बुर्तिबाङ, बागलुङ ।
ढोरपाटन नगरपालिका–३ बगरमा रहेको क्रसरबाट गिटी, बालुवा तथा ढुंगा बाहिर ओसारपसार गर्न रोक लगाउने निर्णय गरिएको छ । बुर्तिबाङ–बोङगादोभान सडक खण्डको निर्माण कार्य प्रभावित भइरहेको र क्रसरबाट निर्माण सामग्री अन्यत्र लैजाने कार्य भइरहेको भन्दै रोक लगाउने निर्णय गरिएको हो ।
बिहीबार ढोरपाटन नगरपालिका कार्यालयमा भएको छलफलमा नगरपालिका, राजनीतिक दलका प्रतिनिधि तथा सरोकारवालाबीच भएको बैठकले उक्त निर्णय गरेको हो । बैठकले बगरस्थित क्रसरबाट गिटी, ढुंगा र बालुवा बाहिर लैजाने कार्य रोक्न इलाका प्रहरी कार्यालय बुर्तिबाङलाई पत्राचार गर्ने निर्णय गरेको छ ।
ढोरपाटन नगरपालिकाका कार्यवाहक नगर प्रमुख धनबहादुर कायतले नगरपालिकाले उक्त क्रसर सञ्चालनका लागि अनुमति नदिएको र सम्बन्धित स्थानभन्दा बाहिर निर्माण सामग्री प्रयोग भइरहेको पाइएकाले रोक लगाउने निर्णय गरिएको बताउनुभयो ।
उहाँले सडक निर्माणको कामले अपेक्षित गति लिन नसकिरहेको अवस्थामा निर्माण सामग्रीको उचित व्यवस्थापन आवश्यक रहेको बताउनुभयो ।
छलफलमा नेपाली कांग्रेसका विनोद भण्डारी, नेपाली कम्युनिष्ट पार्टीका हेमेन्द्र घर्ती, नेकपाका हरिबहादुर कुँवर, नेकपा एमालेका चुना बहादुर घर्ती, स्थानीय रामप्रसाद आचार्य, योगेन्द्र परियार, ढोरपाटन नगरपालिकाका प्रमुख प्रशासकीय अधिकृत चिरञ्जीवी घिमिरेलगायतको सहभागिता रहेको थियो ।
