फाल्गुन २ गते
बागलुङको ढोरपाटन नगरपालिका वडा नं. ६ स्थित पुरानो गाउँमा पहिलो पटक मोटर पुग्दा स्थानीय नागरिक खुसी भएका छन ।
सोमबार गाउँमा सडक सञ्जाल जोडिएर सिधा सवारीका साधन घर छेउमै पुगेपछि स्थानीय नागरिकले खुसी मनाउँदै अब घरबाटै मोटर चढेर सहर बजार पुग्न सकिने र बिरामी पर्दा समेत सवारीका साधनमा चढेर अस्पताल पुग्न पाउने भएपछि स्थानीय २६ घरधुरीका नागरिकले खुसी व्यक्त गरेका हुन ।
गाउँ नजिक बाटो पुगेको थियो यस आर्थिक वर्षको पाँच लाख बजेट बिनियोजन गरेर गाउँसम्म सडक सञ्जाल जोडिएको वडा अध्यक्ष उमेश बुढाले बताउनु भयो । भौगोलिक रूपले दुर्गम रहेको वडा नं. ६ मा धेरै बस्ती हुँदै गर्दा अब प्राय सबै बस्तीमा सडक सञ्जाल जोडिएको बुढाले बताउनु भयो ।
वडाकै अर्को गाउँ भित्रिवनमा समेत गत मंसिर महिनामा सडक सञ्जालले जोडिएको हो । दुई लाख बजेट मार्फत सडक विस्तार गरिएपछि गाउँमा सडक पुगेको छ अव यहाँका नागरिकलाई ढोरपाटन जोड्ने सडक नबनेकै कारण समस्या भएको हो ।
करिब ११ किलोमिटर सडक कालोपत्रे हुने तयारीमा छ तर ढोरपाटन जोड्न ६ किलोमिटर हुँदै गर्दा ढोरपाटन सिकार आरक्षको कारणले सडक विस्तारमा समस्या भइरहेको वडा अध्यक्ष बुढाले बताउनु भयो ।
सिकार आरक्षमा सडक ट्याक खोल्न नपाइने भएपछि बिच बाटोसम्म कालोपत्रे सडक हुने भएपनि ढोरपाटन उपत्यकामा जोडिन समस्या भइरहेको हो । ढोरपाटन नगरपालिका प्रदेश सांसद लगायतको पहलमा सडक खोल्ने प्रयास गरेपनि सिकार आरक्षको मापदण्डका कारण समस्या सृजना भइरहेको बताइएको हो ।
