भाद्र १९ गते बुर्तिबाङ
बागलुङ जिल्लाको निसीखोला गाउँपालिकाले पालिकाको विभिन्न स्थानमा गरिएको पसल अनुगमनको क्रममा फेला पारेका म्याद सकिएको खाद्य पदार्थ बिहीबार नस्ट गरेको छ ।
गत भाद्र १२ गतेदेखि १९ गतेसम्म ७ वटै वडाका विभिन्न स्थानमा गरिएको अनुगमनका क्रममा भेटिएको जंकफुट, दाल, चामल, आटा, मैदा, चाउचाउ, बिस्कुट, चिसो प्य पदार्थ लगायतका सामाग्रीको म्याद गुज्रिएको भेटिएपछि पालिकाले जनप्रतिनिधि, कर्मचारी, पत्रकार, प्रशासन, प्रहरी लगायतको रोबरमा नष्ट गरेको हो ।
अनुगमनका क्रममा म्याद गुज्रिएको सामान फेला परेको र आफूहरूले सबैको रोबरमा नष्ट गरिएको गाउँपालिका अध्यक्ष सूर्य बहादुर घर्तीले बताउनु भयो ।
ठूला व्यापारीले साना व्यापारी कहाँ म्याद गुज्रिन लागेका बस्तु लगेर बिक्री गर्ने परिपाटी बढि रहेछ त्यसलाई रोक्नका निम्ती व्यापारीहरूलाई सचेत बनाइएको र आगामी दिनमा व्यापारी समेत सचेत हुनुपर्ने र ग्राहकले समेत खाद्य वस्तुको मिति हेरेर मात्र खरिद गर्न सचेतना गराइएको अध्यक्ष घर्तिको भनाई छ ।
७ दिन सम्म गरिएको अनुगमनबाट करिब एक लाख मूल्य बराबरको अखाद्य बस्तु जफत गरिएको छ । अनुगमनका क्रममा सरसफाइ गर्न, आफ्नो व्यवसायको स्थानीय तहमा दर्ता गर्न, दर्ता बमोजिमको सामान बिक्री गर्न र घर भाडामा भएको भए सम्झौता गर्न आग्रह गर्दे दर्ता नगरी सञ्चालनमा आएका व्यवसायको भाद्र मसान्त सम्म दर्ता प्रकृयामा जान आग्रह गरिएको गाउँपालिका उपाध्यक्ष प्रेम बहादुर घर्तिले बताउनु भयो ।
बिहीबार जफत गरिएको सामान नष्ट गर्ने कार्यक्रममा गाउँपालिका अध्यक्ष सूर्य बहादुर घर्ति, उपाध्यक्ष प्रेम बहादुर घर्ति, प्रमुख प्रशासकीय अधिकृत जीवन पुन मगर , प्रशासकीय अधिकृत दिलिप कुमार चन्द, राजश्व परामर्श समिति सदस्य चन्द्रसिंह रामजाली, वडा अध्यक्ष कविर बिक, कार्यपालिका सदस्य, कर्मचारी, इलाका प्रशासन कार्यालय बुर्तिबाङका पवन थापा खाम्चा, प्रहरी, पत्रकार लगायतको उपस्थिति रहेको थियो ।
पालिकाले ग्रामीण क्षेत्रमा अनुगमन गर्न बाँकी रहेका पसलको समेत निरन्तर अनुगमन गर्ने जनाईएको छ ।
