बुर्तिबाङ मंसिर ११ गते
बागलुङको निसीखोला गाउँपालिकामा लगाइएको सुर्यमुखी बालीबाट कृषकले राम्रो उत्पादन लिएका छन ।
गाउँपालिकाले आर्थिक बर्ष २०७९÷०८० को बजेट मार्फत २८० किलो सुर्य मुखीको विउ कृषकलाई वितरण गरिएकोमा उत्पादन राम्रो भएको जनाइएको छ ।
सातलाख बजेट विनीयोजन गरेको पालिकाले ७ वटै वडाका एक हजार चार सय कृषकलाई सुर्यमुखीको विउ उपलब्ध गराएकोमा समग्रमा उत्पादन राम्रो भएको कृषि शाखा प्रमुख सर्मिला कुमारी पण्डीतले बताउनु भयो ।
तेलहन बाली अन्र्तगत रहेको सुर्यमुखी फुल कम लगानी र मिहिनेतमा पनी राम्रो उत्पादन लिन सकिएको स्थानीय कृषकको भनाई छ । खेत बारीको छेउँ तथा मकै कोदो लगाएतका बाली भित्र रोपीएपनी निसीखोला गाउँपालिकाको अधिकांस क्षेत्रमा उत्पादन राम्रो भएको कृषकले बताएका छन । राम्रो संग मल राखिएको क्षेत्रमा एकै बोटबाट दुई केजी सम्म उत्पादन लिन सकिएको किसान परियारले बताउनु भयो ।
यसबर्ष निसीखोला गाउँपालिकाले तलहन बाली विकासका लागी थप ५ लाख बजेट विनीयोजन गरेको र सुर्यमुखीको उत्पादन दानालाई तेलको रुपमा प्रयोग गर्नका निम्ती तेल निकाल्ने मिशिने खरिदका निम्ती समेत बजेट विनीयोजन भएका कारण कृषकलाई तेल उत्पादनमा समेत सहजता हुने कृषि प्राविधिक पण्डीतले बताउनु भयो ।
एक रोपनी क्षेत्रफलमा दुई सय ग्राम लगाइएको सुर्यमुखीबाट ७ पाथीसम्म उत्पादन लिन सकिएको कृषकको भनाई छ ।
सूर्यमुखी फूल खेतीभित्र पनि अन्य विभिन्न बाली लगाउन सकिने, कम लगानी, मिहिनेतमा यसको व्यावसायिक खेती गरेर यथेष्ट कमाउन सकिने कृषि प्राविधिकहरु बताउँछन् । उत्पादित वीउबाट तेल उत्पादन गरी मनग्य आम्दानी लिन सकिन्छ भने डाँठलाई दाउराका लागि प्रयोग गर्न सकिन्छ । अन्य खेतीको तुलनामा धेरै परिश्रम र झन्झट गर्न नपर्ने, एक पटकमा तेब्बर बाली उत्पादन लिन सकिने हुँदा राम्रो आम्दानीको स्रोतका रुपमा लिइन्छ ।
सूर्यमुखी फूललाई बाह्रै महीना फुलाउन सकिन्छ । फूलका कारण मौरीलाई चरन हुने अर्कोतर्फ वीउबाट तेल आउने भएकाले कृषकहरुको आकर्षण बढेको पाइएको छ । सौन्दर्यताका लागि केही बोट घरको आँगनको डिल, छेउछाउमा लगाउँदै आइए पनि यस खेतीबाट राम्रो आम्दानी लिने उद्देश्यले कृषकले अहिले व्यावसायिक रुपमा खेती गर्न थालेका हुन् ।
