बागलुङ, साउन २८ — बागलुङको ढोरपाटन नगरपालिका–२ सलामकोटमा घरको गारो भत्किँदा च्यापिएर एक बालकको मृत्यु भएको छ।
मृत्यु हुनेमा वडिगाड गाउँपालिका–५ घर भई हाल मावली घर सलामकोटमा बस्दै आएका ५ वर्षीय आषिस भण्डारी रहेका छन्।
इलाका प्रहरी कार्यालय बुर्तिबाङका अनुसार आइतबार बिहान करिब ११ बजेतिर घरको पिँडीमा खेलिरहेका बेला इटाले लगाइएको पिँडीको गारो एक्कासी भत्किएर बालकमाथि खसेको थियो। गारोले च्यापिँदा उनी गम्भीर घाइते भएका थिए।
घटनापछि तत्काल उपचारका लागि बुर्तिबाङ अस्पताल ल्याउने क्रममा बाटोमै उनको मृत्यु भएको प्रहरीले जनाएको छ।
घटनाबारे थप अनुसन्धान भइरहेको इलाका प्रहरी कार्यालय बुर्तिबाङले जनाएको छ।
