बागलुङको तमानखोला गाउँपालिकाले अनाथ, अति विपन्न र अभिभावकविहीन बालबालिकालाई पठनपाठन र आवसको व्यवस्थासहित बालगृह सञ्चालनमा ल्याएको छ । अभिभावक गुमाएका राम्रो हेरचाह नपाएका तथा आथिर्क अभावमा पढाईबाट वञ्चित हुन पुगेका बालबालिकालाई स्याहारसुसार र पठनपाठनका लागि बालगृह संचालन गरेको गाउँपालिका अध्यक्ष जोकलाल बुढा मगरले बताए ।
बालगृहमा हाल १६ जनाा बालबालिका रहेका छन । सम्पर्कमा रहेका अन्य बालबालिकालाई समेत चाँडै व्यवस्थापन गरिने अध्यक्ष बुढा मगरले बताए । तमानखोला गाउँपालिकाको अभियान र तमान बाल गृह सञ्चालन अभियान समितिको सहकार्यमा सुरु गरिएको कार्यक्रमबाट हालसम्म १० लाख रुपैयाँको कोष सञ्चालन गरिएको उनको भनाई छ । २ जना कर्मचारीले रेखदेख गर्ने गरी व्यवस्थापन गरिएको छ । उनीहरुले नजिकको सामुदायिक विद्यालयमा अध्ययन गर्ने छन् । कक्षा १२ सम्म पालिका र बाल गृह सञ्चालन समितिले निःशुल्क पठनपाठनसँगै खाना र आवासको व्यवस्थापन गर्ने भएको हो ।
प्रत्येक महिना कम्तिमा २ पटक उनीहरुको स्वास्थ्य परिक्षण गरिने, अध्ययनलाई राम्रो बनाउन पालिका र समितिले हेरचाह गर्नेगरी कार्यक्रम अगाडी बढाइएको अध्यक्ष बुढा मगरले बताए । विशेष गरी साना उमेर समुहका बालबालिका भएका कारण उनीहरुको उज्वल भविष्य निर्माणका निम्ति अभियानले महत्वपूर्ण सहयोग पु¥याउने अपेक्षा लिएको छ । गाउँपालिकाको २ लाख अनुदानसहित बालगृह सञ्चालन कोषमा ८ लाख गरि १० लाख संकलन भइसकेको छ ।
गाउँपालिका अध्यक्ष, उपाध्यक्ष, वडा अध्यक्ष लगाएत जनप्रतिनिधिले समेत आफुले पाउने पारिश्रमिको पाँच प्रतिशत रकम आफ्नो कार्यकाल अवधिभर बालगृहलाई दिने गरी अभियान चलाएका छन् । उक्त रकमबाट कोष वृद्धि हुँदै जाने र बालगृहलाई दीर्घकालिन व्यवस्थापनमा सहजता पुग्ने देखिएको हो ।
