बुर्तिबाङ साउन ३१
तमानखोला गाउँपालिकाले दुर्गम क्षेत्र गुर्जाघाटमा पुगेर स्थानीय पशुपालक कृषकलाई स्वास्थ्य उपचारका सामाग्री उपलब्ध गराएको छ ।
सोमबार गाउँपालिका अध्यक्ष जोकलाल बुढा, वडा नं. ५ का अध्यक्ष हिरा बहादुर श्रीपाली स्वास्थ्य कर्मी, जनप्रतिनिधी लगाएतको टोलीद्वारा स्थानीय पशुपालक किसानले वर्षातको समयमा पशु चौपाया चरिचरणका निम्ति लैजाने गरिएको गुर्जाघाट क्षेत्रमा पुगेर एक सय बढि नागरिकको स्वास्थ्य परिक्षणसँगै उनीहरुलाई वर्षातको समयमा हुन सक्ने बिरामीको समस्यालाई मध्यनजर राख्दै प्राथमिक उपचारका सामाग्री सेट हस्तान्त्रण गरिएको गाउँपालिका अध्यक्ष जोकलाल बुढाले बताउनु भयो ।
गाउँपालिका सदरमुकाम देखि दिनभर पैदल यात्रा गरेर उक्त स्थानमा पुग्न सकिन्छ । विशेष गरि वडा नं. १ र २ तथा म्याग्दिको धवलागिरी गाउँपालिका अन्र्तगतका किसानहरु गाई, भैँसी, तथा भेडाको चरिचरणका निम्ती असार महिनादेखि असोज सम्म बुकि पुग्ने गरेका हुन । लेकमा स्वास्थ्य सँस्थाको पहुँच नहुने भएको र सामान्य चोटपटक लाग्दा देखि विरामी पर्दा समेत उपचार सेवा पाउन मुस्किल हुने समस्यालाई मध्यनजर राख्दै पालिकाले किसानको गोठमै पुगेर किसानको स्वास्थ्य परिक्षण सँगै औषधि उपलब्ध गराएको जनाईएको छ ।
स्वास्थ्य शिविरका लागि बुकी पुग्नुभएका स्वास्थ्यकर्मी हरिबहादुर छन्त्यालले धेरै जसो गोठालामा सुद्व खानेपानी नहुने खोलामा बग्ने पानि पिउने चिसो जस्ता समस्याका कारण ज्वरो आउने, पखला लाग्ने, उच्च रक्तचाप लगायत समस्या भएको बताउनुभयो । केहीलाई गम्भीर किसिमको रोग देखा परेकाले सुविधायुक्त अस्पतालमा जान सुझाएको उहाँको भनाइ छ । अध्यक्ष बुढा मगरसहित १२ जनाको टोली बुकी पुगेर शिविर सञ्चालन गरेको थियो । उनीहरुले एक सय बढी गोठालाको स्वास्थ्य उपचार गरेका थिए ।
