नेपालीहरूको दोस्रो ठूलो चाड तिहारको अवसरमा बागलुङको ढोरपाटन नगरपालिका–बुर्तिबाङ बजारमा देउसी–भैलो खेल्न सुरु गरिएको छ।
तिहारको महत्वपूर्ण दिन कुकुर तिहारको अवसर पारेर आजदेखि बुर्तिबाङ बजार क्षेत्रमा देउसी–भैलो कार्यक्रम सुरु भएको हो। तिहारको सांस्कृतिक तथा धार्मिक महत्वलाई आत्मसात् गर्दै स्थानीय युवा, बालबालिका तथा विभिन्न समूहहरू देउसी–भैलो खेल्दै घरघर तथा बजार क्षेत्रमा पुग्न थालेका छन्। बजारमा विशेषगरी राष्टिय जनमोर्चा निकट रक्तिम साँस्कृतिक अभियान ढोरपाटन नगर समिती, लायन्स क्लब अफ बुर्तिबाङ लगाएत विभिन्न संघसंस्थाको सहभागिता रहेको छ ।
नेपाली मौलिक संस्कृति, परम्परा र चाडपर्वको संरक्षण तथा प्रवर्द्धन गर्ने उद्देश्यले देउसी–भैलो कार्यक्रम सञ्चालन गरिएको हो। देउसी–भैलोका गीत, नाचगान र रमाइलो प्रस्तुतिले बुर्तिबाङ बजारमा तिहारको रौनक थपिएको छ। समूहगत रूपमा भेला भएर मादललगायतका बाजागाजासहित देउसी–भैलो खेल्न थालेपछि बजार क्षेत्रमा चाडपर्वको उत्साह झल्किएको छ।
पछिल्लो समय आधुनिक मनोरञ्जनका माध्यमहरू बढ्दै जाँदा मौलिक संस्कृतिमा आधारित यस्ता परम्पराहरूलाई निरन्तरता दिनुपर्ने आवश्यकता पनि उत्तिकै देखिएको छ। देउसी–भैलो केवल मनोरञ्जनको माध्यम मात्र नभई आपसी सद्भाव, भाइचारा र सामाजिक एकता कायम गर्ने महत्वपूर्ण सांस्कृतिक परम्पराका रूपमा समेत लिइन्छ।
तिहारको अवसरमा खेलिने देउसी–भैलोले स्थानीय समुदायबीच आत्मीयता बढाउनुका साथै नयाँ पुस्तालाई नेपाली मौलिक संस्कृति र परम्परासँग जोड्न महत्वपूर्ण भूमिका खेल्ने अपेक्षा गरिएको छ।
