बुर्तिबाङ, असार १८। बागलुङको ढोरपाटन नगरपालिका–६ मा घाँस काट्न जाने क्रममा भिरबाट लडेर एक महिलाको मृत्यु भएको छ।
बिहीबार बिहान करिब ७ बजे घर नजिकै रहेको छहरे खोला क्षेत्रतर्फ साथीसँगै घाँस काट्न गएकी २६ वर्षीया मनिषा श्रीपाली भिरबाट करिब ३० मिटर तल खसेर घटनास्थलमै मृत्यु भएको हो।
स्थानीय ओम श्रीपालीका अनुसार वर्षातका कारण बाटो चिप्लो भएकाले हिँड्ने क्रममा उहाँको खुट्टा चिप्लिएको थियो। लड्ने क्रममा ढुंगाले समेत च्यापिएपछि घटनास्थलमै ज्यान गएको उहाँले जानकारी दिनुभयो।
मृतकका श्रीमान् वैदेशिक रोजगारीका सिलसिलामा विदेशमा रहेको र उहाँका ४ वर्षका एक सन्तान रहेको स्थानीयले बताएका छन्।
वर्षायाममा घाँस–दाउरा संकलन गर्न जाँदा जमिन गल्ने, बाटो चिप्लिने तथा भिरबाट ढुंगा खस्ने जोखिम उच्च हुने भएकाले सम्बन्धित निकाय तथा स्थानीयले आवश्यक सावधानी अपनाउन आग्रह गरेका छन्।
दुःखद् खबर