निसीखोलामा ८ रोपनी क्षेत्रफलमा फैलिएका ८ हजार गाँजाका बोट प्रहरीद्वारा नष्ट
बागलुङ, असार २२। बागलुङको निसीखोला गाउँपालिकामा अवैध रूपमा उम्रिएका तथा खेती गरिएका करिब ८ हजार गाँजाका बोट प्रहरीले नष्ट गरेको छ।
इलाका प्रहरी कार्यालय बुर्तिबाङको सक्रियतामा खटिएको संयुक्त प्रहरी टोलीले निसीखोला गाउँपालिका–६ का भरबाङ र सिर्वाङ क्षेत्रमा सार्वजनिक तथा व्यक्तिगत जग्गामा रहेका गाँजाका बोट फँडानी गरी नष्ट गरेको हो।
प्रहरीका अनुसार करिब ८ रोपनी क्षेत्रफलमा फैलिएका प्राकृतिक रूपमा उम्रिएका तथा व्यावसायिक उद्देश्यले लगाइएका गरी करिब ८ हजार गाँजाका बोट नष्ट गरिएको हो।
इलाका प्रहरी कार्यालय बुर्तिबाङका प्रमुख प्रहरी निरीक्षक (इन्स्पेक्टर) तिलक मानन्धरको नेतृत्वमा खटिएको टोलीले गाँजा फँडानी अभियान सञ्चालन गरेको जनाएको छ।
बागलुङ जिल्लाको निसीखोला गाउँपालिकाको माथिल्लो भेग तथा छिमेकी ताराखोला गाउँपालिकाका केही क्षेत्रमा गाँजा प्राकृतिक रूपमा उम्रिने तथा कतिपय स्थानमा खेती गर्ने गरिएको पाइन्छ। स्थानीयस्तरमा (भाङको चटनी) परम्परागत खानाका रूपमा प्रयोग हुने भए पनि गाँजाको अवैध उत्पादन, ओसारपसार तथा लागुऔषधजन्य प्रयोग नियन्त्रण गर्न प्रहरीले प्रत्येक वर्ष गाँजा फँडानी तथा नष्ट गर्ने अभियान सञ्चालन गर्दै आएको जनाएको छ।
लागु औषध दुव्र्यसनी तथा ओसार पसार रोक्न सचेतना मूलक कार्यक्रम गर्दे आएको प्रहरी निरीक्षक मानन्धरले बताउनु भयो ।
