बागलुङको ढोरपाटन उपत्यका यतिबेला विभिन्न रङका वनफूलले ढाकिएपछि आन्तरिक पर्यटकको प्रमुख आकर्षण बनेको छ।
राता, पहेँला, गुलाबी र बैजनी रङका फूलले सिँगारिएको ढोरपाटन उपत्यका बर्खायाममा अझ मनमोहक देखिएको छ। चारैतिर अग्ला पहाडले घेरिएको यस उपत्यकामा प्राकृतिक सौन्दर्य अवलोकन गर्न दैनिक दुई सयभन्दा बढी पर्यटक पुग्ने गरेका छन्।
होटल व्यवसायी सङ्घका अध्यक्ष जीवन पुनका अनुसार विगत केही वर्षयता सञ्चारमाध्यम र सामाजिक सञ्जालमार्फत ढोरपाटनको व्यापक प्रचारप्रसार भएपछि पर्यटकको सङ्ख्या उल्लेखनीय रूपमा बढेको हो। यससँगै स्थानीय होटल तथा पर्यटन व्यवसाय पनि फस्टाउन थालेको उहाँले बताउनुभयो।
स्थानीयले राके फूल भनेर चिन्ने वनफूललाई ढोरपाटन सिकार आरक्षले नाकेफुली, बुकीफूल र मदानेफूललगायतका नामले चिनाउने गरेको छ। उपत्यकाभरि फुलेका यी वनफूलले पर्यटकलाई लोभ्याइरहेका छन्।
काठमाडौँ, पोखरा, नेपालगञ्ज, भैरहवा, चितवन र दाङलगायतका विभिन्न जिल्लाबाट पर्यटक ढोरपाटन पुगिरहेका छन्। चितवनको माडीबाट आएका महेश थापाले सामाजिक सञ्जालमा देखिएका तस्बिर र भिडियोले आकर्षित भएर १३ जनाको समूहसहित ढोरपाटन आएको बताउनुभयो। दाङको तुल्सीपुरबाट आएका कुलेन्द्र पनेरुले ढोरपाटनको प्राकृतिक सौन्दर्य र चिसो मौसमले आफू निकै प्रभावित भएको प्रतिक्रिया दिनुभयो।
यद्यपि, बुर्तिबाङदेखि ढोरपाटनसम्मको करिब ३२ किलोमिटर सडकमध्ये फल्लेघरभन्दा माथिको सडक जीर्ण हुँदा यात्रामा कठिनाइ हुने गरेको पर्यटकको गुनासो छ।
ढोरपाटन नगरपालिकाका उपप्रमुख धनबहादुर कायतले कालोपत्रको तयारीस्वरूप सडक फराकिलो बनाउने काम भइरहेको र हिलाम्मे भएका स्थानमा गेग्रेटा हालेर यात्रालाई सहज बनाइने जानकारी दिनुभयो।
वनफूलले ढाकिएको ढोरपाटनको सौन्दर्यले बर्खायाममै पर्यटकको चहलपहल बढ्दै गएको स्थानीय पर्यटन व्यवसायीहरूको भनाइ छ।
