बुर्तिबाङ जेठ २२ गते — विश्व वातावरण दिवसको अवसरमा निसीखोला गाउँपालिकामा जलवायु परिवर्तन तथा वातावरण संरक्षणसम्बन्धी बाल संवाद, सामूहिक प्रतिबद्धता तथा ज्ञापनपत्र हस्तान्तरण कार्यक्रम सम्पन्न भएको छ।
टिडिएच होम्स जर्मनीको आर्थिक सहयोगमा विवाईसि बागलुङद्वारा सञ्चालित दिगो पर्यटन प्रवर्द्धन परियोजनाअन्तर्गत निसीखोला गाउँपालिका–४ झिवाखोलामा कार्यक्रम आयोजना गरिएको हो। कार्यक्रममा गाउँपालिकाभित्रका माध्यमिक विद्यालयहरूका बाल क्लबका पदाधिकारी तथा संरक्षक शिक्षकहरूको सहभागिता रहेको थियो।
कार्यक्रममा जलवायु परिवर्तनका प्रभाव, वातावरण संरक्षणका उपाय तथा बालबालिकाको भूमिकाबारे छलफल गरिएको थियो। पालिकाभरका ८ वटा सामुदायिक विद्यालयका बाल क्लब पदाधिकारीहरूको सक्रिय सहभागिता रहेको उक्त कार्यक्रममा वातावरण संरक्षणप्रति सामूहिक प्रतिबद्धता समेत व्यक्त गरिएको थियो।
बाल क्लबका प्रतिनिधिहरूले निसीखोला गाउँपालिकालाई जलवायु परिवर्तन रोकथाम, नियन्त्रण तथा जनचेतना अभिवृद्धिसम्बन्धी १० बुँदे मागपत्र र १० बुँदे सुझावसहितको ज्ञापनपत्र गाउँपालिका अध्यक्ष सूर्य बहादुर घर्ती लाई हस्तान्तरण गरेका थिए।
कार्यक्रममा निसीखोला गाउँपालिका–३ का वडा अध्यक्ष रमेश विक्रम शाही तथा वडा नं. ४ का वडा अध्यक्ष टिकानिधि पौडेल को विशेष उपस्थिति रहेको थियो।
कार्यक्रमको सहजीकरण परियोजनाका सामाजिक परिचालन अधिकृत रमिता पुन मगर ले गर्नुभएको थियो। सहभागीहरूले वातावरण संरक्षण तथा जलवायु परिवर्तन न्यूनीकरणका लागि स्थानीय तह, विद्यालय र समुदायबीच समन्वयात्मक पहल आवश्यक रहेकोमा जोड दिएका थिए।
