सम्पन्न कार्यक्रममा प्यानल छलफलसँगै महिला अधिकारसम्बन्धी प्रशिक्षण कार्यक्रम पनि सञ्चालन गरिएको थियो।
प्यानल छलफलको सहजीकरण नेपाल पत्रकार महासंघ गण्डकी प्रदेश सदस्य तथा सामुदायिक रेडियो ढोरपाटनका स्टेशन प्रमुख छविलाल पाण्डेले गर्नुभएको थियो। छलफलमा गाउँपालिकाका प्रमुख प्रशासकीय अधिकृत कृष्णप्रसाद ज्ञवाली, इलाका प्रहरी कार्यालय बुर्तिबाङका प्रमुख तिलक मानन्धर तथा अधिवक्ता लक्ष्मी जिसी कार्कीले वक्ताका रूपमा आफ्ना धारणा राख्नुभएको थियो।
स्थानीय महिलाको सक्रिय सहभागिता रहेको कार्यक्रममा वडिगाड गाउँपालिकाबाट प्रवाह हुने सेवामा महिलामैत्री शासनको अवस्था, महिला नेतृत्वको वर्तमान स्थिति, लैङ्गिक हिंसाको अवस्था, कानुनी प्रक्रिया, सेवा सुधारका पक्ष तथा आगामी रणनीति र कार्यक्रमबारे खुला छलफल तथा बहस गरिएको थियो।
कार्यक्रमको दोस्रो चरणमा अधिवक्ता लक्ष्मी जिसी कार्की र लक्ष्मी वास्कोटाले महिलाको अधिकार, नेतृत्व विकास तथा कानुनी सचेतनासम्बन्धी प्रशिक्षण दिनुभएको थियो।
कार्यक्रमलाई सम्बोधन गर्दै गाउँपालिका अध्यक्ष गण्डकी थापाले यस्ता कार्यक्रमले महिलाको नेतृत्व क्षमता अभिवृद्धि, जिम्मेवारीबोध, महिलामैत्री शासन प्रणालीको विकास, सेवा प्रवाहमा सुधार तथा समग्र समाज रूपान्तरणमा महत्वपूर्ण योगदान पुग्ने विश्वास व्यक्त गर्नुभयो।
कार्यक्रममा गाउँपालिका उपाध्यक्ष भिमशेन वन, जनप्रतिनिधि, कर्मचारी, पत्रकार तथा स्थानीय सरोकारवालाको उल्लेखनीय उपस्थिति रहेको थियो।
