बागलुङ उद्योग वाणिज्य संघको आयोजनामा भएको आठौं बागलुङ महोत्सव सम्पन्न भएको छ ।
महोत्सवको अवसरमा झण्डै ४२ लाख बढीको टिकट बिक्री भएको संघका पदाधिकारीले प्रारम्भिक तथ्यांक दिएका छन् । पुस १६ र १८ गतेका दुइव कन्सर्टको भने हिसाब नभएको टिकट व्यवस्थापन समितिका संयोजक नविनकुमार श्रेष्ठले बताए । संघले केही समयभित्रै महोत्सवको वास्तविक आयव्याय सार्वजनिक गर्ने कोषाध्यक्ष मनिष राजभण्डारीले बताए ।
मेलामा खुला भलिबल प्रतियोगिता, लठ्ठो तान्ने खेल, लोकदोहोरी गीत प्रतियोगिता, व्यापारिक स्टल, रमाइलो मेला, मेड इन बागलुङअन्तर्गत कृषि तथा लघु घरेलु उद्यमीहरुको उत्पादनको प्रद्र्दशनी समेत गरिएको थियो । त्यस बाहेक महोत्सवमा टिकटक प्रतियोगिता, योजना प्रस्तुतीकरण, विद्यार्थीहरुको विभिन्न कार्यक्रम समेत सहभागि थिए ।
महोत्सव समापन गर्दै बागलुङ नगरपालिकाका प्रमुख बसन्तकुमार श्रेष्ठले महोत्सवले जिल्लाको पहिचान बढाउने, पर्यटन प्रवद्र्दन गर्ने र स्थानीय उत्पादनलाई पनि प्रवद्र्धन गर्ने बताए । पहिलाझै महोत्सवमा आम नागरिकको चासो कम भएपनि उनीहरुलाई उद्यमी, व्यवसायी र अन्य सबै क्षेत्रबाट जोडेर लैजान सक्नुपर्ने धारणा राखेका थिए ।
संघले महोत्सव बिशेषको रुपमा ‘समृद्दिमा हातेमालो’ नामक स्मारिका पनि प्रकाशित गरेको थियो । महोत्सवमा सहयोग गर्ने सबै क्षेत्रलाई संघले सम्मानपत्र प्रदान गरिएको छ । मेला सफल पार्न नेपाली सेनाले स्वास्थ्य शिविर संचालन गरेको थियो भने प्रहरीले सुरक्षा व्यवस्थापन समेत मिलाएको थियो ।
मेलाको अवसरमा संघले सामाजिक उत्तरदायित्व कार्यक्रमअन्तर्गत नेपाल पत्रकार महासंघ बागलुङलाई १ लाख रुपैयाँ र टिकट काट्ने काममा साथ दिएको मानवसेवा आश्रमलाई ५ लाख ११ हजार रुपैयाँको चेक हस्तान्तरण गरेको छ । मेलामा साथ सहयोग दिने, सह–आयोजक, प्रायोजक समेतलाई संघले सम्मान गरेको छ ।
मेलामा दजनौं राष्ट्रिय कलाकारले आफ्नो प्रस्तुतीकरण देखाएका थिए । प्रकाश सपुत, बसन्त थापा, प्रकाश दुतराज, जीवन शर्मा, रचना रिमाल, अर्जुन सापकोटा जस्ता कलाकारको प्रस्तुतीले महोत्सवमा दर्शकले भरपुर मनोरन्जन पाएका थिए ।
समापन समारोह संघका अध्यक्ष राजनकुमार शाक्य, महासचिव इन्द्रमणी पौडेल ‘अर्जुन’ र प्रेस सल्लाहकार सुवास आचार्यको संचालनमा सम्पन्न भएको थियो । कार्यक्रममा जैमिनी नगरपालिकाका उपप्रमुख हरिहर शर्मा, संघका निर्वतमान अध्यक्ष नरेश कँडेल, म्याग्दी उद्योग वाणिज्य संघसहित छिमेकी संघका पदाधिकारीले बोलेका थिए ।
संघका अध्यक्ष राजनकुमार शाक्यले महोत्सव सफल भएको बताए ।
