बागलुङ, तमानखोला
तमानखोला गाउँपालिकाले एकल महिलाको आयआर्जन वृद्धि गर्ने उद्देश्यले जीविकोपार्जन कार्यक्रमअन्तर्गत १८ जना एकल महिलालाई ब्याउने बाख्रा वितरण गरेको छ।
गाउँपालिका उपाध्यक्ष हिरा कुमारी छन्त्यालका अनुसार लक्षित वर्ग कार्यक्रमअन्तर्गत रु। २ लाख ५० हजारको लागतमा स्थानीय जातका ब्याउने बाख्रा खरिद गरी लाभग्राहीलाई हस्तान्तरण गरिएको हो। यस कार्यक्रमले एकल महिलाको आर्थिक सशक्तीकरण र आत्मनिर्भरता बढाउन महत्वपूर्ण सहयोग पुग्ने अपेक्षा गरिएको छ।
उपाध्यक्ष छन्त्यालले गत वर्ष पनि एकल महिलाका लागि मौरीपालन सम्बन्धी तालिम, मौरीसहित घार वितरण तथा बाख्रापालन प्रवर्द्धनका कार्यक्रम सञ्चालन गरिएको स्मरण गराउँदै यस्ता कार्यक्रमले महिलाको आर्थिक अवस्था सुधार्न सकारात्मक भूमिका खेलेको बताउनुभयो।
पशु विकास शाखाको आयोजनामा सञ्चालन गरिएको कार्यक्रममा बाख्रापालन सम्बन्धी प्रशिक्षणसमेत प्रदान गरिएको थियो। प्रशिक्षणपछि लाभग्राही महिलालाई स्थानीय जातका ब्याउने बाख्रा वितरण गरिएको हो।
कार्यक्रममा गाउँपालिका उपाध्यक्ष हिरा कुमारी छन्त्याल, प्रमुख प्रशासकीय अधिकृत अमित परियार , जनप्रतिनिधि, कर्मचारी तथा लाभग्राही महिलाको सहभागिता रहेको थियो।
कार्यक्रमबाट लाभान्वित वडा नं। ५ की गौमाया विकले यस्ता कार्यक्रमले आफूजस्ता एकल महिलाको आर्थिक उपार्जनमा ठूलो राहत पुगेको बताउँदै गाउँपालिकाप्रति आभार व्यक्त गर्नुभयो।
