लायन वर्ष २०२६–२०२७ का लागि लायन्स क्लब इन्टरनेशनल डिष्ट्रिक्ट ३२५ के अन्तर्गत ढोरपाटन नगरपालिका र निसीखोला गाउँपालिकामा रहेका तीनवटा लायन्स क्लबले नयाँ नेतृत्व चयन गरेका छन्।
सामाजिक सेवालाई मुख्य उद्देश्य बनाएर स्थापना भएका क्लबमध्ये लायन्स क्लब अफ ढोरपाटनको अध्यक्षमा हेमेन्द्र घर्ति चयन हुनुभएको छ। सामाजिक क्षेत्रमा सक्रिय रहँदै आउनुभएका घर्ति २०७४ सालको स्थानीय तह निर्वाचनमा ढोरपाटन नगरपालिका–३ का वडा अध्यक्षमा निर्वाचित भई सेवा गरिसक्नुभएको व्यक्ति हुनुहुन्छ। उहाँले लायन वर्ष २०२६–२०२७ मा क्लबलाई थप सक्रिय र प्रभावकारी बनाउने प्रतिबद्धतासहित नेतृत्व सम्हाल्नुभएको हो। शुक्रबार आयोजित विशेष समारोहमा पद हस्तान्तरण तथा पदभार ग्रहण कार्यक्रम सम्पन्न गरिएको थियो। अघिल्लो कार्यकालमा क्लबको नेतृत्व तेजेन्द्र खत्रीले गर्नुभएको थियो।
लायन्स क्लब अफ ढोरपाटनको प्रथम उपाध्यक्षमा मुक्तिनाथ लोहनी, द्वितीय उपाध्यक्षमा सुरेश थापा, तृतीय उपाध्यक्षमा राम खत्री, सचिवमा सरण पाण्डे तथा कोषाध्यक्षमा अर्जुन पाध्य चयन हुनुभएको छ।
यस्तै, लायन्स क्लब अफ निसीखोलामा अध्यक्ष अशोक कार्कीको नेतृत्वलाई यस वर्ष पनि निरन्तरता दिइएको छ। क्लबले सामाजिक सेवा, विपद् व्यवस्थापन तथा समुदायमुखी विभिन्न कार्यक्रम सञ्चालन गर्दै आएको छ।
त्यसैगरी लायन्स क्लब अफ बुर्तिबाङको अध्यक्षमा मनकुमारी कुँवर चयन हुनुभएको छ। क्लबको संस्थापक अध्यक्षका रूपमा लायन वर्ष २०२५–२०२६ मा शान्ती पौडेलले सफलतापूर्वक जिम्मेवारी निर्वाह गर्नुभएको थियो। क्लबले विपद् व्यवस्थापन, रोग तथा भोकमरी न्यूनीकरण, शिक्षा, स्वास्थ्य, वन तथा वातावरण संरक्षण, खेलकुद प्रवर्द्धन लगायतका क्षेत्रमा सक्रिय भूमिका खेल्दै आएको छ।
यसैबीच, तमानखोला गाउँपालिकामा यसै वर्ष लायन्स क्लब अफ तमान सोले स्थापना गरिएको जानकारी लायन्स क्लब अफ ढोरपाटनका अध्यक्ष हेमेन्द्र घर्तिले दिनुभयो।
शुक्रबार सम्पन्न पद हस्तान्तरण तथा पदभार ग्रहण कार्यक्रममा डिपार्टमेन्ट चिफ रामप्रसाद आचार्य, जनसम्पर्क अधिकृत (PRO) छविलाल पाण्डे, जोन चेयरपर्सन तेजेन्द्र खत्री, डिष्ट्रिक्ट चेयरपर्सन शान्ती पौडेल, उद्योग वाणिज्य संघका अध्यक्ष दिपक अदै लगायत विभिन्न व्यक्तित्वहरूको आतिथ्यता तथा शुभकामना मन्तव्य रहेको थियो।
