बुर्तिबाङ, बागलुङ
मध्यपहाडी लोकमार्ग अन्तर्गतका १० नमुना शहरमध्ये एक बुर्तिबाङ नयाँ शहर आयोजनाका लागि आगामी आर्थिक वर्षमा १३ करोड ९७ लाख रुपैयाँ बजेट विनियोजन गरिएको छ। शहरी विकास मन्त्रालय अन्तर्गतको नयाँ शहर आयोजना कार्यालय बुर्तिबाङका लागि विभिन्न पूर्वाधार विकास योजनामा उक्त बजेट छुट्याइएको हो।
ढोरपाटन नगर विकास समितिले प्रस्ताव गरेका ३७ करोड बजेट योजनामध्ये करिब १४ करोड रुपैयाँ बराबरका योजना छनोट भएको समितिका संयोजक तथा ढोरपाटन नगरपालिकाका कार्यवाहक मेयर धन बहादुर कायत ले जानकारी दिनुभयो।
चालु आर्थिक वर्षमा १६ करोड रुपैयाँ बजेट विनियोजन गरिए पनि जेएनजी आन्दोलन तथा निर्वाचनका कारण अधिकांश बजेट कटौती हुँदा
चालु आर्थिक बर्षमा ३ करोड बराबरको काम गर्ने गरी केही मात्र योजनाको निर्माण अगाडी बढाइएको छ । जसअन्र्तगत बुर्तिबाङ कवर्डहल देखि माथिल्लो बजार सम्मको सडक निर्माण, नयाँ शहर आयोजनाको कार्यालय आसपासमा पार्क निर्माण, भब्रेटामा खेल मैदान निर्माण र बसपार्कको बाँकी रहेको काम गर्ने गरी योजना सम्झौता भएर काम भइरहेको नयाँ शहर आयोजना कार्यालयले जनाएको छ ।
आगामी आर्थिक वर्षका लागि ११ करोड बराबरको नयाँ कार्यक्रम र २ करोड ९७ लाखको क्रमगत योजनालाई प्राथमिकता दिइएको छ । वडा नं। १ को भगवतीटोल–घम्सिन–स्वरवोट–भब्रेटा सडक, वडा नं। ३ को चाचलघाट–घोसा–छरछरे–विसमोर सडक तथा वडा नं। २ को रिनाम–भ्यालखर्क–तारिखेत–खल्बाङ–बयचौर सडक स्तरोन्नतिका लागि एकमुष्ट ५ करोड रुपैयाँ बजेट विनियोजन गरिएको छ।
त्यसैगरी भब्रेटामा खेलमैदान, पार्क तथा सभाहल निर्माणको बाँकी काम सम्पन्न गर्न ३ करोड रुपैयाँ, वडा नं। १ बुर्तिबाङ क्षेत्रको सडक स्तरोन्नतिका लागि ३ करोड रुपैयाँ विनियोजन गरिएको छ। भब्रेटा सभाहल, आसपासको पार्क निर्माण तथा कर्भडहलदेखि उपल्लो बजार जोड्ने सडक निर्माणका लागि १ करोड ३५ लाख रुपैयाँ छुट्याइएको छ।
आगामी बर्षका लागि बजेट तथा कार्यक्रम यस प्रकार रहेका छन ।
नयाँ शहर आयोजनाको सभाहल निर्माण दोस्रो चरणका लागि ९७ लाख रुपैयाँ, चाचलघाट–घोसा–कालापोल सडक स्तरोन्नतिका लागि ३० लाख रुपैयाँ, बसपार्कको बाँकी पूर्वाधार निर्माणका लागि १० लाख रुपैयाँ तथा कुत्थाप्ला पार्क र तारिखेत पहुँचमार्ग निर्माणका लागि २५ लाख रुपैयाँ बजेट विनियोजन गरिएको छ। नगरविकास समिती मार्फत अन्य योजनाको विषयमा बजेट माग गरिएपनी कतिपय योजनामा बजेट कटौटी गरि कम मात्रामा बजेट समावेश गरिएको पाइएको छ ।
वि सं २०६९ सालदेखि सञ्चालनमा आएको बुर्तिबाङ नयाँ शहर आयोजना २०९० सालसम्म एक लाख जनसंख्यालाई सेवा दिन सक्ने योजनासहित अघि बढाइएको हो। आयोजनामार्फत सडक, पार्क, सभाहल, बसपार्क, पदमार्ग, ढल व्यवस्थापन तथा अन्य शहरी पूर्वाधार निर्माणका काम हुँदै आएका छन्।
आयोजनाले ढोरपाटन २ तारिखेतमा एकिकृत बस्ति विकासका निम्ती जग्गा व्यवस्थापनमा प्रयास अगाडी बढाएपनी यसबर्ष बजेट कटौटी हुँदा उक्त कार्यक्रम अगाडी बढ्न नसक्ने देखिएको हो ।
यद्यपि हरेक वर्ष बजेट घट्दै जानु तथा सरकारले नयाँ शहरको संख्या विस्तार गर्दै जानुले बुर्तिबाङ नयाँ शहर आयोजनाले अपेक्षाअनुसार गति लिन नसकेको भन्दै स्थानीयवासीले चिन्ता व्यक्त गरेका छन्। उनीहरूले विनियोजित बजेट प्रभावकारी रूपमा कार्यान्वयन गरी बुर्तिबाङलाई वास्तविक नमुना शहरका रूपमा विकास गर्नुपर्ने माग गरेका छन्।
