भदौ १० गते बुर्तिबाङ
गत साउन २२ गतेको बाढीपहिरोबाट परिवारका सदस्य गुमाएका, घाइते र बसोबास बिहिन बडिगाड गाउँपालिका ९ र १० का पीडित परिवारलाई बागलुङ समाज अस्ट्रेलिया र एनआरएनएको संयुक्त पहलमा आर्थिक सहयोग गरिएको छ ।
सोमबार गण्डकी प्रदेश सभा सदस्य माननीय जित बहादुर शेरचन सहितको टोलीले पीडित परिवारका नाममा पठाइएको नगद रकम हस्तान्तरण गरिएको हो ।
बागलुङ समाज अस्ट्रेलियाका विकास सापकोटाको पहलमा सङ्कलन गरिएको तिन लाख ३० हजार राहत रकम बडिगाड गाउँपालिका वडा नम्बर ९ र १० का २२ जनाको परिवारलाई हस्तान्तरण गरिएको हो ।
बाढी पहिरोबाट वडा नम्बर ९ मा २ जना र १० मा एक जना बेपत्ता सहित १० जनाको ज्यान गएको थियो । सांसद शेरचनले बाढी पहिरोबाट ज्यान गुमाएका प्रति व्यक्ति जनही पन्ध्र हजारका दरले राहत रकम उपलब्ध गराउनु भएको हो । त्यस्तै घाइते ५ जना र पूर्ण रुपमा घरमा क्षेती भएका ५ परिवारका निम्ती पन्ध्र पन्ध्र हजार रुपैयाँका दरले गरी कुल ३ लाख ३० हजार रुपैयाँ हस्तान्तरण गरिएको हो ।
राहत रकम हस्तान्तरण गर्दे सांसद शेरचनले भन्नुभयो“ पीडामा परेका नागरिकको राहत र उद्धारमा सबैले हातेमालो गर्नुपर्ने कर्तव्य रहेको बताउँदै बागलुङ समाज अस्ट्रेलिया र एआरएनए द्धारा आफु मार्फत पठाइएको राहत रकम पीडितलाई उपलब्ध गराइएको बताउँदै आफूले विभिन्न चरणमा राहत लिएर आएको बताउनु भयो । ”
यहाँको बाढी पहिरोका कारण विस्थापित परिवारलाई व्यवस्थापन गर्न, बिग्रीएको सडक मर्मत गर्न र आवास निर्माणमा आफूहरूले सक्रिय भूमिका खेल्ने बताउनु भयो ।
आयोजित कार्यक्रममा वडा नम्बर ९ का अध्यक्ष कृष्ण केसीले दुई वटा वडामा भएको सडक विधुत लगायतका समस्याका विषयमा ज्ञापन पत्र बुझाउँदै प्रदेशबाट हुने काम तदारुकताका साथ अगाडि बढाइदिन अनुरोध गर्नुभएको हो ।
कार्यक्रममा वडा नम्बर ९ का अध्यक्ष कृष्ण केसी, वडा नम्बर १० का अध्यक्ष विरेन्द्र बूढा, वडा नम्बर ६ का अध्यक्ष वीर बहादुर खत्री, बडिगाड गाउँपालिका ५ का पूर्व अध्यक्ष अर्जुन खरेल लगायतको उपस्थिति रहेको थियो । कार्यक्रम अर्जुन खरेलले सञ्चालन गर्नुभएको हो ।
