२०८२ भाद्र १६ , बुर्तिबाङ ,
ढोरपाटन नगरपालिकाको स्वास्थ्य शाखाले सोमबारदेखि डेङ्गी रोग नियन्त्रणका लागि सचेतनामूलक कार्यक्रम र सरसफाइ अभियान सुरु गरेको छ ।
हालको मौसमी अवस्था डेङ्गी फैलनका लागि अनुकूल मानिने भएकाले स्थानीय तहमा सतर्कता आवश्यक रहेको नगरपालिकाले जनाएको छ ।
रोकथामका लागि सबैले हातेमालो गर्नुपर्ने आवश्यकता छ । “घर वरिपरि रहेका खाल्डाखुल्डी पुरेर सफा राखौँ, पुराना टायर, गमला वा फूलदानीमा पानी जम्न नदिऊँ, र प्रयोगविहीन भाँडाकुँडा खाली गरेर सफा राखौँ,” संयोजक विश्वकर्माले भने ।
बजार क्षेत्रभित्रका विभिन्न ठाँउहरुमा गएर सरसफाइ समेत गरेको स्वास्थ्य शाखाले जनाएको छ ।नगरपालिकाले विभिन्न वडामा सचेतनामूलक कार्यक्रम सञ्चालन गर्दै समुदायलाई सक्रिय सहभागिता जनाउन आह्वान गरेको छ ।
साथै, विद्यालय, महिला समूह, युवा क्लब र अन्य सामाजिक सङ्घसंस्थालाई अभियानमा जोडिन आग्रह गरिएको छ ।स्वास्थ्य शाखाका अनुसार डेङ्गीको लक्षण, जटिलता र नियन्त्रणबारे जनचेतना फैलाउन घरदैलो र समूहगत सचेतनामूलक गतिविधि निरन्तर सञ्चालन गरिनेछ ।
नगरपालिकाले सरसफाइ र सर्तकता मार्फत मात्र डेङ्गी नियन्त्रण सम्भव हुने भएकाले सबै नागरिकलाई अभियानमा सहभागी हुन आग्रह गरेको छ ।
